- 1
- A, ka oti enei mea, ka haere mai nga rangatira ki a au, ka mea, Kihai te iwi o Iharaira, ratou ko nga tohunga, ko nga Riwaiti, i momotu mai i a ratou i roto i nga iwi o nga whenua; rite tonu ta ratou ki nga mea whakarihariha a era, a nga Kanaani, a nga Hiti, a nga Perihi, a nga Iepuhi, a nga Amoni, a nga Moapi, a nga Ihipiana, nga Amori.
- 2
- Kua tangohia hoki e ratou etahi o a ratou tamahine ma ratou, ma a ratou tamariki. Na, kua whakawhenumitia te momo tapu ki roto ki nga iwi o aua whenua. Nui noa ake te ringaringa o nga rangatira, o nga tino tangata, ki tenei he.
- 3
- Na, taku rongonga i tenei, haea ana e ahau toku kakahu me toku koroka, hutihutia ana e ahau nga huruhuru o toku mātenga, o oku pahau, a noho ana, miharo ana.
- 4
- Katahi ka huihui mai ki a au te hunga katoa i wehi i nga meatanga a te Atua o Iharaira, he mea mo te he a te hunga i whakaraua atu: i te noho hoki ahau, miharo tonu, a taea noatia to te ahiahi whakahere.
- 5
- Na, i to te ahiahi whakahere ka ara ake ahau i toku pouritanga; haea iho ano e ahau toku kakahu me toku koroka, piko iho ana ahau i runga i oku turi, whewhera tonu oku ringa ki a Ihowa ki toku Atua.
- 6
- Na, ko taku meatanga atu, E toku Atua, E whakama ana ahau, numinumi kau ana ahau, tē ara atu ai toku mata ki a koe, e toku Atua. Kua tetere rawa hoki o matou he ki runga ake i o matou mahunga; nui atu to matou pokanga ketanga, a tutuki noa ki te rangi.
- 7
- Nui atu to matou pokanga ketanga, no nga rangi ra ano o o matou mātua, a taea noatia tenei ra: na o matou he ano hoki i hoatu ai matou, o matou kingi, o matou tohunga, ki te ringaringa o nga kingi o nga whenua, ki te hoari, ki te whakaraunga, hei pahuatanga, a whakama iho te mata, koia ano tenei inaianei.
- 8
- Na, he iti nei tenei wahi i whakaputaina mai ai he atawhai e Ihowa e to matou Atua, kia toe ai etahi morehu o matou; kia homai ai ki a matou he titi ki tona wahi tapu, kia whakamāramatia ai o matou kanohi e to matou Atua, kia homai ai ano hoki ki a matou he oranga ngakau, he mea iti nei, i a matou nei i te herehere.
- 9
- He pononga hoki matou; heoi i a matou nei i te herehere kihai matou i mahue i to matou Atua: na, whakaputaina mai ana e ia he aroha ki a matou i te aroaro o nga kingi o Pahia, i homai ai he oranga ngakau ki a matou, i whakaarahia ai te whare o to matou Atua, i hangā ai ona wahi kua ururuatia, i homai ai he taiepa ki a matou ki Hura, ki Hiruharama.
- 10
- Na, kia pehea he kupu ma matou, e to matou Atua, i muri i tenei? kua whakarerea hoki e matou au whakahaunga,
- 11
- I whakahaua mai e koe, he mea whakapuaki na o pononga, na nga poropiti: i ki mai hoki koe, Te whenua ka haere atu nei koutou ki reira tango ai, he whenua poke tera i nga poke o nga iwi o nga whenua, i ā ratou mea whakarihariha, i ki ai ia wahi, ia wahi, i to ratou poke.
- 12
- Na, kaua a koutou tamahine e hoatu ma a ratou tamariki, kaua ano hoki a ratou tamahine e tangohia mai ma a koutou tamariki; kaua ano hoki e whai kia mau te rongo ki a ratou, kia whai pai ranei ratou, a, ake ake ake; kia kaha ai koutou, kia kai ai hoki koutou i nga mea pai o te whenua, a, waiho iho hei kāinga mo a koutou tamariki, ake tonu atu.
- 13
- Na, kua pa mai enei mea katoa ki a matou mo a matou mahi he, mo te nui o to matou pokanga ketanga; he iti iho na hoki i o matou hē au whiu, e te Atua, i a matou, a, homai ana e koe tenei whakaoranga ki a matou.
- 14
- Ki te anga matou ki te takahi i o tikanga, ki te marenatia ki nga iwi nana enei mea whakarihariha, e kore ianei koe e riri ki a matou, a, poto noa matou, kore noa he morehu, he oranga?
- 15
- E Ihowa, e te Atua o Iharaira, e tika ana tau; e toe nei hoki matou, he oranga, koia ano tenei inaianei. Nana, tenei matou kei tou aroaro, me o matou he ano hoki: na tenei hoki matou tē tu ai ki tou aroaro.
Address: 
Phone: 
Email: