- 1
- Te kupu ma koutou ki o koutou tuakana, ki o koutou teina, Ko Ami; ki o koutou tuahine, Ko Ruhama.
- 2
- Whakawakia to koutou whaea, whakawakia: ehara hoki ia i te wahine naku, ehara ano hoki ahau i te tahu nona: na, kia whakarerea atu e ia ana puremutanga i tona aroaro, ana moe tahae i waenga i ona u.
- 3
- Kei tangohia ona e ahau, a ka noho tahanga ia, kei meinga ano ia kia rite ki te ra i whanau ai ia; kei meinga ia e ahau kia rite ki te koraha, kei waiho ia hei whenua wai-kore, a ka mate i te mate-wai.
- 4
- E kore ano ana tamariki e tohungia e ahau; no te mea he tamariki ratou na te puremu.
- 5
- Kua puremu nei hoki to ratou whaea: he mahi whakama ta te wahine i whanau ai ratou: i mea hoki ia, Ka whaia e ahau te hunga i aroha ki a au, i homai nei i te taro maku, i te wai moku, i te huruhuru hipi moku, i te muka maku, i te hinu maku, i te mea ano hoki hei inu maku.
- 6
- Mo reira tenei au te tutaki nei i to ara ki nga tataramoa, te hanga nei i te taiepa, e kore ai ia e kite i ona huarahi.
- 7
- Ka whaia ano e ia ana i aroha ai, heoi e kore e mau i a ia; ka rapua ano ratou e ia, otiia e kore e kitea: katahi ia ka mea ake, Ka haere ahau ka hoki ki taku tahu tuatahi; nui ake hoki to reira pai ki a au i to naianei.
- 8
- Kihai na hoki ia i mohio naku i hoatu te witi ki a ia, me te waina, me te hinu, naku ano i whakanui te hiriwa mana, me te koura, ta ratou i mahi nei hei mea ma Paara.
- 9
- Mo reira ka hoki atu ahau, a ka tangohia mai e ahau taku witi i tona wa ano, me taku waina i tona wa ano, ka riro mai ano i a au taku huruhuru hipi me taku muka i hipokina ai ia, i a ia e noho tahanga ana.
- 10
- Na, akuanei ka whakakitea e ahau tana mahi wairangi ki nga kanohi o ana i aroha ai, e kore ano tetahi tangata e whakaora i a ia i roto i toku ringaringa.
- 11
- Ka whakamutua katoatia ano hoki e ahau tona koa, ana rangi hakari, ana kowhititanga marama, ana hapati, me ana hakari nui katoa ano hoki.
- 12
- Ka whakaururuatia ano hoki e ahau ana waina, ana piki, era i ki ai ia, Ko aku utu enei, he mea homai na aku i aroha ai; ka meinga ano e ahau hei ngahere, a ka kainga e te kirehe o te parae.
- 13
- Ka whiua ano ia e ahau mo nga ra o Paarimi, mo era i tahu whakakakara ai ia ki a ratou, a whakapaipai ana i a ia ki ona whakakai, ki ana whakapaipai, haere ana ki te whai i ana i aroha ai, wareware ake ki a au, e ai ta Ihowa.
- 14
- Mo reira, nana, ka whakawaia ia e ahau, ka kawea ano hoki ia e ahau ki te koraha, ka korero whakamarie ano hoki ahau ki a ia.
- 15
- Ka hoatu ano hoki e ahau etahi mara waina ki a ia i reira, me te raorao o Akoro hei kuwaha mo te tumanako, a ka waiata ia ki reira, ka pera ano me to nga ra o tona tamarikitanga, me to te ra ano hoki i haere mai ai ia i te whenua o Ihipa.
- 16
- Na, i taua rangi ano, e ai ta Ihowa, ka karangatia ahau e koe, E Ihi, e kore ano ahau e karangatia e koe, E Paari, a muri ake nei.
- 17
- No te mea ka tangohia mai e ahau aua ingoa a Paarimi i roto i tona mangai, e kore ano hoki ratou, o ratou ingoa, e maharatia a muri ake nei.
- 18
- Ka whakaritea ano hoki e ahau i taua rangi he kawenata, he pai mo ratou, ki nga kirehe o te parae, ki nga manu o te rangi, ki nga mea ngokingoki o te oneone, ka whati ano i a au te kopere, te hoari, te whawhai i runga i te whenua, a ka meinga ratou e ahau kia au te takoto.
- 19
- Ka taumautia ano koe e ahau maku, a ake ake ake, ina, ka taumautia koe e ahau maku i runga i te tika, i te whakarite whakawa, i te aroha, i te atawhai.
- 20
- Ka taumautia ano koe maku i runga i te pono, a ka mohio koe ki a Ihowa.
- 21
- I taua rangi ano ka whakarongo ahau, e ai ta Ihowa, ka whakarongo ahau ki nga rangi, a ka whakarongo ratou ki te whenua;
- 22
- Ka whakarongo ano te whenua ki te witi, ki te waina, ki te hinu; a ka whakarongo era ki a Ietereere.
- 23
- Ka whakatokia ano hoki ia maku ki te whenua, ka tohungia ano hoki e ahau tenei kihai nei i tohungia, ka ki atu ano hoki ahau ki te hunga ehara nei i te iwi noku, Ko koe toku iwi, a ka mea tera, Ko koe toku Atua.
Address: 
Phone: 
Email: