- 1
- Ungā atu he reme ki te rangatira o te whenua, i Hera ki te koraha, tae noa ki te maunga o te tamahine a Hiona.
- 2
- Kei te manu haereere noa hoki, he mea maka mai i roto i te kohanga, te rite o nga tamahine a Moapa i nga whitinga atu i Aranono.
- 3
- Whakatakotoria he whakaaro, mahia he whakarite whakawa, kia rite ki te po to whakamarumarunga iho i te poutumarotanga; hunā te hunga i peia atu, kaua e whakaaturia atu te tangata e atiutiu noa ana.
- 4
- Kia noho, e Moapa, ki a koe aku tangata e peia ana, ko koe ano hei piringa mo ratou kei mate i te kai pahua: kua kore hoki te kai whakate, mutu pu ta te kai pahua, kua poto atu nga kai whakatupu-kino i runga i te whenua.
- 5
- A ka whakapumautia te torona i runga i te tohu-tangata: ka nohoia iho ano hoki e ia i runga te pono i roto ano i te tapenakara o Rawiri, a, tana, he whakarite whakawa, he rapu i te tikanga o te whakawa, he whakahohoro i te tika.
- 6
- Kua rongo tatou ki te whakakake o Moapa; nui atu tona whakakake; ki tona whakapehapeha, ki tona whakakake, ki tana riri; kahore he tikanga i ana korero teka.
- 7
- Mo reira ka aue a Moapa ki a Moapa, ka aue katoa, ka ngungurutia e koutou nga turanga o Kiri-harehete; he tika rawa kua patua ratou.
- 8
- Kua kore hoki te kaha o nga mara o Hehepono, o te waina ano o Hipima, he mea whatiwhati na nga rangatira o nga iwi ona waina pai rawa i tae atu nei ki Iatere, i kopikopiko i te koraha: i totoro tonu ona peka, i whiti ki tera taha o te moana.
- 9
- Mo reira ka tangihia e ahau te waina o Hipima, kei te tangihanga mo Iatere te rite: ka whakamakuku ahau i a koe ki oku roimata, e Hehepona, e Ereare; kua kore hoki te hamamatanga mo o hua raumati mo to tapahanga witi.
- 10
- Kua whakakahoretia ano hoki te hari, me te koa ano i te mara momona; kahore hoki he waiata i nga mara waina, kahore he hamamatanga; e kore nga kai takahi e takahi waina i ā ratou poka waina; kua whakamutua e ahau to ratou hamamatanga.
- 11
- Na reira, ano he hāpa oku whekau e tangi ana ki a Moapa, a roto ano i a au ki Kiri-harehe.
- 12
- A, te otinga, ka kitea kua hoha a Moapa i runga i te wahi tiketike, na, ka haere atu ki tona wahi tapu inoi ai; heoi e kore tana e taea.
- 13
- Ko te kupu tenei i korerotia e Ihowa mo Moapa i mua.
- 14
- Kua korero ano a Ihowa inaianei, kua mea, Kia toru nga tau, (nga tau ano o te kai mahi,) a ka whakahaweatia te kororia o Moapa, me taua mano tini ano hoki, a he iti rawa te toenga, he kaha-kore.
Address: 
Phone: 
Email: