- 1
- Na, no to tekau ma wha o nga tau o Kingi Hetekia ka whakaekea mai nga pa taiepa katoa o Hura e Henakeripi kingi o Ahiria, a riro ana i a ia.
- 2
- Na ka tonoa mai e te kingi o Ahiria Rapahake i Rakihi ki a kingi Hetekia ki Hiruharama; he nui ano hoki te ope. Na, tu ana ia, ki te awa-keri o to runga puna-wai, ki te huarahi o te mara o te kai horoi kakahu.
- 3
- Katahi ka puta ki a ia a Eriakimi tama a Hirikia te rangatira o te whare, ratou ko Hepena ko te kai tuhituhi, ko Ioaha tama a Ahapa kai whakamahara.
- 4
- Na, ko te meatanga a Rapahake ki a ratou, Tena, mea atu ki a Hetekia, Ko te kupu tenei a te kingi nui, a te kingi o Ahiria, He aha tenei whakawhirinakitanga e whakawhirinaki atu nei koe?
- 5
- E mea na koe, (otiia he mea kau na te ngutu,) Ki taku ki he ngarahu tika, he kaha toku mo te whawhai. Na, ko wai to whakawhirinakitanga, i whakakeke ai koe ki a au?
- 6
- Na, e whakawhirinaki atu na koe ki tena kakaho whati hei tokotoko, ki a Ihipa; ki te pehia iho e te tangata, ka ngoto ki roto ki tona ringa, na kua tu. Ka pera ano a Parao kingi o Ihipa ki te hunga katoa e okioki atu ana ki a ia.
- 7
- Na, ki te mea koe ki a au, Ko Ihowa ko to matou Atua ta matou e whakawhirinaki atu nei: he teka ianei nana nga wahi tiketike, me nga aata i whakakahoretia atu nei e Hetekia, a, mea ana ia ki a Hura raua ko Hiruharama, Hei mua i tenei aata koutou koropiko ai?
- 8
- Na, tena ra, homai aianei nga utu pupuri ki toku ariki ki te kingi o Ahiria, a ka hoatu e ahau etahi hoiho ki a koe, kia rua nga mano, ki te taea e koe te whakanoho kai eke ki runga ki a ratou.
- 9
- A me pehea e hoki ai i a koe te kanohi o tetahi rangatira, o tetahi o nga iti rawa o nga pononga a toku ariki; i a koe ka whakawhirinaki ki Ihipa ki te hariata, ki nga kai eke hoiho mau?
- 10
- I ngaro ranei a Ihowa i toku haerenga mai ki te huna i tenei whenua? I mea mai a Ihowa ki a au, Haere atu ki tera whenua huna ai.
- 11
- Na, ko te meatanga atu a Eriakimi ratou ko Hepena, ko Ioaha, ki a Rapahake, Tena, korero Hiriana mai ki o pononga; e mohiotia ana hoki tena reo e matou; kaua hoki e korero reo Hurai mai ki a matou, i te mea e whakarongo ana te iwi nei i runga i te taiepa.
- 12
- Ano ra ko Rapahake, I tonoa mai ranei ahau e toku ariki ki tou ariki, ki a koe ranei, hei korero i enei kupu? he teka ianei ki nga tangata e noho ana i runga i te taiepa, kia kainga e ratou to ratou paru, kia inumia ano hoki to ratou pi, ara, e koutou tahi?
- 13
- Na, tu ana a Rapahake, a nui atu tona reo ki te karanga i te reo o nga Hurai; ka mea, Whakarongo mai ki nga kupu a te kingi nui, a te kingi o Ahiria.
- 14
- Ko te kupu tenei a te kingi, Kei tinihangatia koutou e Hetekia; e kore hoki koutou e taea e ia te whakaora.
- 15
- Kei meinga ano hoki koutou e Hetekia kia whakawhirinaki atu ki a Ihowa, i a ia ka ki ra, Tera tatou ka whakaorangia e Ihowa; e kore ano hoki tenei pa e tukua atu ki te ringa o te kingi o Ahiria.
- 16
- Kaua e whakarongo ki a Hetekia; ko te kupu hoki tenei a te kingi o Ahiria, Whakaritea mai he kawenata ki a au i runga i te hakari; haere mai hoki ki waho ki a au; ka kai ai koutou i nga hua o tana waina, o tana waina, o tana piki, o tana piki, ka inu ano hoki i te wai o tana puna, o tana puna:
- 17
- Kia tae atu ra ano ahau ki te tiki i a koutou ki te whenua e penei ana me to koutou nei whenua, ki te whenua witi, waina, ki te whenua taro, mara waina.
- 18
- Kei whakapatia koutou e Hetekia, i a ia e mea na, Ma Ihowa tatou e whakaora. I whakaorangia ranei e tetahi o nga atua o nga tauiwi tona whenua i te ringa o te kingi o Ahiria?
- 19
- Kei hea nga atua o Hamata, o Arapara? kei hea nga atua o Heparawaimi? i whakaorangia ranei e ratou a Hamaria i roto i toku ringa?
- 20
- Na wai o nga atua katoa o enei whenua i whakaora to ratou whenua i roto i toku ringa, e whakaorangia ai e Ihowa a Hiruharama i roto i toku ringa?
- 21
- Heoi whakarongo kau ana ratou, kihai hoki i whakahoki kupu atu ki a ia; ko ta te kingi hoki tena i whakaako ai; i ki ia, Kaua e whakahoki kupu atu ki a ia.
- 22
- Na, haere ana a Eriakimi tama a Hirikia rangatira o te whare, ratou ko Hepena kai tuhituhi, ko Ioaha tama a Ahapa kai whakamahara, ki a Hetekia, he mea haehae o ratou kakahu, a, korerotia atu ana e ratou ki a ia nga kupu a Rapahake.
Address: 
Phone: 
Email: