- 1
- Te poropititanga mo Ramahiku. Nana, kua whakakahoretia a Ramahiku hei pa e puranga kau ana.
- 2
- Kua mahue nga pa o Aroere; mo nga kahui era, ka takoto ratou, tē ai he kai whakawehi.
- 3
- Ka whakakorea ano hoki he pa kaha mo Eperaima, he kingitanga ano hoki mo Ramahiku, mo te toenga ano o Hiria: ka rite ratou ki te kororia o nga tamariki a Iharaira, e ai ta Ihowa o nga mano.
- 4
- I taua rangi ano ka whakaititia te kororia o Hakopa, ka hiroki haere ano hoki te ngako o ona kikokiko.
- 5
- Ka rite ano hoki ki ta te kai tapahi kohikohinga i te witi, ki te tapahanga ano a tona ringa i nga hua witi, ka rite ki te hamunga o nga hua witi i te raorao i Repaima.
- 6
- Otiia e toe ano etahi karepe hei hamunga; ka rite ki te ruiruinga o te oriwa; e rua, e toru nga oriwa i te pito o to runga rawa peka, e wha, e rima i te peka i waho rawa, i te mea whai hua, e ai ta Ihowa, ta te Atua o Iharaira.
- 7
- I taua rangi ka titiro te tangata ki tona Kai hanga, ka anga ano ona kanohi ki te Mea Tapu o Iharaira.
- 8
- E kore ano e titiro atu ki nga aata i hangā nei e ona ringaringa, e kore hoki e anga atu ki te mea i mahia e ona maihao, ki nga ngahere, ki nga whakapakoko.
- 9
- I taua rangi ka rite ona pa kaha ki te rakau i whakarerea, ki te peka ano hoki o runga i whakarerea nei i te aroaro o nga tamariki a Iharaira; na, ko te whakangaromanga.
- 10
- Na, kua wareware nei koe ki te Atua o tou whakaoranga, a kihai i mahara ki te kamaka o tou kaha, mo reira ka whakatupuria e koe nga mea ataahua, ka whakatokia ano hoki ki nga peka ke:
- 11
- I te awatea ka meinga e koe to rakau kia tupu, i te ata matomato tonu tau i whakato ai: i te kotinga witi he puranga kau, te ra o te pouri, o te mamae nui whakaharahara.
- 12
- Aue, te huihui nui o nga iwi maha! to ratou ngangau, ano he haruru no nga moana, te nge ano hoki o nga iwi! to ratou nge, koia ano kei te turituri o nga wai nui.
- 13
- Me te mea ko te turituri o nga wai maha te nge o nga iwi; otiia ka riria ratou, a ka rere ki tawhiti, ka whaia ano hoki, ano he papapa no nga maunga i te upoko o te hau, ano he mea porotaka e aia ana e te tukauati.
- 14
- I te ahiahi, na, ko te pawera; kiano i puao kua kore ia. Ko te wahi tenei ma te hunga e pahua ana i a tatou, ko te mea tenei e wehea ma te hunga e muru ana i a tatou.
Address: 
Phone: 
Email: