- 1
- I te rua tekau ma rima o nga tau o to matou whakaraunga, i te timatanga o te tau, i te tekau o nga ra o te marama, i te tekau ma wha o nga tau o te horonga o te pa, i taua tino rangi ano ka pa mai te ringa o Ihowa ki a au, a kawea atu ana ahau e ia ki reira.
- 2
- Kawea ana ahau e ia, he whakakitenga hoki na te Atua, ki te whenua o Iharaira, whakanohoia ana ahau e ia ki runga ki tetahi maunga tiketike rawa, a i runga i taua maunga ko tetahi mea e rite ana ki te pa, kua oti te hanga, ki te taha ki te tonga.
- 3
- Heoi kawea ana ahau e ia ki reira; na, ko tetahi tangata, tona ahua anō he parahi ki te titiro atu, he aho muka ano i roto i tona ringa, he kakaho ano hoki hei whangāngā; i te tu ano ia i te kuwaha.
- 4
- Na, ko te meatanga mai a taua tangata ki a au, E te tama a te tangata, titiro mai o kanohi, whakarongo o taringa, tahuri mai ano to ngakau ki nga mea katoa e whakakitea atu e ahau ki a koe; i kawea mai hoki koe ki konei kia whakakitea atu ai enei mea ki a koe: whakaaturia atu ki te whare o Iharaira nga mea katoa e kite ai koe.
- 5
- Na, ko tetahi taiepa i te taha ki waho o te whare, a taka noa, a i te ringaringa o taua tangata ko tetahi kakaho hei whangangā, e ono nga whatianga, he tino whatianga, kotahi ano hoki te whanuitanga ringaringa. Na, kei te whangangā ia i te whanui o taua mea kua oti na te hanga, kotahi te kakaho; me te tiketike ano, kotahi te kakaho.
- 6
- Na, ko tana taenga atu ki te kuwaha e anga ana whaka-te-rawhiti, kei te piki i ona kaupae, kei te whangāngā i te paepae o te kuwaha; tona whanui, kotahi te kakaho; i tetahi atu paepae ano hoki, kotahi te kakaho te whanui.
- 7
- Na, te roa o te ruma kotahi, kotahi te kakaho; te whanui, kotahi ano kakaho; i te takiwa o nga ruma, e rima nga whatianga: na, te paepae o te kuwaha i te whakamahau o te kuwaha i te taha ki roto, kotahi ano kakaho.
- 8
- I whangangā ano e ia te whakamahau o te kuwaha, te taha ki roto, kotahi te kakaho.
- 9
- I whangangā ano e ia te whakamahau o te kuwaha, e waru nga whatianga; ona pou ano hoki e rua nga whatianga: na, i te taha ki roto te whakamahau o te kuwaha.
- 10
- Na, nga ruma o te kuwaha o te taha ki te rawhiti, e toru i tenei taha, e toru i tera taha, kotahi tonu te nui o ratou e toru: kotahi tonu ano hoki te nui o nga pou i tenei taha, i tera taha.
- 11
- I whangangā ano e ia te whanui o te tapokoranga atu i te kuwaha, kotahi tekau nga whatianga; te roa o te kuwaha kotahi tekau ma toru nga whatianga.
- 12
- Na, te taha ki mua i nga ruma, kotahi te whatianga; tetahi atu taha ano hoki kotahi te whatianga: nga ruma ano hoki e ono nga whatianga o tenei taha, e ono nga whatianga o tera taha.
- 13
- I whangangā ano e ia te kuwaha i te tuanui o tetahi ruma, tae noa ki te tuanui o tetahi: e rua tekau ma rima nga whatianga te whanui, tetahi tatau anga tonu mai ki tetahi tatau.
- 14
- I hangā ano e ia etahi pou, e ono tekau nga whatianga, tae noa ki te pou o te marae i tetahi taha, i tetahi taha o te kuwaha.
- 15
- Na, te takiwa i te taha ki mua o te kuwaha e tapoko atu ai, tae noa ki te taha ki mua o te whakamahau o to roto kuwaha, e rima tekau nga whatianga.
- 16
- Na, he matapihi kuiti o nga ruma, o o ratou pou ano hoki i roto i te kuwaha, a taka noa, o nga kokoru ano; he matapihi ano o nga taha ki roto, a taka noa, he nikau ano hoki kei tenei pou, kei tenei pou.
- 17
- Katahi ahau ka kawea e ia ki to waho marae, na, he ruma kei reira, he whariki kohatu ano hoki, he mea i hangā mo te marae, a taka noa, taka noa: e toru tekau nga ruma i runga i te whariki kohatu.
- 18
- Na, te whariki kohatu i te taha o nga kuwaha i te ritenga atu o te taha roa o nga kuwaha, ko to raro whariki tera.
- 19
- Katahi ka whangangā e ia te whanui i te taha ki mua o to raro kuwaha, tae noa ki te taha ki mua o to roto marae, ki te taha ki waho; kotahi rau nga whatianga o te taha ki te rawhiti, o te taha ano ki te nota.
- 20
- Na, te kuwaha o to waho marae e anga ana whaka-te-nota, i whangangā ano e ia tona roa, tona whanui.
- 21
- Na, ona ruma, e toru i tenei taha, e toru i tera taha, ona pou ano hoki, ona kokoru ano hoki rite tona te nui ki to te kuwaha tuatahi; e rima tekau nga whatianga te roa, e rua tekau ma rima nga whatianga te whanui.
- 22
- Na, o ratou matapihi, o ratou kokoru, o ratou nikau, he mea whakarite ki te nui o te kuwaha e anga ana ki te rawhiti, e whitu ano nga kaupae i pikitia ai a reira; i mua ano i aua ruma o ratou kokoru.
- 23
- A, i anga te tuwaha o to roto marae ki te kuwaha ki te taha ki te nota, ki tera ano i te taha ki te rawhiti; i whangangā ano e ia te takiwa o tetahi kuwaha, o tetahi kuwaha, kotahi rau nga whatianga.
- 24
- Katahi ahau ka kawea e ia ki te taha ki te tonga, na, ko tetahi kuwaha i te taha ki te tonga. Na, ka whangangā e ia ona pou me ona kokoru, rite tonu ki enei kua oti nei te whangangā.
- 25
- He matapihi ano o reira, i ona kokoru ano hoki, a taka noa, he pera ano me era matapihi; e rima tekau nga whatianga te roa, a e rua tekau ma rima nga whatianga te whanui.
- 26
- E whitu ano hoki nga kaupae i pikitia ai, i mua ano i aua ruma o ratou kokoru; he nikau ano ona, tetahi i tetahi taha, tetahi i tetahi taha, ara, i ona pou.
- 27
- Na, he kuwaha ano kei to roto marae i te taha ki te tonga: i whangangā ano e ia te takiwa o tetahi kuwaha, o tetahi kuwaha whaka-te-tonga, kotahi rau nga whatianga.
- 28
- I kawea ano ahau e ia na te kuwaha ki te tonga ki to roto marae, a whangangā ana e ia te kuwaha ki te tonga, rite tonu ki enei kua oti nei te whanganga.
- 29
- Me nga ruma ano o reira, me ona pou ano, me ona kokoru ano, rite tonu ki enei kua oti nei te whangangā: he matapihi ano o reira, o ona kokoru ano hoki, a taka noa, taka noa: e rima tekau nga whatianga tona roa, e rua tekau ma rima nga whatianga tona whanui.
- 30
- Na, nga kokoru, a taka noa, e rua tekau ma rima nga whatianga te roa, e rima nga whatianga te whanui.
- 31
- A, i anga ona kokoru ki to waho marae; he nikau ano o ona pou: e waru ano nga kaupae o te pikitanga atu ki reira.
- 32
- I kawea ano ahau e ia ki to roto marae ki te taha ki te rawhiti, a whangangā ana e ia te kuwaha: rite tonu ki enei kua oti nei te whanganga.
- 33
- Na, nga ruma o reira, ona pou, ona kokoru, rite tonu ki enei kua oti nei te whanganga: he matipihi ano o reira, o nga kokoru ano hoki, a taka noa; e rima tekau nga whatianga tona roa, e rua tekau ma rima nga whatianga te whanui.
- 34
- I anga ano ona kokoru ki to waho marae, he nikau ano kei ona pou i tenei taha, i tera taha; e waru ano nga kaupae o te pikitanga atu ki reira.
- 35
- I kawea ano ahau e ia ki te kuwaha ki te nota, whangangā ana e ia, rite tonu ki enei kua oti nei te whanganga;
- 36
- Ona ruma, ona pou, ona kokoru, me ona matapihi ano, a taka noa: e rima tekau nga whatianga te roa, e rua tekau ma rima whatianga te whanui.
- 37
- I anga ano ona pou ki to waho marae; he nikau ano kei ona pou i tenei taha, i tera taha: e waru ano nga kaupae o te pikitanga atu ki reira.
- 38
- Na, nga ruma, nga tapokoranga atu ano ki reira, kei nga pou o nga kuwaha, kei te wahi i horoia ai te tahunga tinana.
- 39
- Na, i te whakamahau o te kuwaha e rua nga tepu i tenei taha, e rua nga tepu i tera taha, hei patunga mo te tahunga tinana, mo te whakahere hara, mo te whakahere mo te he.
- 40
- I te taha ano ki waho e rua nga tepu i te wahi e piki atu ai te tangata ki te tapokoranga atu o te kuwaha ki te nota; e rua ano nga tepu i tera taha, i te whakamahau o te kuwaha.
- 41
- E wha nga tepu i tenei taha, e wha ano nga tepu i tera taha, i te taha o te kuwaha; e waru nga tepu i patua ai nga patunga tapu.
- 42
- Na, he kohatu tarai nga tepu e wha mo te tahunga tinana, kotahi te whatianga me te hawhe te roa, kotahi ano whatianga me te hawhe te whanui, kotahi whatianga te tiketike: i whakatakotoria e ratou ki runga ki enei nga mea i patua ai e ratou, te tahunga tinana me te patunga tapu.
- 43
- Kua oti ano hoki etahi matau te whakanoho ki te taha ki roto, a taka noa, kotahi ringaringa te whanui: a i runga i nga tepu te kikokiko o te whakahere.
- 44
- Na, i waho o to roto kuwaha ko nga ruma o nga kai waiata i to roto marae, ara, i tera i te taha o te kuwaha ki te nota. I anga ano hoki aua ruma ki te taha ki te tonga: i anga ano whaka-te-nota tetahi i te taha o te kuwaha ki te rawhiti.
- 45
- Na, ko tona meatanga mai ki a au, Tenei ruma e anga nei ki te tonga, mo nga tohunga, mo nga kai tiaki o nga mea o te whare.
- 46
- Na, te ruma e anga nei ki te nota, mo nga tohunga, mo nga kai tiaki o nga mea o te aata: ko nga tamariki enei a Haroko i roto i nga tamariki a Riwai, e whakatata mai ana ki a Ihowa ki te minita ki a ia.
- 47
- Katahi ka whangangā e ia te marae, kotahi rau nga whatianga te roa, kotahi rau nga whatianga te whanui, e wha nga taha; me te aata ano i mua i te whare.
- 48
- Katahi ahau ka kawea e ia ki te whakamahau o te whare: kei te whanganga ia i tenei pou, i tenei pou o te whakamahau, e rima nga whatianga i tenei taha, e rima nga whatianga i tera taha: na, te whanui o te kuwaha, e toru nga whatianga i tenei taha, e toru nga whatianga i tera taha.
- 49
- Te roa o te whakamahau e rua tekau nga whatianga; te whanui kotahi tekau ma tahi nga whatianga; i kawea atu ano ahau e ia na nga kaupae i pikitia atu ai a reira: a he pou ke ano era i te taha o era pou, tetahi i tenei taha, tetahi i tenei taha.
Address: 
Phone: 
Email: