- 1
- Te kupu a Ihowa i puta mai ki a Hoere tama a Petuere.
- 2
- Whakarongo mai ki tenei, e nga kaumatua, kia whai taringa koutou, e nga tangata katoa o te whenua. I o koutou rangi ranei tenei, i nga rangi ranei o o koutou mātua?
- 3
- Korerotia taua mea ki ā koutou tamariki, ma a koutou tamariki ano hoki e korero ki ā ratou tamariki, a ma a ratou tamariki e korero ki tetahi atu whakatupuranga.
- 4
- Te toenga a te whangawhanga pau ake i te mawhitiwhiti; te toenga a te mawhitiwhiti pau ake i te tatarakihi: a te toenga a te tatarakihi pau ake i te moka.
- 5
- E ara, e te hunga e haurangi ana i te waina, e tangi; e aue, e nga kai inu waina katoa, ki te waina hou kua whakakorea nei ma o koutou mangai.
- 6
- Kei te haere mai tetahi iwi ki runga ki toku whenua, he kaha, e kore e taea te tatau, ona niho he niho raiona, he niho pūrakau ona no te raiona katua.
- 7
- Kore ake i a ia taku waina, taku piki tihorea ake e ia: poto rawa te peha i a ia, akiri rawa; ona manga ma tonu.
- 8
- E tangi, kia rite ki te tamahine kua oti te whitiki ki te kakahu taratara, ina tangi ki te makau o tona tamahinetanga.
- 9
- Kua whakakahoretia te whakahere toto-kore me te ringihanga i roto i te whare o Ihowa; kei te tangi nga tohunga, nga minita a Ihowa.
- 10
- Kua he te mara, kei te tangi te oneone; no te mea kua mate te witi: kua maroke te waina hou, kua kaha-kore te hinu.
- 11
- Kia whakama koutou, e nga kai ngaki whenua, e aue, e nga kai mahi waina, he whakaaro ki te witi, ki te parei; kua kore nei hoki nga hua o te mara.
- 12
- Kua maroke te waina, kua putokitoki te piki, te pamekaranete, te nikau ano hoki, te aporo, nga rakau katoa o te whenua, kua maroke: kua maroke nei hoki te koa i roto i nga tamariki a te tangata.
- 13
- Tātuaina, e tangi, e nga tohunga, e aue, e nga minita o te aata: haere mai, hei te mea taratara he kakahu mo koutou i te po, e nga minita o toku Atua: kua kore nei hoki te whakahere toto-kore me te ringihanga i roto i te whare o to koutou Atua.
- 14
- Whakatapua he noho puku, karangatia he huihuinga nui, whakaminea mai nga kaumatua, nga tangata katoa o te whenua, ki te whare o Ihowa o to koutou Atua, ka karanga atu ki a Ihowa.
- 15
- Aue te mate o taua ra nei! kua tata hoki te ra o Ihowa, ka rite ano hoki tona putanga mai ki te whakangaromanga a te Kaha-rawa.
- 16
- He teka ianei kua hatepea atu te kai i mua, atu i o tatou kanohi, me te koa ano hoki raua ko te whakamanamana i roto i te whare o to tatou Atua?
- 17
- Kua pirau te purapura i raro i nga pokurukuru, kua takoto kau nga whare kai, kua pakarukaru nga whare witi; no te mea kua ngingio te witi.
- 18
- Ano te aue o nga kararehe! raruraru ana nga kahui kau i te kore wahi kai ma ratou; nga kahui hipi ano hoki hē noa iho.
- 19
- E Ihowa, ka karanga atu ahau ki a koe: kua pau hoki i te ahi nga wahi kai o te koraha, kua wera i te mura nga rakau katoa o te parae.
- 20
- Kei te tangi ano hoki nga kararehe o te parae ki a koe: no te mea kua maroke nga awa wai, kua pau hoki i te ahi nga wahi kai o te koraha.
Address: 
Phone: 
Email: