- 1
- A i taua wa ano ka wehe atu a Hura i roto i ona tuakana, a haere ana ki raro, a peka atu ana ki tetahi Aturami, ko tona ingoa ko Hira.
- 2
- A ka kitea e Hura i reira te tamahine a tetahi Kanaani, ko Huaha tona ingoa; na, ka tango ia i a ia, a haere ana ki roto ki a ia.
- 3
- Na, ka hapu ia, a ka whanau he tamaiti; a huaina iho e ia tona ingoa ko Ere:
- 4
- Na, ka hapu ano ia, a ka whanau he tamaiti; a huaina iho e ia tona ingoa ko Onana.
- 5
- A ka hapu ano hoki ia, a ka whanau he tamaiti; a huaina iho e ia tona ingoa ko Heraha: a i Ketipi te tane, i tona whanautanga.
- 6
- Na, ka tangohia mai e Hura he wahine ma Ere ma tana matamua, tona ingoa ko Tamara.
- 7
- A he tangata kino a Ere, te matamua a Hura, ki ta Ihowa titiro, a ka whakamatea ia e Ihowa.
- 8
- Na, ka mea a Hura ki a Onana, Haere ki roto ki te wahine a to tuakana, hei whakakapi mo te whawharua, kia whai uri ai tou tuakana.
- 9
- A i mohio a Onana e kore e waiho te uri mona; a, i tona haerenga atu ki te wahine a tona tuakana, na, ka tukua e ia kia heke atu ki te whenua, kei hoatu e ia he uri ki tona tuakana.
- 10
- A he kino taua mahi ana ki ta Ihowa titiro: na, ka whakamatea hoki ia.
- 11
- Katahi ka mea a Hura ki a Tamara ki tana hunaonga, Me noho pouaru koe ki te whare o to papa, kia kaumatua ra ano a Heraha taku tamaiti: i mea hoki ia, Kei mate ano hoki tenei, kei pera me ona tuakana. Na, ka haere a Tamara, a noho ana i te whare o tona papa.
- 12
- A ka maha nga ra, na ka mate te tamahine a Huaha, te wahine a Hura; a ka marie a Hura, a ka haere ia, raua ko Hira ko tona hoa ko te Aturami, runga ki Timinata, ki ana kai kutikuti hipi.
- 13
- A ka korerotia mai ki a Tamara, ka meatia mai, Ko tou hungawai tenei te haere mai nei ki runga ki Timinata, ki te kutikuti i ana hipi.
- 14
- Na, ka whakarere atu ia i ona kakahu pouaru, a ka hipoki i a ia ki tetahi arai, roropi tonu mai ki a ia, a ka noho i te tomokanga ki Enaima i te huarahi ki Timinata; i kite hoki ia kua kaumatua a Heraha, a kahore ano ia i hoatu noa hei wahine mana.
- 15
- Na, ka kite mai a Hura i a ia, a hua noa ia he wahine puremu; no te mea i hipokina tona mata.
- 16
- Na, ka peka atu ia ki te ara ki a ia, a ka mea atu, Tukua atu ahau, ne? kia haere atu ki a koe; (kihai hoki ia i mohio ko tana hunaonga ia.) A ka mea mai ia, He aha tau e homai ai ki a au, ki te haere mai koe ki a au?
- 17
- A ka mea atu ia, Ka tonoa mai e ahau tetahi kuao koati i roto i te kahui. A ka mea mai ia, Ka homai ranei e koe tetahi taunaha ki a au, kia tonoa mai ra ano taua mea e koe?
- 18
- A ka mea atu ia, He aha te taunaha e hoatu e ahau ki a koe? A ka mea mai ia, Ko to hiri, me to tau, me to tokotoko i to ringa. Na, ka hoatu e ia ki a ia, a ka haere atu ia ki a ia, a ka hapu ia i a ia.
- 19
- Na, ka whakatika, ia, a haere ana, a whakarerea ana e ia tona arai i hipokina ai ia, a kakahuria iho ona kakahu pouaru.
- 20
- Na, ka hoatu te kuao koati e Hura, kia kawea e tona hoa e te Aturami, ki te tiki i te taunaha i te ringaringa o te wahine; a kihai ia i kitea.
- 21
- A ka ui mai ia ki nga tangata o taua wahi, ka mea, Kei hea te wahine puremu i noho nei i Enaima i te taha o te ara? A ka mea atu ratou, Kahore he wahine puremu o konei.
- 22
- Na, ka hoki atu ia ki a Hura, a ka mea atu, Kahore ia i kitea e ahau; a e mea mai ana ano nga tangata o tera wahi, kahore he wahine puremu o reira.
- 23
- Na, ka mea mai a Hura, Tukua kia tangohia atu e ia, kei tawaia taua: titiro hoki, kua tonoa atu nei e ahau te kuao nei, a kihai ia i kitea e koe.
- 24
- A ka toru nga marama, na, ka korerotia mai ki a Hura, ka meatia mai, Kua puremu a Tamara to hunaonga; kua hapu ano hoki ia i ana puremutanga. A ka mea atu a Hura, Kawea mai ia ki waho, kia tahuna.
- 25
- A ka kawea mai ia ki waho, na, ka tono tangata atu ia ki tona hungawai, a ka mea atu, Na te tangata nana enei mea toku hapu: a i mea atu ano ia, Tena koa, tirohia, na wai enei, te hiri nei, me te tau, me te tokotoko.
- 26
- Na, ka mohiotia e Hura, a ka mea ia, Nui atu tona tika i toku; kihai hoki ia i hoatu e ahau ki a Heraha ki taku tamaiti. A kihai ia i mohio ki a ia i muri iho.
- 27
- A ka taka ki te wa e whanau ai ia, na, he mahanga kei roto i tona kopu.
- 28
- A i tona whanautanga, na, ka torona mai te ringa o tetahi: na, ka tikina atu e te kai whakawhanau, a herea ana tona ringa ki tetahi miro whero, a ka mea, Ko tenei i puta mai i mua.
- 29
- A i tana whakahokinga atu i tona ringa, na, ka puta mai tona tuakana; a ka mea ia, Ka tae to pakarutanga mai! nau te pakarutanga mai: na, ka huaina tona ingoa ko Parete.
- 30
- A, muri iho ka puta mai tona teina, i herea nei tona ringa ki te miro whero: a ka huaina tona ingoa ko Teraha.
Address: 
Phone: 
Email: