- 1
- A te marangatanga ake o nga kanohi o Hakopa, na, ka titiro atu ia, a ko Ehau e haere mai ana, ratou ko nga tangata e wha rau. Na, ka wehea e ia nga tamariki ki a Rea, ratou ko Rahera, ko nga pononga wahine tokorua.
- 2
- A i makā e ia nga pononga wahine me a raua tamariki ki mua, a ko Rea ratou ko ana tamariki ki muri iho, a, i muri rawa ko Rahera raua ko Hohepa.
- 3
- Na, ka haere atu ia ki mua i a ratou, a e whitu ona pikonga iho ki te whenua, a tae noa ia ki tona tuakana.
- 4
- Na, ka rere mai a Ehau ki te whakatau i a ia, a ka awhi i a ia, ka hinga iho hoki ki runga ki tona kaki, a ka kihi i a ia: na, ka tangi raua.
- 5
- Na, ka maranga ake ona kanohi, a ka kite ia i nga wahine, ratou ko nga tamariki; a ka mea mai, Ko wai enei i a koe nei? a ka mea atu ia, Ko nga tamariki, ara, ko nga ohaohatanga mai a te Atua ki to pononga.
- 6
- Na, ka whakatata mai nga pononga wahine, raua me a raua tamariki, a ka piko iho.
- 7
- Na, ka whakatata mai ano a Rea, ratou ko ana tamariki, a ka piko iho: a muri iho ka whakatata mai a Hohepa raua ko Rahera, a ka piko iho raua.
- 8
- A ka mea mai ia, Hei aha mau tenei ropu katoa i tutaki nei ki a au? Ano ra ko ia, Kia manakohia mai ai ahau e toku ariki.
- 9
- A ka mea mai a Ehau, E nui ana, ha, taku, e taku teina; mau ano tau.
- 10
- Ano ra ko Hakopa, Kaua ra; me he mea kua manakohia mai ahau e koe, na, me tango e koe te hakari a toku ringa: ka kite atu nei hoki ahau i tou kanohi, me te mea e titiro atu ana ahau ki te kanohi o te Atua, a ka pai mai ano koe ki a au.
- 11
- Tangohia ra taku manaakitanga i kawea atu na ki a koe; kua atawhai mai nei hoki te Atua ki a au, a e hua ana aku mea. Na, ka tohe ia ki a ia, a ka tangohia e ia.
- 12
- Na, ka mea ia, Hapainga, tatou ka haere, a me haere ahau i mua i a koe.
- 13
- A ka mea atu ia ki a ia, E mohio ana toku ariki he kahakore nga tamariki, a kei a au ano hoki nga kahui me nga kau e hapu ana: a kia kotahi ano rangi e akiakina ana ratou, na, ka mate katoa nga kahui.
- 14
- Me haere toku ariki i mua i tana pononga: a ka rite taku ata arataki atu ki te haere o nga mea nei i taku aroaro, ki te haere hoki o nga tamariki; kia tae ra ano ahau ki taku ariki ki Heira.
- 15
- Na, ka mea mai a Ehau, Me waiho e ahau etahi o aku tangata ki a koe, ne? A ka mea atu ia, Hei aha? kia manakohia mai ahau e toku ariki.
- 16
- Na, ka hoki a Ehau i taua rangi ano, a ka haere ki Heira.
- 17
- A ka turia atu e Hakopa ki Hukota, a ka hangā e ia tetahi whare mona, i hangā ano hoki e ia etahi tihokahoka mo ana kararehe: no reira i huaina ai te ingoa o taua wahi ko Hukota.
- 18
- A ka tae mai a Hakopa ki Hareme ki tetahi pa o Hekeme, ki te whenua o Kanaana, i tana haerenga mai i Parana-arama; a ka noho ki te ritenga atu o te pa.
- 19
- Na, ka hokona e ia ki nga moni kotahi rau te wahi whenua i tu ai tona teneti, i te ringaringa o nga tamariki a Hamora, a te papa o Hekeme.
- 20
- A ka whakaturia e ia tetahi aata ki reira, a huaina iho e ia ko Ere-erohe-Iharaira.
Address: 
Phone: 
Email: