- 1
- A te kitenga o Rahera kahore ano i whanau tetahi tamaiti ma raua ko Hakopa, na, ka hae a Rahera ki tona tuakana; a ka mea ki a Hakopa, Kia whai tamariki ahau, na, ki te kahore, ka mate ahau.
- 2
- Na, ka mura ake te riri a Hakopa ki a Rahera: a ka mea ia, Ko te Atua ranei ahau e kaiponu atu nei i te hua mo tou kopu?
- 3
- A ka mea tera, Na, taku pononga wahine a Piriha, haere ki roto ki a ia; a kia whanau ia ki runga ki oku turi, a mana ka tu ai ahau.
- 4
- Na, ka homai e ia a Piriha tana pononga wahine ki a ia hei wahine: a ka haere atu a Hakopa ki roto ki a ia.
- 5
- Na, ka hapu a Piriha, a ka whanau ta raua tamaiti ko Hakopa.
- 6
- Na, ka mea a Rahera, Kua whakarite te Atua i taku whakawakanga, kua rongo ano hoki ki toku reo, a homai ana e ia tetahi tamaiti ki a au: no reira i huaina ai e ia tona ingoa ko Rana.
- 7
- Na, ka hapu ano hoki a Piriha te pononga wahine a Rahera, a ka whanau te rua o a raua tamariki ko Hakopa.
- 8
- Na, ka mea a Rahera, Nui whakaharahara nga nonoketanga i nonoke ai maua ko toku tuakana, a taea ana ia e ahau: na, huaina iho e ia tona ingoa ko Napatari.
- 9
- A te kitenga o Rea ka mutu ia te whanau, na, ka tango ia i a Tiripa i tana pononga wahine, a hoatu ana e ia ki a Hakopa hei wahine.
- 10
- Na, ka whanau te tamaiti a Hakopa raua ko Tiripa pononga a Rea.
- 11
- A ka mea a Rea, He ope te haere mai nei: na, huaina ana e ia tona ingoa ko Kara.
- 12
- Na, ka whanau te rua o nga tamariki a Hakopa raua ko Tiripa pononga a Rea.
- 13
- A ka mea a Rea, E hari ana ahau, ka kiia nei hoki ahau e nga tamahine he mea hari: a huaina ana e ia tona ingoa ko Ahera.
- 14
- Na, ka haere a Reupena i nga ra o te kotinga witi, a ka kitea e ia etahi manitareki i te koraha, a kawea mai ana e ia ki a Rea ki tona whaea. A ka mea atu a Rahera ki a Rea, Tena koa maku etahi o nga manitareki a to tamaiti.
- 15
- Na, ko te meatanga mai a tera ki a ia, He mea nohinohi ianei to tangohanga i taku tahu? a, me tango ano koe i nga manitareki a taku tamaiti? A ka mea atu a Rahera, Na, me takoto ia ki a koe i tenei po hei utu mo nga manitareki a to tamaiti.
- 16
- A, i te haerenga mai o Hakopa i te mara i te ahiahi, na ka puta atu a Rea ki te whakatau i a ia, a ka mea atu, Me haere mai koe ki a au; kua oti hoki koe te hoko e au ki nga manitareki a taku tamaiti. Na, ka takoto ia ki a ia i taua po.
- 17
- A i whakarongo mai te Atua ki a Rea, a ka hapu ia, a ka whanau te tokorima o a raua tamariki ko Hakopa.
- 18
- Na, ka mea a Rea, Kua homai e te Atua taku utu moku i hoatu i taku pononga ki taku tahu: a huaina ana e ia tona ingoa ko Ihakara.
- 19
- Na, ka hapu ano a Rea, a ka whanau te tokoono o a raua tamariki ko Hakopa.
- 20
- Na, ka mea a Rea, He pai te hakari i homai nei e te Atua ki a au; katahi taku tahu ka noho ki a au, mo te whanautanga o a maua tamariki tokoono: huaina ana e ia tona ingoa ko Hepuruna.
- 21
- A muri iho ka whanau he kotiro, a huaina ana e ia tona ingoa ko Rina.
- 22
- A i mahara mai te Atua ki a Rahera, a i whakarongo mai te Atua ki a ia, a whakatuwheratia ana e ia tona kopu.
- 23
- Na, ka hapu ia, a ka whanau he tamaiti; a ka mea ia, Kua whakamutua e te Atua toku tawainga:
- 24
- Na, huaina ana e ia tona ingoa ko Hohepa; a ka mea, Ka tapiritia mai e Ihowa, tetahi atu tamaiti maku.
- 25
- A ka whanau a Hohepa i a Rahera, na, ka mea a Hakopa ki a Rapana, Tukua atu ahau, a ka haere ahau ki toku wahi, me toku whenua.
- 26
- Homai aku wahine me aku tamariki i mahi ai ahau ki a koe, a ka haere ahau: e mohio ana hoki koe ki taku mahi i mahi ai ahau ki a koe.
- 27
- Na, ka mea a Rapana ki a ia, Ki te mea e manakohia mai ana ahau e koe, e noho: kua kite noa ake nei hoki ahau he whakaaro ki a koe i manaakitia ai ahau e Ihowa.
- 28
- A i mea ano ia, Whakaritea mai ki a au te utu mou, a ka hoatu e ahau.
- 29
- A ka mea mai ia ki a ia, E mohio ana koe ki taku mahinga ki a koe, ki o kararehe hoki i a au, to ratou peheatanga.
- 30
- I mua hoki i a au he iti au mea, na kua nui noa atu tenei; no taku taenga mai nei hoki i manaakitia ai koe e Ihowa: a, ahea ranei tenei ahau mea ai i tetahi mea mo taku whare hoki?
- 31
- A ka mea tera, Ko te aha taku e hoatu ai ki a koe? A ka mea a Hakopa, Kaua e homai tetahi mea ki a au: ki te meatia mai e koe tenei mea aku, ka whangai ano ahau, ka tiaki i o hipi.
- 32
- Ka tika ahau na waenganui i to kahui akuanei, a ka wehea atu i roto nga mea whai tongitongi katoa, nga mea purepure, me nga koati: i roto i nga hipi, me nga purepure, me nga mea whai tongitongi i roto i nga pakaka koati: a ko era hei utu moku.
- 33
- Penei ka whakatikaia ahau e taku tika apopo ake nei, ina tae atu ki tou aroaro ki te utu moku: ko nga mea i roto i nga koati kahore nei he tongitongi, kahore he purepure, me nga mea kahore e pakaka i roto i nga hipi, he mea tahae tena naku.
- 34
- Na, ka mea a Rapana, Ae, e mea ana ahau kia penei ano me tau i ki mai na.
- 35
- Na, ka wehea atu e ia i taua rangi ano nga koati toa nga mea whakahekeheke, me nga mea purepure, me nga koati uha e whai tongitongi ana, me nga mea purepure, nga mea i ma tetahi wahi, me nga mea pakaka o nga hipi, a hoatu ana ki te ringaringa o ana tamariki.
- 36
- Na, ka whakatakiwatia e ia he takiwa ki a ia ki a Hakopa, kia toru nga ra e haerea ai: a ka whangai a Hakopa i nga hipi a Rapana i mahue iho.
- 37
- Katahi ka tikina e Hakopa etahi rakau mana, he papirara mata, he hatera, he hetenati: a tihorea ana e ia etahi tihorenga ma i aua mea, a ka meinga kia ata kitea te wahi ma o nga rakau.
- 38
- A i whakaturia e ia aua rakau i tihorea ra ki roto ki nga hake, ki roto ki nga kumete wai, i nga haerenga mai o nga hipi ki te inu, ki te ritenga mai o nga hipi, kia whakahaputia ai ratou ina haere mai ki te inu.
- 39
- A i whakahaputia nga kahui ki nga rakau, a he whakahekeheke, he mea tongitongi, he purepure, nga kuao i whanau.
- 40
- Na, ka wehea atu nga reme e Hakopa, a whakaangahia mai ana e ia nga kanohi o nga kahui ki nga mea whakahekeheke, ki nga mea pakaka katoa i roto i te kahui a Rapana; i wehea ano hoki e ia ana kahui ki a ratou anake, kihai hoki i tukua ki roto ki te kahui a Rapana.
- 41
- A ka whakahaputia nga mea kaha, na, ka whakaturia e Hakopa nga rakau ki te tirohanga mai a nga kahui, ki roto ki nga hake, kia whakahaputia ai ratou ki nga rakau.
- 42
- A ki te mea he kahakore te hipi, kihai i whakaturia e ia: na, i a Rapana nga mea kahakore, a i a Hakopa nga mea kaha.
- 43
- Na, ka tino nui haere rawa taua tangata, a ka whai hipi ano ia, tona tini, me nga pononga wahine, me nga pononga tane, me nga kamera, me nga kaihe.
Address: 
Phone: 
Email: