- 1
- Nana, kua moti i a Ihowa ta te whenua, takoto kau ana, porohurihia ake e ia, ona tangata marara ana i a ia.
- 2
- A ka rite te iwi ki te tohunga, te pononga ki tona ariki, te pononga wahine ki tona rangatira wahine, te tangata i utua ai te taonga ki te tangata i a ia nei te utu, te kai whakatarewa mai ki te tangata i te mea nama, te tangata i te moni whakatuputupu ki te tangata nana nei i homai ki a ia.
- 3
- Ka whakamotitia, rawatia ta te whenua, ka pahuatia rawatia: kua korerotia mai hoki e Ihowa tenei kupu.
- 4
- E tangi ana te whenua, ngohe noa iho; kaha-kore kau te ao, ngohe noa iho; harotu kau te hunga rarahi o te whenua.
- 5
- Kua poke ano te whenua i raro i ona tangata, kua takahia hoki e ratou nga ture, whakaputaina ketia ake e ratou te tikanga i whakatakotoria; whakatakā ana e ratou te kawenata onamata.
- 6
- Na reira, i kainga ai te whenua e te kanga, mokemoke iho ona tangata; na reira i wera ai nga tangata o te whenua, a he torutoru te hunga i toe.
- 7
- E tangi ana te waina hou, kua kaha-kore te waina; kei te aue te hunga ngakau koa katoa.
- 8
- Ka mutu te koa o nga timipera, kua kore te nge o te hunga e hari ana; mutu ake te koa o te hāpa.
- 9
- Kore ake ta ratou waiata i te mea e inu waina ana; ka kawa te wai kaha ki te hunga e inu ana.
- 10
- Kua pakaru te pa tikanga-kore, tutaki rawa nga whare katoa, tē ai he tomokanga atu.
- 11
- He karangatanga ki te waina mo ratou kei nga huarahi; kua pouri katoa te koa, kua whakarautia atu te koa o te whenua.
- 12
- Mahue iho ki te pa ko te ururua; te kuwaha, he mea patu ki te whakangaromanga.
- 13
- Ka penei te hanga i waenganui i te whenua i roto i nga iwi, kei te ruiruinga o te oriwa te rite, kei te hamunga o nga karepe ina mutu te whawhaki.
- 14
- Ka ara to ratou reo, ka waiata ratou, i te nui hoki o Ihowa, ka hamama mai ratou i te moana.
- 15
- Na, whakakororiatia a Ihowa i nga awaawa, te ingoa o Ihowa Atua o Iharaira, i nga motu o te moana.
- 16
- I te pito rawa o te whenua e rangona mai ana nga waiata e tatou, he kororia ki te tangata tika. Katahi au ka ki ake, Toku kiko-kore! toku kiko-kore! aue te mate i a au! he mahi tinihanga ta te hunga tinihanga, nui atu te tinihanga o te hunga tinihanga.
- 17
- Ko te wehi, ko te rua, ko te rore, kei a koe, e te tangata o te whenua.
- 18
- Na, te tangata i rere mai i te ngangau o te wehi, ka taka ano ia ki te rua, a, te tangata e puta ake ana i roto i te rua, ka mau i te rore; kua puare hoki nga matapihi o runga, a e ru ana nga turanga o te whenua.
- 19
- Hehe rawa te whenua, pakarukaru noa iho to whenua, ngaueue kau te whenua.
- 20
- Hurorirori kau te whenua ano he haurangi, neke ke ana, me te mea he whare tira; ka taimaha iho hoki tona he ki runga ki a ia, ka hinga, a heoi ano ona aranga ki runga.
- 21
- I taua rangi ano ka whiua e Ihowa te ope o te hunga kua neke ake, me nga kingi ano o te whenua i runga i te whenua.
- 22
- Ka, huihuia ano hoki ratou, ka peratia me nga herehere e huihuia ana ki te rua, ka tutakina ano hoki ki te whare herehere, a ka maha nga ra ka tirohia iho ratou.
- 23
- Ko reira, ano te marama numinumi kau ai, ka whakama ano hoki te ra, ina kingi a Ihowa o nga mano ki runga ki Maunga Hiona, ki Hiruharama, ki te aroaro ano hoki o ona kaumatua i runga i te kororia.
Address: 
Phone: 
Email: