- 1
- A ka puta mai ano a Ihowa ki a ia kinga mania o Mamere: a i te kuwaha o te teneti ia e noho ana i te mahanatanga o te ra.
- 2
- A te anganga ake o ona kanohi, ka kite ia, na, tokotoru nga tangata e tu ana i tona taha: a, tona kitenga atu, na, ka rere atu ia i te kuwaha o te teneti, ki te whakatau i a ratou, a ka piko iho ki te whenua,
- 3
- A ka mea atu, E toku Ariki, ki te mea he pai toku ki tau titiro, kaua ra e kapea to pononga:
- 4
- Kia tikina ra tetahi wai hei horoi mo o koutou waewae, kia okioki ano hoki koutou i raro i te rakau:
- 5
- A me tiki e ahau tetahi wahi taro hei oranga mo o koutou ngakau; muri iho ka haere koutou: he mea hoki kua tae mai nei koutou ki ta koutou pononga. A ka mea mai ratou, Peratia, me tau i ki mai na.
- 6
- Na, ka hohoro atu a Aperahama ki te teneti ki a Hara, a ka mea atu, Kia hohoro te pokepoke i tetahi paraoa pai, kia toru nga mehua, ka hanga i etahi keke.
- 7
- Na, ka rere atu a Aperahama ki te kahui, a hopukia mai ana e ia tetahi kuao kau, he kiri ngawari, he mea pai, a hoatu ana ki tetahi taitamariki; a ka hohoro ia te taka i taua mea.
- 8
- Na, ka tikina e ia he pata, he waiu, me te kuao i raweketia e ia, a whakatakotoria ana ki to ratou aroaro; me te tu ano ia i to ratou taha i raro i te rakau, a ka kai ratou.
- 9
- Na, ka mea mai ratou ki a ia, Kei hea a Hara, to wahine? A ka mea ia, Ra, kei te teneti.
- 10
- Na, ka mea mai ia, Kei te wa o to te tangata oranga e rite ai, ka hoki mai ahau ki a koe; a ka whai tamaiti to wahine a Hara. A i rongo ano a Hara i te tatau o te teneti, i muri i a ia.
- 11
- Na, kua koroheke rawa a Aperahama raua ko Hara, kua maha o raua ra; kua mutu a Hara te pera me etahi wahine.
- 12
- Na, ka kata a Hara i roto i a ia, ka mea, Ka ruruhitia nei ahau, a tera ranei ahau e whai koa, he koroheke nei ano hoki toku ariki?
- 13
- Na, ka mea mai a Ihowa ki a Aperahama, Na te aha i kata ai a Hara, i mea ai, He pono, ka whanau tamariki ranei ahau, he ruruhi nei hoki ahau?
- 14
- He pakeke rawa ranei tetahi mea ki a Ihowa? Kei te taima i whakaritea, kei te wa o to te tangata oranga e rite ai, ka hoki mai ahau ki a koe, a ka whai tamaiti a Hara.
- 15
- Na, ka whakawareware atu a Hara, ka mea, Kihai ahau i kata; i wehi hoki ia. A ka mea mai ia, Kahore; i kata ano koe.
- 16
- Na, ka whakatika atu nga tangata i reira, a ka titiro atu ki te ritenga mai o Horoma: a i haere ano a Aperahama i a ratou, ki te tuku i a ratou kia haere.
- 17
- A, ka mea a Ihowa, Me huna ranei e ahau i a Aperahama taku e mea ai;
- 18
- Ka meinga nei hoki a Aperahama hei iwi nui, hei iwi kaha, a mana ka manaakitia ai nga iwi katoa o te ao?
- 19
- E mohio ana hoki ahau ki a ia, Ka whakahaua iho e ia ana tamariki, me tona whare, i muri iho i a ia, a ka whakaritea e ratou te ara o Ihowa, ka mahi hoki i te tika, i te whakarite whakawa; a ka kawea mai e Ihowa ki runga ki a Aperahama nga mea i korerotia e ia mona.
- 20
- Na, ka mea mai a Ihowa, He nui te karanga o Horoma raua ko Komora, he taimaha rawa hoki o raua kino;
- 21
- Me haere tenei ahau kia kite e tino rite ana ranei ta raua mahi ki tona karanga kua tae ake nei ki a au; a ki te kahore, ka mohio ahau.
- 22
- Na, ka tahuri atu nga tangata i reira, a ka haere whaka-Horoma: ko Aperahama ia i tu tonu i te aroaro o Ihowa.
- 23
- Na, ka whakatata atu a Aperahama, a ka mea, Ka whakangaromia ano hoki e koe te tangata tika raua ko te tangata kino?
- 24
- Akuanei pea e rima tekau nga tangata tika i roto i te pa: a ka whakangaromia ano ranei e koe, a e kore ranei koe e tohu i taua wahi mo nga tangata tika e rima tekau i roto?
- 25
- Kaua ra tenei e waiho hei tikanga mo tau mahi, te whakamate ngatahi i te tangata tika raua ko te tangata kino: penei ka rite te tangata tika ki te tangata kino; kaua ra koe e pera: e kore ranei e tika te mahi a te kai whakarite whakawa mo te whenua katoa?
- 26
- Na, ka mea mai a Ihowa, Ki te mea ka kitea e ahau i Horoma e rima tekau nga tangata tika i roto i te pa, na, ka tohungia e ahau tena wahi katoa, ka whakaaro hoki ki a ratou.
- 27
- Na, ka whakahokia mai e Aperahama ka mea, na, kua timata nei ahau te korero ki te Ariki; a he puehu nei ahau, he pungarehu:
- 28
- Tera pea e kore te tokorima o te rima tekau o nga tangata tika: ka kore te tokorima, e whakangaro ranei koe i te pa katoa? A ka mea mai ia, E kore e whakangaromia e ahau ki te mea ka kitea e ahau i reira nga tangata e wha tekau ma rima.
- 29
- Na, ka korero atu ano hoki ia ki a ia, ka mea, Tera pea e kitea e wha tekau kei reira. A ka mea mai ia, E whakaaro ahau ki te wha tekau, a e kore e meatia e ahau.
- 30
- Ano ra ko ia, Kaua ra e riri mai te Ariki, a ka korero ahau: Tera pea e kitea e toru tekau kei reira. A ka mea mai ia, E kore e meatia e ahau, ki te mea ka kitea e ahau e toru tekau kei reira.
- 31
- A ka mea atu ia, Na, kua timata nei ahau te korero ki te Ariki: Tera pea e kitea e rua tekau kei reira. A ka mea mai ia, Ka whakaaro ahau ki nga tekau e rua, a e kore e whakangaromia e ahau.
- 32
- Na, ka mea ia, Kaua e riri mai te Ariki ki te korero atu ahau, heoi ano ko tenei korerotanga: Tera pea e kitea kotahi tekau kei reira. A ka mea mai ia, Ka whakaaro ahau ki te tekau kotahi, a e kore e whakangaromia e ahau.
- 33
- Na, ka haere a Ihowa i te mutunga o tana korerotanga ki a Aperahama a hoki ana a Aperahama ki tona wahi.
Address: 
Phone: 
Email: