- 1
- A i rongo ia i nga kupu a nga tamariki a Rapana, e ki ana, Kua riro i a Hakopa nga mea katoa a to tatou papa; na nga mea hoki a to tatou papa i whiwhi ai ia ki tenei kororia katoa.
- 2
- Na, ka titiro atu a Hakopa ki te mate o Rapana, a kihai i pera mai ki a ia me to era rangi ake.
- 3
- A ka mea mai a Ihowa ki a Hakopa, Hoki atu ki te whenua o ou mātua, ki ou whanaunga hoki; a ka tata ahau ki a koe.
- 4
- Na, ka tono tangata atu a Hakopa hei karanga i a Rahera raua ko Rea ki tana kahui ki te parae.
- 5
- Na, ka mea atu ia ki a raua, Kua kite ahau i te mate o to korua papa, kahore e pera mai ki a au me to era rangi ake; otiia i tata mai ki a au te Atua o toku papa.
- 6
- E mohio ana ano korua i poto katoa atu toku kaha ki taku mahi ki to korua papa.
- 7
- Ko to korua papa ia i tinihanga ki a au, a ka tekau ana whakaputanga ketanga i oku utu; otiia kihai ia i tukua e te Atua kia tukino i a au.
- 8
- I tana meatanga, Hei nga mea whai tongitongi te utu mou; na, he mea tongitongi katoa nga whanau o nga kahui: a i tana meatanga, Hei nga mea whakahekeheke he utu mou, na, he whakahekeheke katoa nga whanau o nga kahui.
- 9
- Na Ihowa hoki i tango nga hipi a to korua papa a homai ana ki a au.
- 10
- A i te wa i whakahaputia ai nga hipi, na, ka maranga ake oku kanohi, a ka kite moemoea ahau, a ko nga toa i ekengia ai nga kahui, he whakahekeheke, he mea whai tongitongi, he mea kotingotingo.
- 11
- A i korero moemoea mai ano te anahera a te Atua ki a au, E Hakopa: a ka mea atu ahau, Tenei ahau.
- 12
- Na, ka mea mai ia, Tena, kia maranga o kanohi, tirohia atu hoki nga toa katoa e ekeeke ana i nga kahui, he mea whakahekeheke, he mea whai tongitongi, he mea kotingotingo hoki: kua kite nei hoki ahau i nga mea katoa i mea nei a Rapana ki a koe.
- 13
- Ko ahau te Atua o Pete-ere o te wahi i whakawahi na koe i te pou, i puaki ai hoki to kupu taurangi ki a au: tena, whakatika, haere atu i tenei whenua, a hoki atu ki te whenua i whanau ai koe.
- 14
- Na, ka whakahokia mai e Rahera raua ko Rea, a ka mea ki a ia, Tera atu ano ianei tetahi wahi, tetahi taonga tupu ranei mo maua i roto i te whare o to maua papa?
- 15
- Kahore ianei maua e kiia e ia he wahine ke noa atu? kua hokona nei hoki maua e ia, a kua pau rawa ano hoki i a ia a maua moni.
- 16
- Mo tatou nei hoki, mo a tatou tamariki nga taonga katoa i tangohia nei e te Atua i to maua papa: na, tena, meatia e koe nga mea katoa i kiia mai e te Atua ki a koe.
- 17
- Na, ka whakatika a Hakopa, a whakaekea ana e ia ana tamariki me ana wahine ki runga ki nga kamera;
- 18
- A ka whakina atu ana e ia ana kararehe katoa, me ona taonga katoa i whiwhi ai ia, nga kararehe i whiwhi ai ia, i riro mai hoki i a ia i Parana-arama, a haere ana ki a Ihaka ki tona papa ki te whenua o Kanaana.
- 19
- Ko Rapana hoki, kua riro ia ki te kokoti i ana hipi: na, ka tahaetia e Rahera nga whakapakoko o tona papa.
- 20
- Na, tahuti mai ana a Hakopa i a Rapana Hiriani, a kihai i whakaaturia e ia tona omanga ki a ia.
- 21
- Na, ka oma ia, me ana mea katoa; a ka whakatika, ka whiti i te awa, i ahu hoki tona mata ki Maunga Kireara.
- 22
- A i te toru o nga ra ka korerotia ki a Rapana kua oma a Hakopa.
- 23
- Na, ka tango ia i ona teina hei hoa mona, a ka whai i a ia, e whitu nga ra ki te ara; a mau rawa mai ia i Maunga Kireara.
- 24
- Na, ka puta moemoea mai te Atua ki a Rapana Hiriani i te po, a ka mea ki a ia, Kia tupato koe kei korero koe ki a Hakopa, ahakoa pai, ahakoa kino.
- 25
- Na, ka mau a Hakopa i a Rapana. A i whakaturia e Hakopa tona teneti ki te maunga: me Rapana hoki, i whakaturia o ratou ko ona teina ki Maunga Kireara.
- 26
- Na, ka mea a Rapana ki a Hakopa, He mahi aha tau, i tahuti mai nei koe i a au, i kahaki mai nei hoki i aku tamahine, ano he pārau na te hoari?
- 27
- Na te aha i hunā ai e koe to omanga, i tahuti mai ai hoki koe i a au; a kihai i korero mai ki a au, kia tukua mai ai koe e ahau i runga i te hari, i nga waiata, me te timipera, me te haapa?
- 28
- Kihai ano hoki ahau i tukua e koe kia kihi i aku tamariki me aku tamahine? he mahi poauau ano tenei mahi au.
- 29
- Kei toku ringa ano he kaha hei whakatupu-kino i a koutou: otiia kua korero mai te Atua o to koutou papa ki a au inapo, kua mea mai, Kia tupato koe kei korero atu koe, ahakoa pai, ahakoa kino, ki a Hakopa.
- 30
- Na, i a koe i haere nei, no te mea i tino pirangi koe ki te whare o tou papa, na te aha ra koe i tahae ai i oku atua?
- 31
- Na, ka whakahokia mai e Hakopa, a ka mea ki a Rapana, No te mea hoki i wehi ahau: i mea hoki ahau, Kei tangohia e koe o tamahine i a au.
- 32
- Ko te tangata e kitea e koe o atua ki a ia, kaua ia e whakaorangia: tirohia iho e koe i te aroaro o o taua teina ko ehea mea au kei a au, ka tango atu ai mau. Kihai hoki a Hakopa i mohio kua tahaetia mai aua mea e Rahera.
- 33
- Na, ka haere atu a Rapana ki te teneti o Hakopa, ki te teneti ano hoki o Rea, ki te teneti ano hoki o nga pononga wahine tokorua; a kihai i kitea. Na, ka haere atu ia i te teneti o Rea, a ka haere ki te teneti o Rahera.
- 34
- Heoi kua tikina nga whakapakoko e Rahera, kua whaongia ki roto ki te nohoanga kamera, a nohoia iho e ia. Na, poto katoa te teneti te whawha e Rapana, a kihai i kitea.
- 35
- Na, ka mea ia ki tona papa, Kei riri mai toku ariki moku e kore e ahei te whakatika ake ki tou aroaro; no te mea ko to te wahine mate tenei kei a au. Na, ka rapu ia, a kihai i kitea nga whakapakoko.
- 36
- Na, ka riri a Hakopa, a ka ngangare ki a Rapana: a ka oho mai a Hakopa, ka mea ki a Rapana, He aha toku hara, he aha toku he, i takare ai koe ki te whai mai i a au?
- 37
- Kua whawhakia nei e koe aku mea katoa, he aha te mea i kitea e koe o nga mea katoa o tou whare? homai ki konei ki te aroaro o oku teina, o ou teina, a ma ratou e whakariterite ta taua whakawakanga.
- 38
- Ka rua tekau enei tau oku ki a koe; kihai i whanau whakatahe o hipi, me o koati, kihai ano hoki i kainga e ahau nga hipi toa o to kahui.
- 39
- Kihai i kawea mai e ahau ki a koe te mea i haea e nga kirehe mohoao; naku ano tena i whakautu; i rapu utu ano koe mo tena i toku ringa, mo te mea i tahaetia i te ao, mo te mea i tahaetia i te po.
- 40
- Ko taku hanga tena; i pau ahau i te awatea i te mate-wai, a i te po i te huka; a turere ana te moe i oku kanohi.
- 41
- Ka rua tekau enei tau oku ki tou whare; kotahi tekau ma wha nga tau i mahi ai ahau ki a koe mo o tamahine tokorua, e ono tau hoki mo o hipi: a ka tekau o whakaputanga ketanga i nga utu moku.
- 42
- Me i kahore i tata mai ki a au te Atua o toku papa, te Atua o Aperahama, ta Ihaka hoki e wehi nei, ina kua tonoa kautia mai ahau e koe. I kite mai te Atua i toku tukinotanga, i te mamahi hoki a oku ringa, i riria ai koe e ia inapo.
- 43
- Na, ko te whakahokinga mai a Rapana, te meatanga mai hoki ki a Hakopa, He tamahine naku enei tamahine, a he tamariki naku enei tamariki, a he kahui ano hoki naku enei kahui, a ko nga mea katoa e kite nei koe, naku: a he aha taku e mea ai akuanei ki enei tamahine aku, ki a raua tamariki ranei i whanau nei i a raua?
- 44
- Na, tena, haere mai, kia whakarite kawenata taua; a ka waiho hei kai whakaatu ki a taua.
- 45
- Na, ka tikina tetahi kohatu e Hakopa, a whakaarahia ake e ia hei pou.
- 46
- A ka mea ano a Hakopa ki ona teina, Kohia mai etahi kohatu; na, ka tikina atu e ratou etahi kohatu, a ka hangā he puranga: a kai ana ratou ki reira ki runga ki te puranga.
- 47
- A huaina iho taua mea e Rapana ko Iekarahaharuta: na Hakopa ia i hua ko Kareere.
- 48
- Na, ka mea a Rapana, Hei kai whakaatu tenei puranga i tenei ra ki a taua. No reira i huaina ai tona ingoa ko Kareere;
- 49
- Ko Mihipa hoki; i mea hoki ia, Ma Ihowa e titiro mai ki a taua, ina matara atu taua i a taua.
- 50
- Ki te tukino koe i aku tamahine, ki te tango ranei i etahi wahine ke atu i aku tamahine, kahore he tangata i a taua; kia mahara, hei kai titiro te Atua ki a au ki a koe.
- 51
- A i mea mai ano a Rapana ki a Hakopa, Nana, tenei puranga, kia kite mai hoki koe i tenei pou i waiho iho nei e ahau i waenganui i a taua;
- 52
- Hei kai whakaatu tenei puranga hei kai whakaatu ano hoki tenei pou, moku kei haere ki tua atu o tenei puranga ki a koe, mou hoki kei haere ake ki a au ki tua o tenei puranga, o tenei pou hoki, mo te kino.
- 53
- Ma te Atua o Aperahama, ma te Atua hoki o Nahora, ma te Atua o to raua papa, e whakarite ta taua whakawa. Na, ka oatitia e Hakopa te wehi o tona papa o Ihaka.
- 54
- Na, patua ana he patunga tapu e Hakopa ki runga ki te maunga, a karangatia ana e ia ona teina ki te kai taro: na, ka kai taro ratou, a ka moe ki te maunga.
- 55
- A ka maranga wawe a Rapana i te ata, ka kihi i ana tamariki me ana tamahine, ka manaaki hoki i a ratou: na, haere ana a Rapana, hoki ana ki tona wahi.
Address: 
Phone: 
Email: