- 1
- Ka koa te koraha me te wahi wai-kore ki aua mea, ka hari ano te titohea, koia ano kei te rengarenga te whai puawai.
- 2
- Nui atu te tupu, ka koa, ae ra, koa ana, waiata ana: ka hoatu te kororia o Repanona ki reira, te nui o Karamere, o Harono, e kite ratou i te kororia o Ihowa, i te nui o to tatou Atua.
- 3
- Whakakahangia nga ringaringa ngoi-kore, whakaungia nga turi hurorirori.
- 4
- Mea atu ki te hunga ngakau potatutatu, Kia kaha, kaua e wehi: Nana, ka haere mai to koutou Atua, he rapu utu, te Atua ki te whakahoki utu; ka haere mai ano ia ki te whakaora i a koutou.
- 5
- Ko reira nga kanohi o nga matapo kite ai, a ka puare nga taringa o nga turi.
- 6
- Ko reira te kopa tupeke ai, ano he hāta, ka waiata te arero whango; no te mea ka pakaru mai nga wai i te koraha, nga awa i te wahi titohea.
- 7
- Na, te ngaunga ra ka waiho hei harotoroto, te wahi maroke ano hei puputanga wai; i te nohoanga o nga tarakona, i te takotoranga o tetahi, o tetahi ko te tarutaru, ko te kakaho, ko te wiwi.
- 8
- Ka whai huanui ano a reira, me tetahi ara, ka karangatia hoki, Ko te ara o te tapu; e kore te poke e haere i reira; engari ka waiho mo ratou; te tangata haere ara, ahakoa he wairangi, e kore e he ki reira.
- 9
- Kahore o reira raiona, e kore ano tetahi kararehe kai kino e tika na reira, e kore e kitea ki reira; engari ka haereere ki reira te hunga i hokona.
- 10
- Na, ā Ihowa i hoko ai ka hoki mai, ka haere mai i runga i te waiata ki Hiona: i runga i o ratou mahunga ko te haringa e kore e mutu: ka whiwhi ratou ki te koa, ki te hari, a rere ana te pouri me te aue.
Address: 
Phone: 
Email: