- 1
- Te poropititanga mo te koraha o te moana. Ka rite ki nga paroro i te tonga e pupuhi ana tona haerenga mai i te koraha i te whenua e wehingia ana.
- 2
- He kino rawa te whakakitenga kua whakaaturia mai nei ki a au; kei te tinihanga te tangata tinihanga, kei te pahua te kai pahua. Whakaekea, e Erama; whakapaea, e Meria; mutu pu i a au nga auetanga katoa o reira.
- 3
- No reira ki tonu toku hope i te mamae, whakawiri rawa nga mea e ngau nei i a au, ano ko te whakawiringa o te wahine e whakawhanau ana: piko ana ahau i te rongonga ai, ohorere ana i te kitenga ai.
- 4
- Pohehe ana toku ngakau, wehi iho ahau, pawera iho, te po i ahuareka atu ai ahau, puta ke ana hei mea whakamataku ki a au.
- 5
- Whakapaia te tepu, tirotiro atu i runga i te whare tutei, e kai, e inu: whakatika, e nga rangatira, pania te whakangungu rakau.
- 6
- Ko ta te Ariki kupu hoki tenei ki a au, Tikina, whakaturia he kai tutei, mana e whakaatu mai tana e kite ai.
- 7
- Na, ka kitea atu e ia he hariata, me nga tangata eke hoiho tokorua, he hariata kaihe, he hariata kamera; ata whakarongo marie ana ia.
- 8
- Katahi tera ka karanga mai, ano he raiona, Kei runga ahau, e toku Ariki, i te whare tutei e tu tonu ana i te awatea; pau katoa ano nga po i a au e tu nei i taku mahi tiaki.
- 9
- Nana, tenei te haere mai nei tetahi hariata tangata, me nga kai eke hoiho tokorua. Na ka oho mai ano ia, ka mea, Kua horo a Papurona, kua horo; nga whakapakoko katoa ano hoki o ona atua wawahia iho e ia ki te whenua.
- 10
- E taku patunga witi, e te witi o taku patunga, taku i rongo ai ki a Ihowa o nga mano, ki te Atua o Iharaira, te whakaaturia atu nei e ahau ki a koutou.
- 11
- Te poropititanga mo Ruma. E karanga mai ana ia ki a au i Heira, E te kai tiaki, ko te aha i te po? E te kai tiaki, ko te aha i te po?
- 12
- Ta te kai tiaki i ki mai ai, Kei te haere mai te ata raua ko te po: ki te uia e koutou, e ui: hoki mai, haere mai.
- 13
- Te poropititanga mo Arapia. Kei te ngahere i Arapia he nohoanga mo koutou i te po, e nga tira-haere o Reranimi.
- 14
- Kawea he wai, e nga tangata o te whenua o Temana ki te whakatau atu i te tangata e mate-wai ana; hohoro atu ki te tangata e rere ana, me tetahi taro ano mana.
- 15
- Ka rere mai hoki ratou i nga hoari, i te hoari kua oti te unu, i te kopere ano hoki kua oti te whakapiko, i te nui ano o te whawhai.
- 16
- Ko ta te Ariki kupu hoki tenei ki a au, Kia kotahi te tau, (te tau ano o te kai mahi,) a ka poto katoa te kororia o Kerara.
- 17
- Na, nga morehu, te tokomahatanga o nga kai kopere, o nga mea marohirohi o nga tamariki a Kerara, ka torutoru ratou; ko te kupu hoki tenei a Ihowa Atua o Iharaira.
Address: 
Phone: 
Email: