- 1
- Na Paora, na te Apotoro, (kihai nei i tonoa e te tangata, kihai ano hoki i meinga e te tangata, engari e Ihu Karaiti, e te Atua Matua ano hoki, nāna nei ia i whakaara i te mate;)
- 2
- Na nga teina katoa hoki i a au nei, ki nga hahi o Karatia:
- 3
- Kia tau ki a koutou te aroha noa me te rangimarie, he mea na te Atua Matua, na to tatou Ariki hoki na Ihu Karaiti,
- 4
- I tuku nei i a ia ano mo o tatou hara, kia whakaorangia ai tatou e ia i tenei ao kino, i runga i ta te Atua i ta to tatou Matua i pai ai:
- 5
- Waiho atu i a ia te kororia ake ake ake. Amine.
- 6
- Miharo tonu ahau ki te hohoro o to koutou nekehanga ketanga atu i te kai karanga o koutou ki te aroha noa o te Karaiti, na kei tetahi atu rongo pai na koutou:
- 7
- Ehara nei ia i te mea ke atu; engari he hunga tena e whakararuraru ana i a koutou, e mea ana kia whakaputaia ketia te rongo pai o te Karaiti.
- 8
- Na, ahakoa ko matou, ko tetahi anahera ranei o te rangi, ki te kauwhau i te rongo pai ki a koutou a ka puta ke i ta matou i kauwhau ai ki a koutou, kia kangā ia.
- 9
- Kia rite ki ta matou i ki ai i mua, a ka kiia nei ano e ahau inaianei, ki te puta ke te kauwhau a tetahi ki a koutou i tera kua riro i a koutou, kia kangā ia.
- 10
- He tangata ranei, ko te Atua ranei, taku e kukume nei? he tāngata ranei aku e whai nei kia whakamanawarekatia? me he mea kei runga nei au i te whakamanawareka tangata, ehara ahau i te pononga na te Karaiti.
- 11
- Na, kia mohio mai koutou, e oku teina, te rongo pai i kauwhautia e ahau ehara i te mea na te tangata.
- 12
- He teka hoki na te tangata i riro mai ai i ahau, nāna ranei i whakaako ki a au, engari na te whakakitenga mai a Ihu Karaiti.
- 13
- Kua rongo na hoki koutou ki taku whakahaere i mua i runga i ta nga Hurai tikanga, nui atu taku whakatoi, taku whakangarongaro, i te hahi a te Atua:
- 14
- A i ta nga Hurai tikanga i pahika noa atu ahau ki mua atu i te tokomaha o oku hoa o toku iwi, hira noa atu toku ngakau ki nga whakarerenga iho a oku mātua.
- 15
- Otira i te mea ka pai te Atua, nāna nei ahau i momotu mai i roto ra ano i te kopu o toku whaea, i karanga hoki, he meatanga na tona aroha noa,
- 16
- Ki te whakakite i tana Tama i roto i a au, kia kauwhautia ai ia e ahau ki nga tauiwi; i reira tonu iho kihai ahau i korerorero ki te kikokiko ki te toto:
- 17
- Kihai ano hoki ahau i haere atu ki Hiruharama ki te hunga i apotorotia i mua i a au; heoi haere ana ahau ki Arapia, a hoki ano ki Ramahiku.
- 18
- A muri iho i te takanga o nga tau e toru ka haere atu ahau ki Hiruharama kia kite i a Pita, a tekau ma rima nga ra i noho ai ahau ki a ia.
- 19
- Kihai ano ahau i kite i tetahi atu o nga apotoro, ko Hemi anake ko te teina o te Ariki.
- 20
- Na, nga mea a tuhituhia atu nei e ahau ki a koutou, nana, kei te aroaro tenei o te Atua, kahore aku teka.
- 21
- Muri iho ka haere atu ahau ki nga wahi o Hiria o Kirikia;
- 22
- Kihai ano hoki toku mata i mohiotia e nga hahi o Huria i roto i a te Karaiti:
- 23
- I rongo kau ratou, Te kai whakatoi o matou i mua, e kauwhautia ana e ia inaianei te whakapono, i whakangarongaromia e ia i mua.
- 24
- A whakakororia ana ratou i te Atua mo tana ki a au.
Address: 
Phone: 
Email: