- 1
- Na, inaianei ko te kupu tenei a Ihowa, a tou kai hanga, e Hakopa, a tou kai whakaahua, e Iharaira, Kaua e wehi: kua oti nei hoki koe te hoko e au, kua karangatia e ahau tou ingoa; naku koe.
- 2
- Ka haere koe i roto i te wai, ko ahau hei hoa mou; i nga awa ano hoki, e kore e huri mai ki runga i a koe; ki te haere koe i roto i te ahi, e kore koe e wera, e kore ano te mura e ka mai ki a koe.
- 3
- Ko Ihowa hoki ahau, ko tou Atua, ko te Mea Tapu o Iharaira, ko tou Kai whakaora: i hoatu e ahau a Ihipa hei utu mou, a Etiopia raua ko Tepa hei whakakapi mo tou turanga.
- 4
- He taonga nui koe ki taku titiro, na reira koe i whakahonoretia ai, aroha atu ana ahau ki a koe, hoatu ana e ahau he tangata hei whakakapi me to turanga, me nga iwi ano hei utu mou kia ora.
- 5
- Kaua e wehi: kei a koe nei hoki ahau: ka kawea mai e ahau ou uri i te rawhiti, ka kohikohia mai ano hoki koe i te hauauru.
- 6
- Ka mea atu ahau ki te nota, Homai, ki te tonga ano hoki, Kaua e kaiponuhia: kawea mai aku tamariki i tawhiti, aku tamahine i te pito o te whenua;
- 7
- Te hunga katoa i karangatia nei toku ingoa ki a ratou: naku hoki ratou i hanga hei whakakororia moku, naku ratou i whakaahua, naku hoki ratou i mahi.
- 8
- Whakaputaina mai te hunga matapo, he kanohi nei o ratou, nga turi ano hoki he taringa nei o ratou.
- 9
- Kia huihui mai nga iwi katoa, kia rupeke tahi mai nga tauiwi: ko wai i roto i a ratou hei whakaatu i tenei, hei korero mai i nga mea o mua ki a tatou? kia homai e ratou o ratou kai whakaatu, kia whakatikaia atu ai ta ratou: ma ratou ranei e whakarongo, e mea mai, He pono.
- 10
- Ko koutou hei whakaatu mo taku, e ai ta Ihowa, me taku pononga ano hoki i whiriwhiria e ahau, kia mohio ai koutou, kia whakapono ai ki taku, kia mātau ai ko au ia, kahore he atua i whakaahuatia i mua atu i a au, kahore hoki tetahi i muri i a au.
- 11
- Ko au, ko au a Ihowa; kahore atu hoki he kai whakaora, ko ahau anake.
- 12
- Naku i whakaatu, naku hoki i whakaora, naku ano i korero atu, i te mea kahore he atua ke i roto i a koutou: na, ko koutou hei kai whakaatu mo taku, e ai ta Ihowa, ko te Atua ahau.
- 13
- Ae ra, i te mea kahore ano he ra ko au tenei; e kore hoki tetahi e whakaora ake i roto i toku ringa: maku e mahi, ko wai hoki hei pehi iho?
- 14
- Ko te kupu tenei a Ihowa, a to koutou kai hoko, a te Mea Tapu o Iharaira, He whakaaro ki a koutou i unga tangata ai ahau ki Papurona, riro ana i a au o ratou tutaki katoa ki raro, me nga Karari ano hoki kei nga kaipuke nei to ratou hamamatanga.
- 15
- Ko Ihowa ahau, ko to koutou Mea Tapu, ko te kai hanga o Iharaira, ko to koutou Kingi.
- 16
- Ko te kupu tenei a Ihowa nana nei i homai te ara i te moana, te huarahi i roto i nga wai kaha;
- 17
- Nana nei i whakaputa mai te hariata, te hoiho, te ope, me te kaha, Takoto tahi ana ratou, tē ara ki runga: kua keto ratou, kua tineia, ano he muka,
- 18
- Kaua koutou e mahara ki nga mea o mua; nga mea o namata kaua e whakaaroa.
- 19
- Tenei au te mahi nei i te mea hou; akuanei te tupu ai: e kore ranei e mohiotia e koutou? ka oti i a au he ara i te koraha me nga awa ano i te titohea.
- 20
- Ka whakakororiatia ahau e nga kararehe o te parae, e nga tarakona, e nga ruru: no te mea ka hoatu e ahau he wai i te koraha, nga awa i te titohea, hei inu ma toku iwi, ma taku i whiriwhiri ai.
- 21
- Tenei iwi, he mea whakaahua e ahau maku, ma ratou e kauwhau atu te whakamoemiti ki a au.
- 22
- Na, kihai nei koe i karanga ki a au, e Hakopa; kua hoha ano hoki koe ki a au, e Iharaira.
- 23
- Kihai i kawea mai e koe ki a au o hipi hei tahunga tinana; kihai ano ahau i whakakororiatia ki o patunga tapu, kahore aku whakamahi i a koe ki te whakahere, kihai ano koe i ngenge i te meatanga i te whakakakara.
- 24
- Kihai i hokona e koe he kakaho reka maku ki te moni, kihai hoki ahau i makona i te ngako o o patunga tapu; engari i whakamahia ahau e koe ki ou hara, mauiui ana ahau i o mahi he.
- 25
- Ko ahau, ko ahau, te kai muru atu i ou he, he whakaaro ano ki a au; e kore ano ou hara e maharatia e ahau.
- 26
- Whakamaharatia mai ahau, Tatou ka whakawa ki a tatou ano; korerotia e koe, kia whakatikaia ai tau.
- 27
- Tou pāpā tuatahi, i hara ia; ou kai whakaaro, whakakeke mai ana ratou ki a au.
- 28
- No reira whakapokea iho e ahau nga rangatira o te wahi tapu, a hoatu ana e ahau a Hakopa ki te kanga, a Iharaira ki nga tawai.
Address: 
Phone: 
Email: