- 1
- Muri iho ka kawea ahau e ia ki te temepara; kei te whanganga i nga pou, e ono nga whatianga te whanui i tetahi taha, a e ono nga whatianga te whanui i tetahi taha, ko te whanui ia o te tapenakara.
- 2
- Na, te whanui o te tatau, kotahi tekau nga whatianga, a nga taha o te tatau, e rima nga whatianga i tetahi taha, e rima nga whatianga i tetahi taha; i whangangā ano e ia to reira roa, e wha tekau nga whatianga; te whanui e rua tekau nga whatianga.
- 3
- Katahi ia ka haere ki roto, kei te whanganga i te pou o te tatau, e rua nga whatianga; te tatau, e ono nga whatianga; te whanui o te tatau e whitu nga whatianga.
- 4
- Heoi whangangā ana e ia to reira roa, e rua tekau nga whatianga te whanui, e rua tekau nga whatianga i mua i te temepara. Na ko tana meatanga mai ki a au, Ko te wahi tino tapu tenei.
- 5
- Muri iho ka whangangā e ia te taha o te whare, e ono nga whatianga; me te whanui ano o nga ruma i te taha, e wha nga whatianga, i nga taha o te whare, a taka noa, taka noa.
- 6
- Na, nga ruma i te taha, e toru, tetahi i runga i tetahi, e toru tekau ki te rarangi, i ngoto ano hoki ratou ki roto ki te pakitara, ki to te whare, hei ruma mo nga taha, a taka noa, kia u ai; kahore ia he ūnga i te pakitara o te whare.
- 7
- Na, ka nui haere, a whawhe noa whakarunga ki nga ruma o te taha; i haere tonu hoki whakarunga te karapotinga o te whare, a taka noa, taka noa: no reira haere tonu te whanui o te whare whakarunga, nui haere atu ana i to raro rawa tae noa ki to runga, ki to waenga.
- 8
- I kite ano ahau i te tiketike o te whare, a whawhe noa: nga turanga o nga ruma, kotahi tino kakaho e ono nei ona whatianga nui.
- 9
- Te matotoru o te pakitara, o tera mo te ruma i waho, e rima nga whatianga; a te wahi i mahue, ko to nga ruma, ko to era i roto.
- 10
- Na, he takiwa kei waenganui i nga ruma, e rua tekau nga whatianga, i nga taha katoa o te whare, a taka noa.
- 11
- A i anga nga tatau o nga ruma ki te wahi i mahue, tetahi tatau ki te nota, tetahi tatau ki te tonga: a, te whanui o te wahi i mahue e rima nga whatianga, a tawhio noa.
- 12
- Na, te whare i mua i te wahi motuhake i te pito ki te hauauru, e whitu tekau nga whatianga te whanui: a e rima nga whatianga te matotoru o te taha o taua whare a tawhio noa; tona roa e iwa tekau nga whatianga.
- 13
- Na, ka whangangā e ia te whare, kotahi rau nga whatianga te roa; te wahi motuhake ano hoki, me taua whare ano, me ona taha ano, kotahi rau whatianga te roa;
- 14
- Me te whanui ano o te aronga o te whare, o te wahi motuhake ano hoki whaka-te-rawhiti, kotahi rau nga whatianga.
- 15
- I whangangā ano e ia te roa o te whare i te ritenga mai o te wahi motuhake; i muri hoki tera i tenei, me ona huarahi ano i tetahi taha, i tetahi taha, kotahi rau nga whatianga, me te temepara ano i roto, me nga whakamahau ano o te marae;
- 16
- Nga pou tatau, nga matapihi kuiti, me nga huarahi ano i o ratou whakapaparanga e toru, a taka noa i te ritenga atu o te tatau, he mea paparua ki te rakau, a taka noa, he mea mea atu ano i te whenua tae noa ki nga matapihi; he mea hipoki ano hoki nga matapihi;
- 17
- Tae noa ki to runga ake i te tatau, ki te whare i roto, ki to waho, i te taha katoa, a tawhio noa, i roto, i waho, he mea whanganga.
- 18
- I mahia ano hoki ki reira nga kerupima me nga nikau, he nikau i te takiwa o tetahi kerupa, o tetahi kerupa; a, e rua nga mata o te kerupa kotahi.
- 19
- I anga te mata tangata ki te nikau i tetahi taha, te mata ano o te raiona ki te nikau i tetahi atu taha, i mahia tera puta noa i te whare, a tawhio noa.
- 20
- I te whenua, a tae noa ki runga ake i te tatau te timatanga atu o nga kerupima, o nga nikau i hangā ra, i te taha ano hoki o te temepara.
- 21
- He taha-wha nga pou o te temepara, me te aronga mai ano o te wahi tapu; te ahua o tetahi rite tonu ki te ahua o tetahi.
- 22
- E toru nga whatianga, te tiketike o te aata rakau, tona roa e rua nga whatianga, na, ona koki, tona roa, ona taha, he rakau. Na, ko tana kianga mai ki au, Ko te tepu tenei i te aroaro o Ihowa.
- 23
- A, e rua nga tatau o te temepara o te wahi tapu.
- 24
- E rua ano nga taha o nga tatau, he mea huri aua taha e rua; e rua nga taha o tetahi tatau, e rua ano nga taha o tetahi tatau.
- 25
- I mahia ano hoki ki aua tatau o te temepara etahi kerupima me etahi nikau, he mea e rite tonu ana ki era i mahia ki nga taha; he papa matotoru ano era i te aronga o te whakamahau i te taha ki waho.
- 26
- He matapihi kuiti ano era, he nikau i tetahi taha, i tetahi taha, i nga taha o te whakamahau, i nga ruma ano o te taha o te whare, i nga papa matotoru ano hoki.
Address: 
Phone: 
Email: