- 1
- Ka tu ahau ki taku mahi tiaki, ka whakarite ano hoki i a au ki te taumaihi, ka tutei atu, ka titiro atu, ko te aha e kīa mai e ia ki a au, ko te aha ano hoki e whakahokia e ahau hei utu mo taku tautohetohenga.
- 2
- Na, ka utua mai taku e Ihowa; i ki mai ia, Tuhituhia te whakakitenga, kia mārama rawa i runga i nga papa, kia tere ai te kai korero o taua mea.
- 3
- No te mea tenei ake ko te mea i puta atu ra, kei te wa i whakaritea; kei te mutunga hoki te korero ai, e kore ano e teka: ahakoa roa, taria atu; no te mea kua takoto rawa he putanga atu mona; e kore e whakaroa.
- 4
- Nana, kahore e tika i roto i a ia tona ngakau whakakake: ma te whakapono ia ka ora ai te tangata tika.
- 5
- Ae ra hoki, kua he hoki ia i te waina, he tangata whakapehapeha, kahore e ata noho; tona hiahia whakanuia ake e ia, ano ko te po, kei te mate tona rite, e kore ano e makona, e whakaramemenetia ana hoki e ia nga iwi katoa ki a ia, e huihuia mai ana hoki nga tangata katoa ki a ia:
- 6
- E kore ianei e whakahuatia e enei katoa he kupu whakatauki mona, he whakapeka taunu ano hoki mona, a ka mea, Aue te mate mo te tangata e whakanui ana i te mea ehara nei i a ia! he pehea ra te roa? mo te tangata ano hoki e haupu ake ana i te paru matotoru ki runga ki a ia!
- 7
- E kore ianei e maranga tata ake nga kai ngau mou? e kore ianei e ara nga kai whakatoi i a koe, a ka waiho koe hei taonga pārau mo ratou?
- 8
- He maha nga iwi i pahuatia e koe, na, ka pahuatia koe e nga toenga katoa o nga iwi, mo te toto hoki o te tangata, mo te mahi nanakia o te whenua, o te pa, o nga tangata katoa ano hoki i reira.
- 9
- Aue te mate mo te tangata, he kino nei te apo i apo taonga ai ia mo tona whare, he mea kia tiketike ake ai tona kohanga, kia ora mai ai ia i te kaha o te kino!
- 10
- Kua whakatakotoria e koe he whakaaro whakama mo tou whare i to hatepenga atu i nga iwi maha; kua hara ano hoki ki tou wairua ake.
- 11
- Ka karanga mai hoki te kohatu i roto i te pakitara, ka whakahoki kupu mai ano te kurupae i roto i nga rakau.
- 12
- Aue te mate mo te tangata e hanga ana i te pa ki nga toto, e whakau ana hoki i te pa ki te he!
- 13
- He teka ianei na Ihowa o nga mano i mauiui ai nga tangata i roto i te ahi, i ruha ai nga iwi i te kahore noa iho?
- 14
- No te mea ka kapi te whenua i te matauranga ki te kororia o Ihowa, ano ko nga wai e taupoki ana i te moana.
- 15
- Aue te mate mo te tangata e mea ana i tona hoa kia inu, e whakaneke atu ana i to pounamu ki a ia, whakahaurangitia iho, kia titiro atu ai koe ki a ratou e takoto tahanga ana!
- 16
- He whakama, ehara i te kororia, te mea i ngata ai to ngakau: inumia ano e koe, kia takoto kau ano hoki to kiri matamata: ka anga mai ki a koe te kapa a to Ihowa ringa matau, he hanga whakama ano hoki te ruaki i runga i to kororia.
- 17
- No te mea ka taupokina koe e te mahi tutū o Repanona, ka mataku ano hoki ratou i te pahuatanga a nga kararehe, mo te toto hoki o nga tangata, mo te mahi tutū ano hoki o te whenua, o te pa, o nga tangata ano hoki o reira.
- 18
- He aha te painga o te whakapakoko i te mea kua oti ia te whaowhao e tona kai hanga, o te whakapakoko whakarewa ano hoki, o te kai whakaako ano ki te teka, i te mea ka whakawhirinaki tona kai hanga ki tana mahi, i a ia ra i hanga i nga whakapakoko reo-kore?
- 19
- Aue te mate mo te tangata e mea ana ki te rakau, Maranga; ki te kohatu reo-kore, E ara, mana e whakaako! Nana, kua oti te koura, te hiriwa, te whakapiri ki a ia, kahore rawa ano hoki he wairua i roto.
- 20
- Kei tona temepara tapu ia a Ihowa. Whakarongoa, e te whenua katoa, i tona aroaro.
Address: 
Phone: 
Email: