- 1
- A i te mea ka iwa tekau ma iwa nga tau o Aperama, na ka puta mai a Ihowa ki a Aperama, a ka mea ki a ia, Ko au te Atua kaha rawa; haereere koe i taku aroaro, kia tapatahi hoki te whakaaro.
- 2
- A ka waiho ano e ahau taku kawenata ki waenganui i a taua, a ka tino whakanui rawa ahau i a koe.
- 3
- Na, ka kupapa te kanohi o Aperama ki raro: a ka korero mai te Atua ki a ia, ka mea,
- 4
- Ko au tenei, na, kei a koe taku kawenata, a ka waiho koe hei matua mo nga iwi maha.
- 5
- E kore ano hoki tou ingoa e karangatia a muri ake nei ko Aperama, engari ko Aperahama te ingoa mou; no te mea ka meinga koe e ahau hei matua mo nga iwi maha.
- 6
- A ka meinga ano koe e ahau kia tino hua rawa, ka meinga ano hoki koe e ahau hei take mo nga iwi, a ka puta mai nga kingi i roto i a koe.
- 7
- A ka whakapumautia e ahau taku kawenata ki te takiwa oku, o koutou hoki ko ou uri i muri i a koe, o tera whakatu-puranga o tera whakatupuranga o ratou, hei kawenata mau tonu, a hei Atua ahau mou, mo ou uri hoki i muri i a koe.
- 8
- A ka hoatu ano e ahau ki a koe, ki ou uri hoki i muri i a koe, te whenua e noho manene na koe, te whenua katoa o Kanaana, hei kāinga pumau; a hei Atua ano ahau mo ratou.
- 9
- A ka mea mai ano te Atua ki Aperahama, Ina, me whakarite e koe taku kawenata, e koutou ko tou uri i muri i a koe, e tera whakatupuranga e tera whakatupuranga o ratou.
- 10
- Ko taku kawenata tenei hei whakaritenga ma koutou, i te takiwa oku o koutou ko ou uri i muri i a koe; Me kokoti o koutou tane katoa.
- 11
- Me kokoti hoki e koutou to koutou kiri matamata; a ka waiho hei tohu mo te kawenata i te takiwa oku o koutou.
- 12
- Me kokoti e koutou nga tamariki ina waru nga ra, nga tane katoa o tena whakatupuranga o tena whakatupuranga o koutou, nga mea i whanau i roto i te whare, i hokona ranei ki te moni i tetahi tangata ke, ehara nei i te uri nou.
- 13
- Ina, me kokoti te tangata i whanau i roto i tou whare, i hokona ranei ki to moni, a ka mau taku kawenata ki o koutou kikokiko, hei kawenata mau tonu.
- 14
- A te tane kihai i kotia, kihai nei i kotia tona kiri matamata, ka hautopea atu tena wairua i roto i tona iwi; kua whakataka e ia taku kawenata.
- 15
- A i mea mai ano te Atua ki a Aperahama, Ko Harai ko to wahine, kaua e karangatia tona ingoa ko Harai, engari ko Hara hei ingoa mona.
- 16
- A ka manaaki ahau i a ia, ka hoatu ano hoki i tetahi tamaiti ki a koe i roto i a ia: ina, ka manaaki ahau i a ia, a hei whaea ia mo nga iwi; ka puta mai nga kingi mo nga iwi i roto i a ia.
- 17
- Na, ka kupapa te kanohi o Aperahama ki raro, a ka kata ia, ka mea hoki i roto i tona ngakau, Tera ranei e whanau tetahi tamaiti ma te tangata kua kotahi nei rau ona tau? a e whanau tamariki ranei a Hara, te wahine kua iwa tekau nei ona tau?
- 18
- Na, ka mea ake a Aperahama ki te Atua, E, kia ora a Ihimaera ki tou aroaro.
- 19
- Na, ka mea mai te Atua, Ina, ka whanau ta korua tamaiti ko Hara; a me hua e koe tona ingoa ko Ihaka: a ka whakapumau ano ahau i taku kawenata ki a ia, ki ona uri hoki i muri i a ia, hei kawenata mau tonu.
- 20
- A ko Ihimaera ra, kua whakarongo atu ahau ki a koe, Nana, kua oti ia te manaaki e ahau, a ka meinga ia e ahau kia hua, kia tino nui rawa hoki; ka whanau ana tamariki, kotahi tekau ma rua nga ariki, a ka meinga ia e ahau hei iwi nui.
- 21
- A, ka whakapumautia ano e ahau taku kawenata ki a Ihaka, ka whanau nei i a korua ko Hara i te taima e rite ana ki tenei o te tau e haere ake nei.
- 22
- Na, ka whakamutua tana korero ki a ia, a ka mawehe atu te Atua i a Aperahama ki runga.
- 23
- Katahi ka tango a Aperahama i a Ihimaera i tana tamaiti, ratou ko nga mea katoa i whanau i roto i tona whare, me nga mea katoa i hokona ki tana moni, nga tane katoa i roto i nga tangata o te whare o Aperahama; a kotia ana e ia to ratou kiri matamata i taua tino rangi ano, i pera ano me ta te Atua i korero mai ai ki a ia.
- 24
- A e iwa tekau ma iwa nga tau o Aperahama, i te kotinga o tona kiri matamata.
- 25
- A kotahi tekau ma toru nga tau o tana tamaiti o Ihimaera, i te kotinga o tona kiri matamata.
- 26
- No taua tino rangi ano i kotia ai a Aperahama, raua ko tana tamaiti ko Ihimaera.
- 27
- A i kotia ngatahitia ano hoki me ia nga tangata katoa o tona whare, nga mea i whanau i roto i te whare, i hokona ranei ki te moni i te tangata iwi ke.
Address: 
Phone: 
Email: