- 1
- Na, te rongonga o nga hoa riri o Hura raua ko Peniamine e hangā ana e te hunga i whakaraua atu nei te temepara o Ihowa Atua o Iharaira.
- 2
- Na, ko to ratou haerenga mai ki a Terupapere, ki nga upoko ano hoki o nga mātua, ka mea ki a ratou, Kia hanga tahi tatou; e rapu ana hoki matou i to koutou Atua, e pena ana me koutou; he patu whakahere tonu hoki matou ki a ia, no nga rangi ano o Etara-harono, o te kingi o Ahiria, i kawea mai ai matou ki konei.
- 3
- Katahi a Terupapere, ratou ko Hehua, ko era atu o nga upoko o nga matua o Iharaira ka mea ki a ratou, Kahore he ahatanga a koutou ki a matou e hangā ai e koutou te whare mo to matou Atua, engari ma matou tahi e hanga, hei mea ki a Ihowa Atua o Iharaira; kia rite ai ki ta Kingi Hairuha, ki ta te kingi o Pahia, i whakahau mai ai ki a matou.
- 4
- Na, ka whakawarea nga ringa o te iwi o Hura e te iwi o te whenua, whakararurarua ana ratou kei hanga ratou.
- 5
- I utua ano e ratou etahi kai whakapuaki korero hei whakakahore mo ta ratou whakaaro i nga ra katoa a Hairuha kingi o Pahia, a tae noa ki te kingitanga o Tariuha kingi o Pahia.
- 6
- I te kingitanga ano hoki o Ahahueruha, i te timatanga o tona kingitanga, ka tuhituhia atu e ratou he kupu whakahe mo nga tangata o Hura, o Hiruharama.
- 7
- I nga ra ano hoki o Arataherehe ka tuhituhi atu a Pihirama, a Mitirerata, a Tapeere ratou ko era atu o o ratou hoa ki a Arataherehe kingi o Pahia. Na, te tuhituhinga o te pukapuka, no Hiria nga reta; no Hiria ano hoki te whakamaoritanga.
- 8
- Na Rehumu na te kai tiaki o nga ture raua ko Himihai ko te kai tuhituhi i tuhituhi atu te pukapuka whakahe mo Hiruharama ki a Arataherehe ki te kingi, koia tenei.
- 9
- Na, kei te tuhituhi a Rehumu te kai tiaki ture, a Himihai te kai tuhituhi, ratou ko era atu o o ratou hoa, nga Rinai, nga Aparahataki, nga Taraperi, nga Aparahi, nga Arakewi; nga tangata o Papurona, nga Huhanaki, nga Rehawi, nga Erami,
- 10
- Me era atu ano o nga iwi i whakahekea mai e Ahanapere e taua tangata nui, ingoa nui, a whakanohoia ana e ia ki nga pa o Hamaria, me era atu ano i tenei taha o te awa, i taua wa nei ano.
- 11
- Ko nga kupu tenei o te pukapuka i tukua atu e ratou ki a ia, ara, ki a Kingi Arataherehe, Na o pononga na nga tangata i tenei taha o te awa, i taua wa nei ano.
- 12
- Kia mohiotia tenei e te kingi, ko nga Hurai i haere mai i tou taha ki a matou, kua tae ki Hiruharama, kei te hanga ratou i taua pa tutu, kino; kua whakaturia e ratou nga taiepa, kua oti ano hoki nga turanga te honohono.
- 13
- Na, kia mohiotia tenei e te kingi, ki te hangā tenei pa, ki te whakaturia ano te taiepa, e kore e homai e ratou nga takoha taonga, nga takoha tangata, nga takoha huarahi: penei ka hē i a koe nga moni a nga kingi.
- 14
- Na, no te whare o te kingi ta matou kai, e kore ano hoki e tika kia titiro atu matou ki te kingi e whakaititia ana, koia matou ka unga tangata atu nei kia mohio ai te kingi.
- 15
- Kia rapu ai tetahi i roto i te pukapuka whakamahara a ou mātua, kia kite ai koe i roto i te pukapuka whakamahara, kia mohio ai, he pa tutu tenei pa, e he ana ki nga kingi, ki nga whenua, he whakaoho whakakeke ta ratou i reira i mua: ko te mea ano tenei i whakangaromia ai tenei pa.
- 16
- Me whakaatu tenei e matou ki te kingi, ara, Ki te hangā tenei pa, a ka whakaturia ona taiepa, na, kahore he wahi mou i tenei taha o te awa.
- 17
- Na, ka tukua mai he kupu e te kingi ki a Rehumu ki te kai tiaki ture, ratou ko Himihai ko te kai tuhituhi, ko era atu ano o o raua hoa e noho ana i Hamaria, ki era atu ano hoki i tenei taha o te awa, Kia ora, i taua wa nei ano hoki.
- 18
- Kua ata korerotia ki toku aroaro te pukapuka i tukua mai e koutou ki a matou.
- 19
- Na, kua whakahau nei ahau, a kua rapua, kua kitea he pa whakakeke tena i mua ki nga kingi; he mahi tutu, he mahi whakakeke ta reira.
- 20
- He nui ano hoki nga kingi o Hiruharama i kingi ki nga whenua katoa i tena taha o te awa; i hoatu ano hoki nga takoha taonga, nga takoha tangata, nga takoha huarahi ki a ratou.
- 21
- Na, kiia e korua kia whakamutua te mahi a ena tangata, kia kaua hoki tena pa e hangā, kia hoatu ra ano e ahau tetahi atu ture.
- 22
- Na, kia tupato kei mangere korua ki tenei mea: me tuku koia te he kia tupu hei he mo nga kingi?
- 23
- Heoi, te korerotanga o nga kupu o te pukapuka a Kingi Arataherehe ki te aroaro o Rehumu, o Himihai kai tuhituhi, ratou ko o ratou hoa, hohoro tonu atu ratou ki Hiruharama ki nga Hurai, na, uaua tonu te ringa i whakamutua ai ta ratou.
- 24
- Na, kua mutu te mahi o te whare o te Atua i Hiruharama. Mutu ake, a taea noatia te rua o nga tau o te kingitanga o Tariuha kingi o Pahia.
Address: 
Phone: 
Email: