- 1
- Na, whakarongo mai, e taku pononga, e Hakopa, e Iharaira, e taku i whiriwhiri ai.
- 2
- Ko te kupu tenei a Ihowa a tou kai hanga, nana nei koe i whakaahua i roto i te kopu, mana nei koe e awhina, Kaua e wehi, e Hakopa, e taku pononga, e Iehuruna, e taku i whiriwhiri ai.
- 3
- No te mea ka ringitia e ahau he wai ki runga ki te tangata e mate-wai ana, me nga awa ano ki runga ki te wahi maroke: ka ringitia e ahau toku wairua ki runga ki ou uri, taku manaakitanga ano hoki ki runga ki tou whanau.
- 4
- A ka tupu ratou, me te mea i waenga taru, ano he wirou i te taha o nga rerenga wai.
- 5
- Ka ki ake tenei, Na Ihowa ahau; tetahi atu, karangatia ana e ia ko Hakopa hei ingoa mona; tetahi atu, tuhituhi ana tona ringa ki a Ihowa, whakahuatia ake e ia ko Iharaira hei ingoa mona.
- 6
- Ko te kupu tenei a Ihowa, a te Kingi o Iharaira, a tona kai hoko ano, a Ihowa o nga mano, Ko ahau te tuatahi, ko ahau ano te whakamutunga; kahore atu ano hoki he atua, ko ahau anake.
- 7
- Ko wai hoki hei rite moku, hei karanga, hei whakaatu mai? ko wai ano taku hei whakahaere mea, o te wa ra ano i whakaritea ai e ahau te iwi onamata? ma ratou ano e whakaatu ki a ratou nga mea meake puta mai, me nga mea ano e puta mai amua.
- 8
- Kaua e wehi, kaua e pawera: kihai ianei i korerotia e ahau ki a koe i reira? i whakaaturia atu ano e ahau: ko koutou ano hei kai whakaatu mo taku. Tera atu ano ranei tetahi atua ke? ko au anake hoki: kahore hoki he atua: kahore ahau e mohio ki tetahi.
- 9
- Nga kai whakaahua o te whakapakoko, he horihori katoa ratou; kahore hoki he painga o a ratou mea ahuareka: ko ratou ano hei kai whakaatu mo ta ratou; kahore ratou e kite, kahore ratou e mohio, e whakama ai ratou.
- 10
- Ko wai te kai whakaahua o tetahi atua, te kai whakarewa ranei o te whakapakoko kahore nei ona painga?
- 11
- Nana, ona hoa katoa, ka whakama ratou: nga kai mahi ano, he tangata nei ratou: kia huihuia mai ratou katoa, tu ai; ka wehi, ka whakama ngatahi ratou.
- 12
- E mahia ana e te parakemete ki te kokopi i roto i nga waro, whakaahuatia ana e ia ki nga hama, puta ana te kaha o tona ringa ki te mahi i taua mea; ka hemo ano ia i te kai, kore noa iho he kaha; kahore e inu i te wai, mauiui noa iho.
- 13
- Te kamura, whakamarokia mai ana e ia te ruri, tuhia iho e ia ki te aho, mahia ana e ia ki nga waru; tuhia ana e ia ki te kapihu, mahia ana e ia kia rite ki te ahua o te tangata, ki te ataahua ano o te tangata; hei mea mo roto i te whare.
- 14
- Tuakina ana e ia he hita mana, tikina ana e ia te kaiperi, me te oki i whakapakaritia nei e ia mana i roto i nga rakau o te ngahere; whakatokia ana e ia te ahe hei whakatupu ma te ua.
- 15
- Katahi ka waiho hei wahie ma te tangata: ka tangohia hoki e ia tetahi wahi hei whakamahana i a ia; ina, whakaungia ana e ia, hei tunu taro; na, kei te hanga ano ia i tetahi atua, koropikoria atu ana e ia; mahia ana e ia hei whakapakoko, tapapa tonu atu ki reira.
- 16
- Tetahi wahi o taua rakau, e tahuna ana e ia ki te ahi, tetahi wahi, hei mea i te kikokiko hei kai mana; tunua ana e ia tana e tunu ai, a ka makona: ae ra, ka mahana ano ia, a ka mea, Ha, kua mahana ahau, kua kite i te ahi.
- 17
- Te toenga, hangā ake e ia hei atua, hei whakapakoko mona: tapapa atu ana ia, koropiko atu ana, inoi atu ana ki taua mea,—tana ki ake,—Whakaorangia ahau; ko koe nei hoki toku atua.
- 18
- Kahore ratou e mohio, kahore ano hoki o ratou mahara; no te mea kua araia e ia o ratou kanohi kei kite ratou, o ratou ngakau kei mātau.
- 19
- Kahore hoki e anga iho te ngakau o tetahi, kahore he mohiotanga, kahore he maharatanga, e ki ake ai ia, Ko tetahi wahi o tenei i tahuna e ahau ki te ahi, i tunua ano e ahau he taro ki ona ngarahu, tunua ana e ahau he kikokiko, kainga ake e ahau; a kia meinga e ahau te toenga o taua rakau hei mea whakarihariha? me tapapa atu ranei ahau ki te take o te rakau?
- 20
- Tana kai, he pungarehu; kua tinihangatia tona ngakau, a, ngau ke ana ia, tē whakaora ia i tona wairua, tē ki ake ranei, he teka ranei he korero teka kei toku ringa matau?
- 21
- Kia mahara koe ki enei, e Hakopa, e Iharaira; he pononga hoki koe naku; naku koe i whai ahua ai, he pononga hoki koe naku: e Iharaira, e kore koe e wareware i a au.
- 22
- O he murua ake e ahau, me te mea he kapua matotoru, o hara me te mea he kapua: hoki mai ki a au; naku hoki koe i hoko.
- 23
- Waiata, e nga rangi, he mahi hoki tenei na Ihowa. Hamama, e nga wahi o raro rawa o te whenua. Kia pakaru mai ta koutou waiata, e nga maunga, e te ngahere, me nga rakau katoa o reira; no te mea kua oti a Hakopa te hoko e Ihowa, kua whai kororia ia i a Iharaira.
- 24
- Ko te kupu tenei a Ihowa, a tou kai hoko, nana nei koe i whai ahua ai no roto mai ano i te kopu, Ko ahau a Ihowa, ko te kai hanga o nga mea katoa, naku anake nga rangi i hora, na toku kotahi i takoto ai te whenua.
- 25
- Nga tohu a te hunga korero teka he ana i a ia, nga tohunga tuahu whakahaurangitia ana e ia; te hunga whakaaro nui, whakahokia ana e ia ki muri, to ratou matauranga, whapoauautia iho.
- 26
- Mana pu i a ia te kupu a tana pononga, te whakaaro a ana karere rite rawa i a ia; tana kupu ki Hiruharama, Ka noho ia koe; ki nga pa ano hoki o Hura, Ka hangā koutou; maku ano e whakaara ona wahi kua ururuatia.
- 27
- Tana kupu ki te rire, Kia mimiti; maku ano e whakamaroke ou awa;
- 28
- Tana kupu mo Hairuha, He hepara naku, ka rite ano i a ia taku katoa i pai ai; mana hoki e ki ki Hiruharama, Ka hangā koe; ki te temepara, Ka whakatakotoria ou turanga.
Address: 
Phone: 
Email: