- 1
- Katahi ahau ka kawea e ia ki to waho marae, ki te ara ki te nota, kawea ana ahau e ia ki te ruma i te ritenga atu o te wahi motuhake, ki tera i te aronga mai o te whare e anga ana ki te nota.
- 2
- I te ritenga atu o nga whatianga kotahi rau ko te tatau ki te nota, e rima tekau whatianga te whanui.
- 3
- I te ritenga atu o nga whatianga e rua tekau o to roto marae, i te ritenga atu ano o te whariki kohatu i to waho marae, ko tetahi huarahi e anga mai ana ki tetahi huarahi, e toru nga whakapaparanga.
- 4
- Na, i mua i nga ruma ko tetahi wahi haereerenga kotahi tekau nga whatianga, he mea e anga ana whakaroto, kotahi te whatianga o te ara; i anga o raua tatau ki te nota.
- 5
- Na, he poto nga ruma o runga: i tiketike ake hoki nga huarahi i enei, i o raro, i o waenganui ano hoki o te whare.
- 6
- E toru hoki o ratou whakapaparanga, kahore ia o ratou pou pera me nga pou o nga marae: no reira i kuiti ai i o raro, i o waenganui, i te mea ka anga ake i te whenua.
- 7
- Na, te taha i waho e anga mai ana ki nga ruma, ki to waho marae i te taha ki mua o nga ruma, tona roa e rima tekau nga whatianga.
- 8
- E rima tekau hoki nga whatianga te roa o nga ruma i to waho marae: na, i mua i te temepara kotahi rau nga whatianga.
- 9
- I raro ano i enei ruma te tapokoranga atu i te rawhiti, i te mea ka tapoko atu te tangata i to waho marae.
- 10
- Nga ruma, no te matotorutanga o te taha o te marae i te taha ki te rawhiti i te ritenga atu o te wahi whakamotuhake, i te ritenga ake ano o te whare.
- 11
- Na, te ara i mua i a ratou, rite tonu te ahua ki to nga ruma i anga ki te nota, rite tonu te roa, rite tonu te whanui: o ratou putanga atu ano hoki rite tonu ki o ratou tikanga, rite tonu ki o ratou tatau.
- 12
- Rite tonu ano hoki ki nga tatau o nga ruma e anga ana ki te tonga te tatau i te ahunga mai o te ara, o te ara i mua tonu i te taiepa i te taha ki te rawhiti i te mea ka tomo tetahi ki roto.
- 13
- Na, ko tana meatanga mai ki a au, Nga ruma ki te nota, nga ruma ki te tonga i mua i te wahi motuhake, he ruma tapu ena, ka kainga nga mea tapu rawa ki reira e nga tohunga e whakatata mai ana ki a Ihowa: me waiho ano e ratou i reira nga mea tapu rawa, me te whakahere toto-kore ano hoki, me te whakahere hara ano, me te whakahere ano mo te he: he tapu hoki taua wahi.
- 14
- Ka tae nga tohunga ki roto, kaua ratou e haere atu i roto i te wahi tapu ki to waho marae; engari me waiho e ratou ki reira o ratou kakahu e minita ai ratou, he tapu hoki; me kakahu ano e ratou etahi atu kakahu, ka whakatata mai ai ratou ki nga mea ma te iwi.
- 15
- Na, ka mutu tana whanganga i to roto whare, ka kawea atu ahau e ia ki te kuwaha e anga ana ki te rawhiti, whanganga ana e ia i tetahi taha, i tetahi taha.
- 16
- I whangangā e ia ki te kakaho whanganga te taha ki te rawhiti, e rima rau nga kakaho, he mea mea ki te kakaho whanganga i tetahi taha, i tetahi taha.
- 17
- I whangangā e ia te taha ki te nota, e rima rau nga kakaho, he mea mea ki te kakaho whanganga, i tetahi taha i tetahi taha.
- 18
- I whangangā e ia te taha ki te tonga e rima rau nga kakaho, he mea mea ki te kakaho whanganga.
- 19
- I tahuri atu ia ki te taha ki te hauauru, whangangā ana e ia, e rima rau nga kakaho, he mea mea ki te kakaho whanganga.
- 20
- Whangangā ana a reira e ia i nga taha e wha: he taiepa tona, a tawhio noa, e rima rau nga kakaho te roa, e rima rau te whanui, hei wehe atu i te wahi tapu i te wahi noa.
Address: 
Phone: 
Email: