- 1
- Na, ka haere mai nga anahera tokorua ki Horoma i te ahiahi; a i te kuwaha o Horoma a Rota e noho ana: a te kitenga o Rota, na ka whakatika ia ki te whakatau i a raua, a ka tuohu iho tona kanohi ki te whenua;
- 2
- A ka mea atu ia, Nana, peka mai, e oku Ariki, ki te whare o ta korua pononga, ne? ki konei moe ai, ki te horoi hoki i o korua waewae, a ka maranga wawe korua, ka haere hoki i to korua ara. A ka mea mai raua, Kahore; engari me moe maua ki te huanui.
- 3
- Na, ka kaha tana tohe ki a raua; a peka atu ana raua ki a ia, haere ana ki tona whare; na, ka taka ia i tetahi kai ma raua, ka tunu hoki i etahi keke rewena-kore, a ka kai raua.
- 4
- Kiano raua i takoto noa, na, ka karapotia te whare e nga tangata o te pa, e nga tangata o Horoma, e te koroheke, e te taitamariki, e nga tangata katoa o nga wahi katoa:
- 5
- A ka karanga mai ratou ki a Rota, ka mea ki a ia, Kei hea aua tangata i haere mai nei ki a koe i te po nei? whakaputaina mai raua ki a matou, kia mohio ai matou ki a raua.
- 6
- Na, ka puta atu a Rota ki a ratou ki te kuwaha, me tana tutaki ake ano i te tatau i muri i a ia,
- 7
- A ka mea atu, Kaua ra e kino, e aku tuakana.
- 8
- Nana, tokorua aku tamahine, kahore nei i mohio noa ki te tangata, me whakaputa atu ra raua e ahau ki a koutou, a ma koutou e mea ki a raua te mea e pai na ki to koutou titiro: kaua ia e meatia tetahi mea ki enei tangata; he mea hoki ka tae mai nei raua ki te taumarumarutanga iho o toku tuanui.
- 9
- Ano ra ko ratou, Tu atu ra. A i mea ano ratou, I haere mai tenei koroke kotahi ki konei noho ai, a e whai ana ia kia mana e whakarite tikanga: engari tou mate akuanei i a matou ka nui ake i to raua. Na, ka aki rawa mai ratou ki te tangata ra, ki a Rota, a ka whakatata mai ki te wahi i te tatau.
- 10
- Na, ka torona atu o raua ringaringa e aua tangata, a toia mai ana a Rota ki a raua ki roto ki te whare, a tutakina atu ana e raua te tatau.
- 11
- Na, ka patua e raua ki te matapotanga nga tangata i te kuwaha o te whare, te iti te rahi: a ngenge noa ratou i te rapunga i te tatau.
- 12
- Na, ka mea aua tangata ki a Rota, Kahore atu ranei ou tangata i konei? me he hunaonga, he tamariki ranei au, he tamahine ranei au, tetahi atu mea ranei au i roto i te pa, tangohia atu i tenei wahi:
- 13
- Ka whakangaromia hoki tenei wahi e maua, no te mea kua nui to ratou karanga ki te aroaro o Ihowa; a kua tonoa mai ano maua e Ihowa ki te wha kangaro.
- 14
- Na, ka haere atu a Rota, a ka korero ki ana hunaonga, i marenatia nei ki ana tamahine, a ka mea atu, Whakatika, haere atu i konei; ka whakangaromia hoki e Ihowa tenei pa. Otiia ki ta te whakaaro a ana hunaonga i rite ia ki tetahi tangata e hangareka ana.
- 15
- A, i te huakanga ake o te ata ka whakahohoro nga anahera i a Rota, ka mea, Whakatika atu, tangohia to wahine, me enei tamahine tokorua au, kei hunā koe i roto i te kino o tenei pa.
- 16
- A i a ia e whakaroa ana, na, ka hopukia atu tona ringaringa e aua tangata, me te ringaringa hoki o tana wahine, me nga ringaringa o ana tamahine tokorua; he tohu hoki na Ihowa i a ia: a kawea atu ana ia e raua ki waho, ka waiho i waho o te pa.
- 17
- A ka oti ratou te kawe atu e raua ki waho, na, ka mea ia, Rere atu kia ora ai koe; kaua e titiro ki muri i a koe, kaua hoki e tu ki tetahi wahi o te mania; rere atu ki te maunga, kei ngaro koe.
- 18
- Na, ka mea a Rota ki a raua, Kaua ra e pena, e toku Ariki.
- 19
- Nana, kua manakohia nei to pononga e koe, a kua whakanuia ano e koe tou aroha i whakaputaina mai nei e koe ki a au, i a koe i whakaora nei i toku wairua; otiia e kore e taea e ahau te rere ki te maunga, kei mau ahau i tetahi kino, a ka mate ahau.
- 20
- Titiro hoki, e tata ana tenei pa hei rerenga atu, a he mea nohinohi ano hoki: Kia rere atu ahau ki reira, ne? (ehara ianei i te mea nohinohi?) a ka ora toku wairua.
- 21
- Ano ra ko ia ki a ia, Na, kua whakaae atu ano hoki ahau ki tenei meatanga au, kia kaua e hunā e ahau tenei pa i korero mai nei koe.
- 22
- Kia hohoro, rere atu ki reira; ta te mea hoki e kore e taea tetahi mea e ahau, kia tae atu ra ano koe ki reira. No reira i karangatia ai te ingoa o taua pa ko Toara.
- 23
- No te putanga ake o te ra ki runga ki te whenua i tae ai a Rota ki Toara.
- 24
- Na, ka uaina iho e Ihowa ki runga ki Horoma raua ko Komora, he whanariki, he ahi na Ihowa, no runga i te rangi;
- 25
- A hurihia iho e ia aua pa, me te mania katoa, me nga tangata katoa o nga pa, me nga mea e tupu ana i te whenua.
- 26
- A i titiro mai tana wahine i muri i a ia, a ka meinga hei pou tote.
- 27
- A ka maranga wawe a Aperahama i te ata ki te wahi i tu ai ia i te aroaro o Ihowa:
- 28
- A, tana tirohanga atu ki te ritenga mai o Horoma raua ko Komora, ki te whenua katoa hoki o te mania, a ka kite atu ia, na e kake ake ana te paowa o te whenua, me te mea he paowa oumu.
- 29
- A i te whakangaromanga a Atua i nga pa o te mania, na, ka mahara te Atua ki a Aperahama, a tonoa atu ana e ia a Rota i roto i te hurihanga, i tana hurihanga i nga pa i noho ai a Rota.
- 30
- Na, ka piki atu a Rota i Toara, a ka noho ki te maunga, ratou tahi ko ana tamahine tokorua; i wehi hoki, tē noho ai ia ki Toara: a ka noho i roto i tetahi ana, a ia me ana tamahine tokorua.
- 31
- Na, ka mea te tuakana ki to muri iho, Kua koroheke to taua papa, a kahore he tangata o te whenua hei haere mai ki a taua, hei pera me to te whenua katoa tikanga:
- 32
- Tena, kia whakainumia to taua papa ki te waina, a ka takoto taua ki a ia, kia tupu ai i a taua tetahi uri mo to taua papa.
- 33
- Na, ka whakainu raua i to raua papa ki te waina i taua po: a ka haere atu te tuakana, ka takoto hoki ki tona papa, kihai ano hoki tera i mohio ki tona takotoranga iho, ki tona whakatikanga ake.
- 34
- A i te aonga ake, ka mea te tuakana ki to muri iho, Nana, i takoto ahau inapo ki toku papa: kia whakainu taua i a ia ki te waina i tenei po ano hoki; a mau e haere atu, e takoto ki a ia kia tupu ai i a taua tetahi uri mo to taua papa.
- 35
- Na, ka whakainu ano hoki raua i to raua papa ki te waina i taua po: ka whakatika ake to muri iho, ka takoto hoki ki a ia: a kihai ia i mohio ki tona takotoranga iho, ki tona whakatikanga ake.
- 36
- Na, ka hapu nga tamahine tokorua a Rota i to raua papa.
- 37
- A ka whanau ta te tuakana, he tamaiti, a huaina ana e ia tona ingoa ko Moapi: ko ia te papa o nga Moapi, a tae noa ki tenei ra.
- 38
- Me to muri iho hoki, whanau ake tana, he tamaiti, a huaina iho e ia tona ingoa ko Penami: ko ia te papa o nga tamariki a Amona, a tae noa ki tenei ra.
Address: 
Phone: 
Email: