- 1
- Muri iho, ka tekau ma wha nga tau, ka haere atu ano maua ko Panapa ki Hiruharama, me te kawe ano ahau i a Taituha hei hoa moku.
- 2
- A na te whakakitenga mai ahau i haere atu ai, a whakapuakina ana e ahau ki a ratou te rongo pai e kauwhautia nei e ahau ki nga tauiwi; otiia i meatia pukutia ki te hunga whai ingoa, kei maumau kau taku oma o naianei, o mua ranei.
- 3
- Na, kihai a Taituha taku hoa, he Kariki hoki ia, i meinga kia kotia:
- 4
- Mo nga teina teka hoki i whakaurua pukutia mai, i haere puku mai nei ki te tirotiro i to matou herekoretanga i roto i a Karaiti Ihu, kia whakataurekareka ai ratou i a matou.
- 5
- Kihai ano matou i whakangawari iho, i rongo ki a ratou, ahakoa kotahi haora; he mea kia mau ai te pono o te rongo pai ki a koutou.
- 6
- Na, te hunga i whai ingoa, (ahakoa he aha ranei ratou, hei aha maku? kahore a te Atua whakapai ki te kanohi tangata:) kihai hoki te hunga whai ingoa i whakaatu mea mai ki a au:
- 7
- Engari to ratou kitenga kua tukua mai ki a au te rongo pai ki te kotinga kore, pera hoki me tera ki te kotinga kua tukua ki a Pita;
- 8
- (Te kai mahi hoki i roto i a Pita hei apotoro ki te kotinga, mahi ana ano ia i roto i a au ki nga tauiwi:)
- 9
- Heoi ka mātau a Hemi, a Kipa, a Hoani, i meinga nei hei pou, ki te aroha noa kua homai ki a au, ka homai e ratou nga ringaringa matau hei whakahoatanga ki a maua ko Panapa, mo maua kia haere ki nga tauiwi, ko ratou ia ki te kotinga:
- 10
- Otiia me mahara maua ki te hunga rawa-kore; he mea ano tena i hihiko noa ai ahau.
- 11
- A ka tae a Pita ki Anatioka, ka whakatika atu ahau ki a ia he kanohi he kanohi, no te mea kua tika kia whakahengia ia.
- 12
- I mua hoki o te taenga mai o etahi i a Hemi, e kai tahi ana ia me nga tauiwi: na, to ratou taenga mai, neke atu ana ia, momotu ke ana i a ia, i mataku hoki ki te hunga o te kotinga.
- 13
- A i uru atu ano era atu Hurai ki tana tinihanga; heoi riro pu ana a Panapa i to ratou tinihanga.
- 14
- Heoi toku kitenga kihai ratou i haere tika i runga i te pono o te rongo pai, ka mea atu ahau ki a Pita i te aroaro o te katoa, Ki te mea ko koe, he Hurai, ka whakatauiwi, a kahore e whakahurai, he aha koe ka mea ai i nga tauiwi kia whakahurai?
- 15
- Tatou, nga Hurai tupu nei, ehara nei i te hunga hara no nga tauiwi,
- 16
- A kua mohio nei ehara nga mahi a te ture i te mea e tika ai te tangata, engari ko te whakapono ki a Ihu Karaiti, na, kua whakapono nei tatou ki a Ihu Karaiti, kia ai te whakapono ki a te Karaiti hei tika mo tatou, he teka ia nga mahi a te ture: no te mea hoki kahore rawa he kikokiko e tika i nga mahi o te ture.
- 17
- Na, i a tatou e whai nei kia whakatikaia i roto i a te Karaiti, ki te mau tatou nei ano he hunga hara, ko ta te Karaiti e minita ai he hara? Kahore rapea.
- 18
- Ki te mea hoki ka hangā ano e ahau nga mea i wahia e ahau, e whakakite ana ahau i a au ano he tangata hara.
- 19
- Na te ture hoki ahau i tupapaku ai ki te ture, kia ora ai ahau ki te Atua.
- 20
- Kua ripekatia tahitia ahau me te Karaiti: a e ora nei, ehara i te mea ko ahau, engari ko te Karaiti e ora ana i roto i a au: a ka ora nei au i roto i te kikokiko, he oranga na te whakapono ki te Tama a te Atua, i aroha mai nei ki a au, i tuku nei i a ia moku.
- 21
- Kahore aku whakakahore i te aroha noa o te Atua: me he mea hoki i na runga mai te tika i te ture, maumau mate noa a te Karaiti.
Address: 
Phone: 
Email: