- 1
- A i noho a Hakopa i te whenua i noho manene ai tona papa, i te whenua o Kanaana.
- 2
- Ko nga whakatupuranga enei o Hakopa. Kotahi tekau ma whitu nga tau o Hohepa, a i te whangai hipi ia ratou ko ona tuakana; a i nga tamariki a Piriha taua tamaiti, i nga tamariki hoki a Tiripa, a nga wahine a tona papa: a ka kawea mai e Hohepa te korero kino mo ratou ki to ratou papa.
- 3
- A i arohaina nuitia a Hohepa e Iharaira i ana tamariki katoa, no te mea ko te tamaiti ia o tona koroheketanga: a ka hangā e ia tetahi koti purepure mona.
- 4
- A te kitenga o ona tuakana e arohaina nuitia ana ia e to ratou papa i ona tuakana katoa, na ka kino ratou ki a ia, kihai ano hoki i ahei te ata korero ki a ia.
- 5
- Na, ka moe a Hohepa i tetahi moe, a ka korerotia mai e ia ki ona tuakana; a ka nui haere ano hoki to ratou kino ki a ia.
- 6
- A ka mea mai ia ki a ratou, Tena, whakarongo mai ki tenei moe i moe nei ahau:
- 7
- Nana, i te paihere tatou i a tatou paihere i waenga mara, na, ka whakatika ake taku paihere, a ka tu; te tino karapotinga mai o a koutou paihere, kei te piko iho ki taku paihere.
- 8
- Na, ka mea atu ona tuakana ki a ia, Koia ranei? ko koe hei kingi mo matou? hei rangatira ano ranei koe mo matou? Na, ka nui haere ano to ratou kino ki a ia mo ana moe, me ana kupu.
- 9
- A i moe ano ia i tetahi atu moe, a ka korerotia mai e ia ki ona tuakana, ka mea mai ia, Nana, tenei ano hoki tetahi moe i moe ai ahau; na, ko te ra me te marama, me nga whetu kotahi tekau ma tahi, e piko mai ana ki a au.
- 10
- A ka korerotia e ia ki tona papa, ratou ko ona tuakana: na, ka whakatupehupehu mai tona papa ki a ia, a ka mea atu ki a ia, He aha tenei moe i moe nei koe? Tera ranei matou, ko tou whaea, ko o tuakana, e haere atu ki te piko ki a koe ki te whenua?
- 11
- Na, ka hae ona tuakana ki a ia; ko tona papa ia i mahara ki te kupu.
- 12
- Na, ka haere ona tuakana ki Hekeme ki te whangai i nga hipi a to ratou papa.
- 13
- A ka mea mai a Iharaira ki a Hohepa, Kahore ianei o tuakana i te whangai hipi i Hekeme? haere mai, a me tono atu koe e ahau ki a ratou. A ka mea atu ia, Tenei ahau.
- 14
- Na, ka mea mai ia ki a ia, Tikina, tirohia kei te ora ranei o tuakana, kei te ora ano ranei nga hipi; ka whakahoki mai ai i te korero ki a au. Na, ka tonoa atu ia e ia i te raorao o Heperona, a ka haere ia ki Hekeme.
- 15
- A, ka tutaki tetahi tangata ki a ia, a e pohehe ana ia i te parae, a ka ui taua tangata ki a ia, ka mea, He aha tau e rapu?
- 16
- Na, ka mea atu ia, E rapu ana ahau i aku tuakana: tena koa, whakaaturia mai ki a au, kei hea ratou e whangai ana.
- 17
- A ka mea mai taua tangata, Kua riro atu ratou i konei; i rongo hoki ahau i a ratou e ki ana, Kia haere tatou ki Rotana. Na, ka haere a Hohepa ki te whai i ona tuakana, a ka kitea ratou e ia ki Rotana.
- 18
- A to ratou kitenga i a ia i tawhiti, i te mea kahore ano ia i tata noa ki a ratou, na, ka whakatakoto whakaaro ratou mona kia whakamatea.
- 19
- A ka mea ratou tetahi ki tetahi, Nana, ko Moemoea tenei te haere mai nei.
- 20
- Tena, tatou ka haere, ka patu i a ia, ka maka hoki i a ia ki tetahi poka, a ka mea, Na tetahi mohoao nanakia ia i kai: a ka kite tatou i te tukunga iho o ana moe.
- 21
- A i rongo a Reupena, a ka whakaorangia ia e ia i roto i o ratou ringaringa; a ka mea ia, Kaua ia e patua e tatou.
- 22
- A ka mea a Reupena ki a ratou, Kaua e whakahekea he toto, makā atu ia ki roto ki tenei poka i te koraha nei, kaua hoki tetahi ringaringa e pa atu ki a ia; (he mea hoki kia whakaora ai ia i a ia i roto i o ratou ringaringa, kia whakahoki ai ia i a ia ki tona papa.)
- 23
- A te taenga mai o Hohepa ki ona tuakana, na, ka huia e ratou te koti o Hohepa, te koti purepure e mau ana i a ia;
- 24
- A mauria atu ana ia, makā ana e ratou ki roto ki te poka: a e tuwhera kau ana te poka, kahore he wai o roto.
- 25
- Na, ka noho ratou ki te kai taro: a ka anga ake o ratou kanohi, a ka titiro atu ratou, na, ko tetahi tira Ihimeeri e haere mai ana i Kireara me a ratou kamera, he waha i nga mea kakara, i te pama, i te maira, e haere ana ki te kawe ki raro ki Ihipa.
- 26
- Na, ka mea a Hura ki ona tuakana ratou ko ona teina, He aha te pai o to tatou patunga i to tatou teina, o te hunanga hoki i ona toto?
- 27
- Tatou ka haere, ka hoko hoki i a ia ki nga Ihimeeri, a kaua o tatou ringa e pa ki a ia; ko to tatou teina nei hoki ia, me to tatou kikokiko. A i whakarongo mai ona tuakana ratou ko ona teina.
- 28
- A i te haerenga atu o nga Miriani, o taua hunga hokohoko; na, ka hutia ake a Hohepa e ratou i roto i te poka, a ka hokona atu a Hohepa e ratou ki nga Ihimeeri, ki nga hiriwa e rua tekau: ka kawea a Hohepa e ratou ki Ihipa.
- 29
- A te hokinga mai o Reupena ki te poka; na, kahore a Hohepa i roto i te poka; a ka haea e ia ona kakahu.
- 30
- Na, ka hoki atu ia ki ona teina, a ka mea atu, Kahore nei te tamaiti; a ko ahau, me haere ahau ki hea?
- 31
- Na, ka tango ratou i te koti o Hohepa, a ka patua e ratou tetahi kuao koati, a ka tukua e ratou te koti ki te toto;
- 32
- Na, ka hoatu e ratou te koti purepure kia kawea ki to ratou papa; a ka mea ratou, I kitea tenei e matou: tena, tirohia ko te koti ranei o to tamaiti, kahore ranei!
- 33
- A ka mohiotia e ia, a ka mea ia, Ko te koti tenei o taku tamaiti; kua kainga ia e te kirehe nanakia; kua tino haea rawatia a Hohepa!
- 34
- Na, ka haea e Hakopa ona kakahu, a ka kakahuria e ia tona hope ki te kakahu taratara, a he maha nga ra i uhungatia ai e ia tana tamaiti.
- 35
- A ka whakatika ana tamariki katoa, me ana tamahine katoa ki te whakamarie i a ia; a kihai ia i pai kia whakamarietia; a ka mea ia, Engari ka heke tangi atu ahau ki taku tamaiti ki te urupa. Na, ka uhungatia ia e tona papa.
- 36
- Na, ka hokona atu ia e nga Miriani ki Ihipa ki a Poti-whara, ki tetahi o nga tangata nui a Parao, ki te rangatira o nga kai tiaki.
Address: 
Phone: 
Email: