- 1
- Te poropititanga mo Taira. E aue, e nga kaipuke o Tarahihi, mona kua whakamotitia, kahore he whare, kahore he tapokoranga atu: no te whenua o Kitimi te korero ki a ratou.
- 2
- Whakarongoa, e nga tangata o te motu; kua ki na koe i ta nga kai hokohoko o Hirona e rere nei i te moana.
- 3
- Kei nga wai nui, kei nga purapura o Hihoro, kei te tapahanga witi o te awa, ona hua; ko ia ano te kai hokohoko ki nga iwi.
- 4
- Kia whakama koe, e Hirona, kua korero hoki te moana, te kaha o te moana kua mea, Kahore oku mamae hapu, kahore hoki ahau e whanau, kahore e atawhai tamariki, kahore e whakatupu kotiro.
- 5
- Ka tae atu te rongo ki Ihipa, ka mamae ratou i te rongonga ai ki Taira.
- 6
- Whakawhiti atu ki Tarahihi; e aue, e nga tangata o te motu.
- 7
- Ko to koutou pa koa ianei tenei, kua tu noa ake nei, no nga rangi ano onamata? ko ona waewae ano hei kawe i a ia ki tawhiti noho ai.
- 8
- Na wai i whakatakoto tenei whakaaro mo Taira, mo te kai whakakarauna, he rangatira nei ona kai hokohoko; ona kai whakawhitiwhiti taonga ko nga metararahi o te whenua?
- 9
- Na Ihowa o nga mano i whakatakoto, hei whakapoke i te whakapehapeha o nga mea ataahua katoa, hei mea kia whakahaweatia nga metararahi o te whenua.
- 10
- Tika atu na waenganui i tou whenua, ano he awa, e te tamahine o Tarahihi: kore ake he kaha.
- 11
- Kua totoro atu tona ringa ki runga ki te moana, whakaoioia ana e ia nga rangatiratanga. Na Ihowa te whakahau mo te pa hokohoko, kia whakangaromia ona wahi kaha.
- 12
- Kua mea ano ia, Kati rawa tou koa, e te wahina e tukinotia nei, e te tamahine a Hirona: whakatika, whakawhiti atu ki Kitimi; kahore ano hoki he okiokinga mou i reira.
- 13
- Nana, te whenua o nga Karari, he kahore noa iho tenei iwi i mua, whakaturia ake e te Ahiriana mo te hunga e noho ana i te koraha, whakaarahia ana e ratou ona pourewa, tu ana i a ratou ona whare kingi, kua meinga nei e ia kia wahia iho.
- 14
- E aue, e nga kaipuke o Tarahihi, kua whakakorea hoki to koutou kaha.
- 15
- I taua rangi ano ka warewaretia a Taira, e whitu tekau nga tau, (nga ra ano o te kingi kotahi:) i te mutunga o nga tau e whitu tekau ka rite ta Taira ki te waiata a te wahine puremu.
- 16
- E mau ki te hāpa, taiawhiotia te pa, e te wahine puremu i warewaretia nei, kia pai te waiata, kia maha nga waiata, kia maharatia ai koe.
- 17
- Na, i te mutunga o nga tau e whitu tekau ka tirohia mai a Taira e Ihowa, a ka hoki ia ki tana utu, ka puremu ano hoki ki nga kingitanga katoa o te whenua i runga i te mata o te oneone.
- 18
- Na, ana mea hokohoko, me ana utu, he tapu ki a Ihowa, e kore e whaowhina ki te toa, e kore ano e rongoatia; engari ma te hunga e noho ana i te aroaro o Ihowa ana mea hokohoko, a ka makona ratou i te kai, ka roa ano hoki te mau o te kakahu.
Address: 
Phone: 
Email: