- 1
- No te mea ka aroha a Ihowa ki a Hakopa, tera ano a Iharaira ka whiriwhiria ano e ia; ka meinga ano ratou kia ata noho ki to ratou oneone; ka piri mai ano te tangata ke ki a ratou, ka uru ano hoki ki roto ki te whare o Hakopa.
- 2
- A e tango ano nga iwi i a ratou, e kawe i a ratou ki to ratou wahi, riro tonu iho ratou i te whare o Iharaira hei pononga tane, hei pononga wahine i te oneone a Ihowa: a hei whakarau ma ratou o ratou kai whakarau, ko ratou ano hei rangatira mo o ratou kai tukino.
- 3
- I taua rangi ano ka meinga koe e Ihowa kia okioki i tou pouritanga, i tou wehi, i te mahi pakeke ano hoki i whakamahia ai koe.
- 4
- Ko reira ano maranga ai tenei waiata au mo te kingi o Papurona, ka mea hoki koe, Anana! mutu pu te kai tukino, mutu pu ta te pa koura!
- 5
- Whati ana i a Ihowa te tokotoko o te hunga kino, te hepeta o nga kingi.
- 6
- Te kai patu o nga iwi, he riri nei tana, he patu kihai i mutu, i runga nei i te riri tana kawanatanga i nga iwi, ko ia ano e whakatupuria kinotia ana, kahore he kai araarai.
- 7
- Kua whai okiokinga, kua ata noho te whenua katoa, pakaru mai ana te waiata.
- 8
- Nga kauri ano hoki, koa noa iho ratou ki a koe, me nga hita ano o Repanona; e ki mai ana, No tou takotoranga i kore ai te kai tapahi e haere mai ki a matou.
- 9
- Te reinga i raro, oho ana i a koe, he tutakitanga ki a koe i to taenga atu; he meatanga ki a koe i whakaarahia ai e ia nga tupapaku katoa, nga mea nui o te whenua; maranga ana i a ia nga kingi katoa o nga iwi i runga i o ratou torona.
- 10
- Kei te korero nei ratou katoa ki a koe,—ta ratou kupu, Ko koe ano hoki?—kua ngoi-kore ano koe? kua penei ranei me matou; kua rite koe ki a matou?
- 11
- Kua oti tou kororia te whakahoki iho ki te urupa, me te rangi ano o o hatere: te whariki mou ko te kutukutu, te hipoki mou ko nga toke.
- 12
- Anana! taka iho ana koe, e Tawera, e te tama a te ata, tapahia iho ana koe, e te kai whakangoi-kore o nga iwi!
- 13
- Nau hoki i mea i roto i tou ngakau, Ka piki ahau ki runga ki te rangi, ka whakanekehia ake e ahau toku torona ki runga i nga whetu a te Atua, ka noho ano ahau ki te maunga o te whakaminenga, ki nga taha ki te nota.
- 14
- Ka pikitia e ahau nga wahi tiketike o nga kapua; ka rite ahau ki a te Nui rawa.
- 15
- Heoi kua whakahokia na koe ki te reinga, ki nga taha o te rua.
- 16
- Te hunga e kite i a koe, matatau tonu mai ta ratou titiro ki a koe, me ta ratou ata whakaaroaro ano, Ko te tangata ianei tenei i wiri ai te whenua, i ngaueue ai nga rangatiratanga;
- 17
- I mea nei i te ao hei koraha, wahia ana e ia ona pa; kihai i whakapuaretia te whare o ana herehere?
- 18
- Nga kingi o nga iwi, ratou katoa takoto ana i tona whare, i tona whare, i runga i te kororia.
- 19
- Ko koe ia he mea maka mai i roto i tou urupa, ano he peka e whakariharihangia ana, ano he kakahu no te hunga i patua, i werohia ki te hoari, e haere ana ki raro ki nga kohatu o te rua; ano he tinana i takatakahia e te waewae.
- 20
- E kore te tanumanga mou e huihuia ki to ratou, mou i whakangaro i tou whenua, i patu i tou iwi: e kore te uri o nga kai mahi kino e whai ingoa, ake ake ake.
- 21
- Kia takoto tata te whakamate mo ana tamariki, mo te he hoki o o ratou mātua; kei kake ratou, kei riro ano i a ratou te whenua, kei kapi te mata o te ao i o ratou pa.
- 22
- Ka whakatika atu hoki ahau ki a ratou, e ai ta Ihowa o nga mano, ka tapahia atu ano hoki e ahau te ingoa me te toenga o Papurona, te tamaiti me te iramutu, e ai ta Ihowa.
- 23
- Ka meinga ano a reira e ahau hei kāinga mo te matuku; hei harotoroto wai, ka purumatia ano e ahau ki te puruma o te whakangaromanga, e ai ta Ihowa o nga mano.
- 24
- Kua oati a Ihowa o nga mano, kua mea, Ina, taku i whakaaro ai, kei tena ano te otinga; taku i whakatakoto ai, u tonu.
- 25
- Ara, mo te Ahiriana ka whati i a au ki toku whenua, ka takatakahia ano hoki i runga i oku maunga: ko reira tana ioka marere atu ai i runga i a ratou; ka marere ano hoki tana pikaunga i runga i o ratou pokohiwi.
- 26
- Ko te whakaaro tenei ka whakatakotoria nei mo te whenua katoa, ko te ringa ano tenei ka whakamarokia atu nei ki nga iwi katoa.
- 27
- Kua whakatakotoria hoki e Ihowa o nga mano, a ma wai e whakataka? kua whakamarokia tona ringaringa, a ko wai hei mea kia pepeke?
- 28
- No te tau i mate ai a Kingi Ahata tenei poropititanga.
- 29
- Kei koa koe, e Pirihitia katoa, no te mea kua whati te rakau a te kai whiu i a koe: tera hoki e puta ake te neke i roto i te pakiaka o te nakahi, a, tona hua ko te nakahi tuaahi nei e rere ana.
- 30
- A ka kai nga matamua a nga ware, ka takoto ano nga rawa-kore, tē ai he wehi; ka whakamatea ano e ahau tou pakiaka ki te hemo kai, mana hoki ou morehu e patu.
- 31
- E aue, e te kuwaha; hamama, e te pa; harotu kau koe, e Pirihitia katoa: e puta mai hoki he paowa i te nota: e kore tetahi e puta kotahi mai i te wa i whakaritea mona.
- 32
- He aha ra te kupu e whakahokia atu ki nga karere o te iwi? Ara na Ihowa a Hiona i whakatu a ka whakawhirinaki nga rawa-kore o tona iwi ki reira.
Address: 
Phone: 
Email: