- 1
- Te poropititanga i kitea e Hapakuku poropiti.
- 2
- Kia pehea te roa, e Ihowa, o taku tangi, a kahore koe e rongo? o taku karangatanga atu ki a koe mo te tutu, a kahore koe e whakaora?
- 3
- He aha koe i whakakite mai ai i te kino ki a au? he aha ahau i meinga ai e koe kia kite i te mamae? he pahua hoki, he tutū tenei kei toku aroaro, he kai whakaoho ano enei i te totohe, i te ngangare.
- 4
- Na reira kaha-kore noa iho te ture, kore tonu ake te putanga atu o te whakarite whakawa: no te mea e karapotia ana te tangata tika e te tangata kino: no reira, te putanga atu o te whakarite whakawa, he mea parori ke.
- 5
- Titiro atu ki nga tauiwi, matakitaki, kia nui te miharo; no te mea ka mahia e ahau he mahi i o koutou ra, he mea e kore e whakaponohia, ki te mea ka korerotia atu.
- 6
- No te mea tenei ka ara i a au nga Karari, taua iwi nanakia, taua iwi e takare tonu ana, a ka haere atu ratou i te whanuitanga o te whenua, kia riro ai i a ratou nga kāinga ehara nei i a ratou.
- 7
- He hanga whakamataku ratou, he mea wehi: no ratou ano te putanga ake o te whakarite whakawa mo ratou, o to ratou nui ano.
- 8
- He tere rawa ano hoki o ratou hoiho i nga reparo, he nanakia rawa i nga wuruhi o te ahiahi: ka tohatoha noa atu ano hoki o ratou kai eke hoiho, ka haere mai ano o ratou kai eke hoiho i tawhiti; ta ratou rere rite tonu ki to te ekara e hohoro ana ki te kai.
- 9
- Ratou katoa he mahi nanakia te mea e haere mai ai, ano ko te marangai o ratou kanohi e horo ana i te whenua, me te mea he puehu nga whakarau ka whakaramemenetia mai e ratou.
- 10
- Ka taunu ano ratou ki nga kingi, hei whakakatanga mai ano hoki ma ratou nga rangatira: ka kata ratou ki nga pa taiepa katoa; ka opehia ake hoki he puehu e ratou, a riro tonu iho i a ratou.
- 11
- Ko reira tona wairua puta ke ai, a ka tika tonu atu ia, ka mahi he; tenei kaha ona kīa ake e ia na tona atua.
- 12
- He teka ianei no namata riro koe, e Ihowa, e toku Atua, e toku Mea Tapu? e kore matou e mate. Kua waiho ratou e koe, e Ihowa, mo te whakarite whakawa; kua whakapumautia ano ratou e koe, e te Kamaka, mo te whiu.
- 13
- He kanohi ma rawa ou, e kore koe e titiro atu ki te kino, e kore ano e ahei kia matakitaki koe ki te kino: he aha koe i matakitaki ai ki te hunga tinihanga, i whakarongo puku ai i te mea ka horomia e te tangata kino te tangata e tika rawa ana i a ia?
- 14
- He aha nga tangata i meinga ai e koe kia rite ki nga ika o te moana, ki nga mea ngokingoki kahore nei o ratou kai whakahaere tikanga?
- 15
- E tangohia ake ana ratou katoa ki te matau, e riro mai ana i roto i ā ratou kukuti, e haoa ana ki ā ratou kupenga: na reira koa ana ratou, whakamanamana ana.
- 16
- Koia ratou i mea ai ki ta ratou kukuti, a tahu whakakakara ana ratou ki ta ratou kupenga; no te mea na aua mea i whai ngako ai ta ratou wahi, i momona ai ta ratou kai.
- 17
- He mea ano ranei tera e whakawateatia ai e ratou ta ratou kukuti, a kore iho e tohungia nga iwi e patua tonutia ana?
Address: 
Phone: 
Email: