- 1
- Nana, taku pononga e tautokona ake nei e ahau, taku i whiriwhiri ai, ahuareka tonu toku ngakau ki a ia; ka waiho e ahau taku wairua ki runga ki a ia; mana e whakapuaki te whakawa ki nga tauiwi.
- 2
- E kore ia e hamama, e kore ano e ara, e kore e rangona tona reo i te ara.
- 3
- Te kakaho i kope e kore e whatiia porokeretia e ia; e kore ano te muka e whakapaowa ana e tineia e ia: ka whakapuakina e ia te whakarite whakawa i runga i te pono.
- 4
- E kore ia e ngoi-kore, e kore e whati tona ngakau, kia takoto ra ano i a ia te whakarite whakawa ki te whenua: ka tatari ano nga motu ki tana ture.
- 5
- Ko te kupu tenei a te Atua, a Ihowa nāna nei nga rangi i hanga, i hora, nāna nei i takoto ai te whenua me nga mea ano e puta mai ana i reira, nāna nei i homai he manawa ki o reira tangata, me te wairua ano ki te hunga e haereere ana i reira.
- 6
- He mea karanga koe naku na Ihowa i runga i te tika, maku ano tou ringa e pupuri, maku koe e tiaki, ka hoatu ano koe e ahau hei kawenata ki te iwi, hei māramatanga mo nga Tauiwi;
- 7
- Hei whakatitiro i nga kanohi matapo, hei whakaputa mai i nga herehere i roto i te whare e tutaki tonu ana, te hunga e noho ana i te pouri, i roto i te whare herehere.
- 8
- Ko Ihowa ahau: ko toku ingoa tena: e kore ano e tukua atu e ahau toku kororia ki tetahi atu, toku whakamoemiti ki nga whakapakoko.
- 9
- Nana, kua puta mai nga mea o mua, he mea hou enei e whakaaturia atu nei e ahau: i te mea kahore ano kia pihi noa ka korerotia atu nei e ahau ki a koutou.
- 10
- Waiatatia atu ki a Ihowa he waiata hou, me te whakamoemiti ano ki a ia i te pito o te whenua, e te hunga e haere ana ki raro ki te moana, e o reira tini mea, e nga motu, me nga tangata ano e noho ana i reira.
- 11
- Kia nui te reo o te koraha, o nga pa ano o reira, o nga kāinga e nohoia ana e Kerara, kia waiata nga tangata o te kamaka, kia hamama ratou i runga i te tihi o nga maunga.
- 12
- Kia whakakororiatia a Ihowa e ratou, kia kauwhautia te whakamoemiti ki a ia i nga motu.
- 13
- Ka puta mai a Ihowa, te ahua kei to te tangata marohirohi, kei to te tangata whawhai; ka whakaoho i te hae, ka hamama, ae ra, ka ngengere; ka kaha noa atu i ona hoa riri.
- 14
- Ka roa nei taku whakamorokitanga, i whakarongo puku ahau, whakakoromaki tonu; katahi au ka aue, ka pera me te wahine e whanau ana; ka whakangaro ahau, pau tonu ake i a au.
- 15
- Ka whakaururuatia e ahau nga maunga me nga pukepuke, ka maroke ano i a au nga otaota katoa o reira; ka meinga nga awa hei motu, ka maroke ano i a au nga harotoroto.
- 16
- Ka kawea ano e ahau nga matapo i te ara kihai i mohiotia e ratou, ka arahina e ahau i nga huarahi kihai nei ratou i mohio, ka meinga te pouritanga hei māramatanga i to ratou aroaro, me nga wahi kopikopiko kia tika. Ka meatia enei mea e ahau ki a ratou, e kore ano ahau e whakarere i a ratou.
- 17
- Ka hoki ratou ki muri, nui atu to ratou whakama, to te hunga e whakawhirinaki ana ki nga whakapakoko, e mea ana ki te mea whakarewa, Ko koutou o matou atua.
- 18
- Whakarongo, e nga turi, titiro mai e nga matapo, kia kite ai koutou.
- 19
- Ko wai atu te matapo? ko taku pononga nei anake; ko wai te turi hei rite mo taku pononga i ungā atu nei e ahau? ko wai te matapo hei rite mo te tangata tino tika? te matapo hei rite mo ta Ihowa pononga?
- 20
- He maha nga mea e kitea atu ana, heoi kahore koe e mahara iho; e whakapuare ana i nga taringa, heoi kahore ia e rongo.
- 21
- Pai tonu mai a Ihowa, he whakaaro ki tana tika; ka whakanuia e ia te ture, ka whakahonoretia.
- 22
- Tenei iwi ia he pahuatanga, he taonga pārau; he mea mahanga ratou katoa i roto i nga rua, ngaro tonu i roto i nga whare herehere; hei pahuatanga ratou, kahore hoki he kai whakaora: hei taonga pārau; kahore hoki he tangata e ki ana, Whakahokia.
- 23
- Ko wai i roto i a koutou e whai taringa ki tenei? ko wai e mahara mai, e whakarongo mai, mo nga wa hoki o muri?
- 24
- Na wai a Hakopa i tuku atu hei taonga pārau? a Iharaira hoki hei meatanga ma nga kai pahua? he teka ianei na Ihowa? kua hara nei hoki tatou ki a ia, kihai hoki ratou i pai kia haere i ana huarahi, kihai i whakarongo ki tana ture.
- 25
- No reira ringitia ana e ia tana riri, tana weriweri ki runga ki a ia, me te pakanga kaha ano hoki; wera ana ia i tetahi taha, i tetahi taha, tē mohio ia; tahuna ana ia, heoi kihai tona ngakau i mahara iho.
Address: 
Phone: 
Email: