- 1
- Na, kua taka mai te whitu o nga marama, a kei nga pa ano nga tamariki a Iharaira, na, me te mea he tangata kotahi te iwi ki te huihui mai ki Hiruharama.
- 2
- Na, ko te turanga ki runga o Hehua tama a Iohereke, ratou ko ona teina ko nga tohunga, ko Terupapere ano hoki tama a Hearatiere, me ona teina, a, hangā ana e ratou te aata o te Atua o Iharaiara, hei whakaekenga atu mo nga tahunga tinana, kia rite ai ki te mea i tuhituhia ki te ture a Mohi, a ta te Atua tangata.
- 3
- Na, whakaturia ana e ratou te aata ki tona turanga, no te mea i wehi ratou i nga tangata o aua whenua. Whakaekea atu ana hoki e ratou ki runga nga tahunga tinana ki a Ihowa, nga tahunga tinana o te ata, o te ahiahi.
- 4
- I whakaritea ano hoki e ratou te hakari tihokahoka, tera i tuhituhia ra; i whakaeke ano i nga tahunga tinana o tenei ra, o tenei ra, rite tonu te maha, rite tonu nga tikanga, ko nga mea ano mo tenei ra i tenei ra.
- 5
- A, muri iho ko nga tahunga tinana tūturu, ko o nga kowhititanga marama, ko o nga wa katoa i whakaritea e Ihowa, he mea whakatapu nana, me a te hunga katoa i whakahere noa mai i te whakahere ki a Ihowa.
- 6
- No te ra tuatahi o te whitu o nga marama i timata ai ratou te whakaeke nga tahunga tinana ki a Ihowa. Kahore ano ia te turanga mo te temepara o Ihowa kia takoto noa.
- 7
- Na, ka homai e ratou he hiriwa ki nga kai mahi kohatu, ki nga kamura, me etahi mea hei kai, hei inu, me te hinu ma nga Haironi, ma nga Tairani, hei mea mo etahi rakau hita kia kawea mai i Repanona ki te moana ki Hopa, kia rite ai ki te kupu homai a Hairuha kingi o Pahia ki a ratou.
- 8
- Na, i te rua o nga tau o to ratou taenga mai ki te whare o te Atua ki Hiruharama, i te rua o nga marama, ka timata a Terupapere tama a Hearatiere, ratou ko Hehua tama a Iohereke, ko era atu ano hoki o o ratou teina, o nga tohunga, o nga Riwaiti, me te hunga katoa i haere mai i roto i te whakaraunga ki Hiruharama. I whakaritea ano e raua nga Riwaiti, te hunga e rua tekau, he maha atu ranei, o ratou tau, hei whakahohoro i te mahinga o te whare o Ihowa.
- 9
- I tu ano hoki a Hehua, ratou ko ana tama, ko ona teina, a Karamiere ratou ko ana tama, ko nga tama ano a Hura, ano kotahi tonu tangata ratou, hei whakahohoro i nga kai mahi o te whare o te Atua: nga tama a Henarara, ratou ko a ratou tama, ko o ratou teina ko nga Riwaiti.
- 10
- Na, i te whakatakotoranga a nga kai mahi te turanga temepara o Ihowa, ka whakaturia e ratou nga tohunga, kakahu rawa nga kakahu, he tētere ano kei a ratou, me nga Riwaiti ano hoki nga tama a Ahapa e mau himipora ana, hei whakamoemiti mo Ihowa, hei pera ano me ta Rawiri kingi o Iharaira i whakarite ai.
- 11
- Na, ka waiata ratou, ka whakamoemiti, ka whakawhetai atu ki a Ihowa, no te mea e pai ana ia, a, e mau tonu ana tana mahi tohu ki a Iharaira. Na, hamama katoa ana te iwi, he nui te hamamatanga; ka whakamoemiti atu ki a Ihowa, no te mea ka whakatakotoria nei te turanga o te whare o Ihowa.
- 12
- Na, he tokomaha o nga tohunga, ratou ko nga Riwaiti, ko nga upoko o nga mātua, he koroheke nei ratou, a i kite ano i te whare tuatahi; te hanganga o te turanga mo tenei whare ki to ratou aroaro, tangi ana ratou, he nui te reo; he rahi ano ia te reo o etahi, he tokomaha, ki te hamama i te koa.
- 13
- Na kihai te reo o te hamama koa i taea e te iwi te wehe i roto i te reo o te iwi e tangi ana: he nui hoki te hamamatanga i hamama ai te iwi, a ka rangona mai te reo i tawhiti.
Address: 
Phone: 
Email: