- 1
- Na, ka haere atu a Rina tamahine a Rea, i whanau nei i a raua ko Hakopa, kia kite i nga tamahine o te whenua.
- 2
- A, te kitenga i a ia o Hekeme tama a Hamora Hiwi, rangatira o taua whenua, na, ka hopukia e ia, a ka takoto ia ki a ia, ka whakaiti hoki i a ia.
- 3
- Na, ka piri tona wairua ki a Rina tamahine a Hakopa, a ka aroha ia ki taua kotiro, a ka whakamarie i te ngakau o te kotiro.
- 4
- Na, ka korero a Hekeme ki a Hamora ki tona papa, ka mea, Tikina taua kotiro hei wahine maku.
- 5
- A i rongo a Hakopa kua pokea a Rina tana tamahine e ia: a i te parae ana tamariki i ana kararehe: a ka whakarongo puku a Hakopa, kia tae mai ra ano ratou.
- 6
- Na, ka haere atu a Hamora te papa o Hekeme ki a Hakopa ki te korero ki a ia.
- 7
- Na, ka haere mai nga tamariki a Hakopa i te parae, i to ratou rongonga ai; a ka matangerengere aua tangata, ka tino riri hoki, mo tana mahi wairangi i roto i a Iharaira, i a ia i takoto ra ki te tamahine a Hakopa; he mahi hoki kihai i tika.
- 8
- Na, ka korero mai a Hamora ki a ratou, ka mea, Ko Hekeme ko taku tamaiti, piri tonu tona wairua ki ta koutou tamahine: homai ia ki a ia, ne? hei wahine.
- 9
- A kia marenatia tatou ki a tatou, ko a koutou tamahine me homai ki a matou, a me tango ano hoki a matou tamahine ma koutou.
- 10
- A me noho koutou ki a matou: ka takoto atu te whenua i to koutou aroaro, mo ta koutou noho, mo ta koutou hokohoko ki konei, kia whai rawa ai hoki koutou ki konei.
- 11
- A i mea mai ano a Hekeme ki tona papa, ratou ko ona tungane, Kia manakohia mai ahau e koutou, a ko ta koutou e ki mai ai ki a au me hoatu e ahau.
- 12
- Kia nui noa atu te tapakuha me te hakari e meatia mai e koutou ki a au, a me hoatu e ahau ta koutou e ki mai ai ki a au: otira homai te kotiro hei wahine maku.
- 13
- Na, ka whakahoki tinihanga mai nga tamariki a Hakopa ki a Hekeme, raua ko Hamora ko tona papa, i mea hoki ratou, mo Rina mo to ratou tuahine i whakapokea e ia;
- 14
- A ka mea ratou ki a raua, E kore tenei mea e taea e matou te mea, te hoatu i to matou tuahine ki te tangata kahore i kotia; he whakahenga hoki tena mo matou.
- 15
- Tenei ia te mea e whakaae ai matou ki a koutou: Ki te peneitia koutou me matou, ki te kotia o koutou tane katoa;
- 16
- Katahi ka hoatu e matou a matou tamahine ki a koutou, a ka tangohia mai ano a koutou tamahine ma matou, a ka noho matou ki roto ki a koutou, a ka whaka-iwi-kotahi tatou.
- 17
- A ki te kahore koutou e rongo ki ta matou, kia kotia koutou; na, ka tango matou i to matou tamahine, ka haere.
- 18
- A i pai a ratou kupu ki te whakaaro iho a Hamora, ki te whakaaro ano hoki a Hekeme tama a Hamora.
- 19
- A kihai i whakaroa taua tamaiti ki te mea i taua mea, he mate nui hoki nona ki te tamahine a Hakopa: a he nui atu ano ia i nga tangata katoa o te whare o tona papa.
- 20
- Na, ka haere mai a Hamora raua ko Hekeme ko tana tama ki te kuwaha o to raua pa, a ka korero ki nga tangata o to raua pa, ka mea,
- 21
- He hunga ata noho ki a tatou tenei; na, kia noho ratou ki tenei whenua, kia hokohoko ki konei; a ko te whenua nei, e nui ana mo ratou; kia tangohia mai a ratou tamahine hei wahine ma tatou, a kia hoatu a tatou tamahine ki a ratou.
- 22
- Kotahi ano ia te mea e whakaae mai ai aua tangata ki a tatou kia noho ki a tatou, kia waiho hei iwi kotahi, ki te kotia o tatou tane katoa, ki te peratia me ratou kua kotia nei.
- 23
- Ko a ratou kararehe, me o ratou taonga, me a ratou kirehe katoa, e kore ianei ena e riro mai i a tatou? erangi me whakaae atu tatou ki a ratou, a ka noho ratou ki a tatou.
- 24
- A i whakarongo mai ki a Hamora raua ko Hekeme ko tana tama nga tangata katoa i haere atu i te kuwaha o tona pa; a i kotia katoatia nga tane, nga tangata katoa i haere atu i te kuwaha o tona pa.
- 25
- A i te toru o nga ra, i a ratou e mamae ana, na, ka tango nga tamariki tokorua a Hakopa, a Himeona raua ko Riwai, nga tungane o Rina, i tana hoari i tana hoari, a haere maia mai ana ki te pa, a patua iho e raua nga tane katoa.
- 26
- A i patua ano hoki e raua a Hamora raua ko Hekeme ko tana tama ki te mata o te hoari, a tangohia mai ana e raua a Rina i roto i te whare o Hekeme, a haere ana.
- 27
- Na, ka haere mai nga tamariki a Hakopa ki te hunga i patua, a pahuatia ana e ratou te pa, mo to ratou tuahine i whakapokea e ratou.
- 28
- I tangohia e ratou a ratou hipi, me a ratou kau, me a ratou kaihe, me nga mea hoki i te pa, me nga mea hoki i te mara,
- 29
- Me o ratou taonga katoa, a whakaraua ana a ratou tamariki katoa, me a ratou wahine, a i pahuatia ano hoki nga mea katoa i roto i te whare.
- 30
- Na, ka mea mai a Hakopa ki a Himeona raua ko Riwai, Ka raru au i a korua, a ka meinga kia piro i roto i nga tangata whenua, i roto i nga Kanaani ratou ko nga Perihi: a ka huihui mai ratou ki a au, ki te hunga tokotorutoru, a ka patua ahau; a ka ngaro ahau, ahau me toku whare.
- 31
- A ka mea atu raua, Kia peratia koia e ia to matou tuahine me te wahine puremu?
Address: 
Phone: 
Email: