- 1
- Te poropititanga mo Papurona i kitea e Ihaia tama a Amoho.
- 2
- Ki runga ki te maunga tiketike tu ai te kara, kia rahi te reo ki a ratou, tawhiritia atu te ringa kia haere mai ai ratou ki roto ki nga kuwaha o nga rangatira.
- 3
- Kua oti aku i whakatapu ai te whakahau, kua karangatia ano hoki e ahau aku marohirohi ki taku riri, ara, te hunga e koa ana ki toku nui.
- 4
- Te haruru o te huihui i runga i nga maunga, tona rite kei to te iwi nui, he haruru, he ngangau no te huihui o nga kingitanga o nga iwi: e whakahaerea ana e Ihowa o nga mano te ope mo te whawhai.
- 5
- Te haere mai nei ratou i tawhiti, i te pito o te rangi, a Ihowa, ratou ko nga patu a tana riri, ki te whakangaro i te whenua katoa!
- 6
- E aue koutou, kua tata hoki te ra o Ihowa. Tera e puta mai, ano he whakangaromanga na te Kaha rawa.
- 7
- Ngoi-kore iho nga ringaringa katoa, ngohe noa iho nga ngakau katoa o nga tangata.
- 8
- Ka ohorere ano ratou: mau pu ratou i nga mamae, i nga whakapouri; to ratou mamae koia ano kei to te wahine e whakawhanau ana: miharo ana ratou tetahi ki tetahi, o ratou mata, ano he mura ahi.
- 9
- Nana, te haere mai nei te ra o Ihowa, he nanakia, he riri, he whakatakariri e mura ana, hei whakaururua i te whenua, ka whakangaromia atu ano hoki e ia o reira tangata hara.
- 10
- Na, nga whetu o te rangi, o reira whetu nui ano hoki, kore ake to ratou māramatanga, pouri noa iho te ra i tona haerenga mai, kore ake e titi te atarau.
- 11
- Ka whiua ano hoki e ahau te kino o te ao, te hunga kino ano hoki, mo to ratou he, ka mutu ano i a au te whakapehapeha o te hunga whakakake, ka whakahokia iho ano ki raro te whakapehapeha o te hunga tukino.
- 12
- Ka meinga ano e ahau kia nui atu te utu mo te tangata i to te koura pai; ae ra, he tangata, kia nui atu i to te koura para-kore o Opira.
- 13
- Na, ka whakaoioia e ahau nga rangi, ka ruperupea atu ano hoki te whenua i tona wahi, he riri na Ihowa o nga mano, he ra ano e mura ai tana riri.
- 14
- A ka rite ki te aneterope e whaia ana, ki nga hipi ano hoki kahore nei o ratou kai huihui, ka tahuri atu ratou ki tona iwi, ki tona iwi, ka rere ki tona whenua, ki tona whenua.
- 15
- Te hunga katoa e kitea ana, ka werohia, te hunga katoa e uru ana ki roto ki a ratou, ka hinga i te hoari.
- 16
- Ka taia iho hoki a ratou kohungahunga i ta ratou tirohanga atu, ka pahuatia o ratou whare, ka moea ano hoki a ratou wahine.
- 17
- Tenei au te whakaoho atu nei i nga Meri ki a ratou, he hunga e kore nei e whakaaro ki te hiriwa; na, te koura, e kore e matenuitia e ratou.
- 18
- Ka taia iho ano hoki nga taitamariki e a ratou kopere; e kore ano e tohungia e ratou nga hua o te kopu; e kore o ratou kanohi e manawapa ki nga tamariki.
- 19
- Na, Papurona nei, te mea ataahua o nga kingitanga, te kororia nui whakaharahara o nga Karari, tona rite kei ta te Atua hurihanga i a Horoma raua ko Komora.
- 20
- E kore e nohoia, a, ake ake, e kore e waiho hei kāinga, a, tena whakatupuranga, tena whakatupuranga; e kore ano e whakaturia e te Arapi tona teneti ki reira, e kore ano a reira e takotoria e nga hepara.
- 21
- Engari hei takotoranga a reira mo nga kuri mohoao o te koraha, ka ki ano o ratou whare i nga kararehe kino, hei nohoanga ano a reira mo nga tamahine a te ruru, ka tupekepeke ano nga mea ahua koati ki reira.
- 22
- Ka tangi ana hoki nga kuri mohoao i roto i o ratou whare kingi, me nga tarakona i roto i o ratou whare ataahua: kua tata mai ano hoki tona wa, e kore ano ona ra e roa.
Address: 
Phone: 
Email: