Hosea Chapter 14 - Paipera Tapu 1868

1: Hoki mai, e Iharaira, ki a Ihowa ki tou Atua; kua taka hoki koe i to he.
2: Tikina atu etahi kupu ma koutou, tahuri mai hoki ki a Ihowa: mea atu ki a ia, Whakakahoretia katoatia atu te he, kia pai marie mai ano koe ki a matou, a ka hoatu e matou nga kuao kau, ara, o matou ngutu.
3: E kore matou e ora i a Ahuru; e kore matou e eke hoiho, a heoi ano a matou kianga atu ki te mahi a o matou ringaringa, Ko o matou atua: e arohaina ana hoki te pani e koe.
4: Ka rongoatia e ahau to ratou tahuritanga ketanga, ka aroha ahau ki a ratou, he mea utu-kore: no te mea kua tahuri atu taku riri i a ia.
5: Taku ki a Iharaira ka rite ki te tomairangi, ka rite tona tupu ki to te rengarenga, te totoro o ona pakiaka ka rite ki to Repanona.
6: Ka tautoro noa atu ona manga, ka rite ano hoki tona ataahua ki to te oriwa, tona kakara ki to Repanona.
7: Te hunga e noho ana i raro i tona taumarumarunga iho ka hoki mai: ka ora ake ratou, ka pera me te witi, ka rite to ratou tupu ki to te waina: tona kakara ka rite ki to te waina o Repanona.
8: Tera a Eperaima e ki, Hei aha ake maku nga whakapakoko? kua rongo ahau ki a ia, kua kite i a ia; toku rite kei te kauri matomato. Ka kitea ki a au he hua mou.
9: Ko wai te mea whakaaro nui hei mātau ki enei mea? ko wai te mea tupato e mohiotia ai? tika tonu hoki nga ara o Ihowa, a ka haere te hunga tika i reira, ka taka ano hoki te hunga he i reira.