- 1
- Kua piko a Pere, kua tuohu a Nepo; kei runga i nga kirehe, i nga kararehe a ratou whakapakoko: he taimaha a koutou kawenga, rorotu tonu, ki aua kararehe mauiui ra.
- 2
- Tuohu ana ratou, piko ngatahi ana; kihai i taea e ratou te whakahoki mai i te pikaunga, heoi ko ratou nei ano ka riro hei pārau.
- 3
- Whakarongo mai ki a au, e te whare o Hakopa, e nga morehu katoa ano hoki o te whare o Iharaira, he mea waha nei koutou naku no te kopu mai ano, he mea pikau no roto mai ra ano i te puku.
- 4
- Tae noa atu ki to koutou koroheketanga ko au tenei, ka pikaua ano koutou e ahau, a hina noa: naku i mahi, maku ano e mau, maku ano e pikau, maku ano e whakaora.
- 5
- Ki ta koutou kei to wai he ahua moku? ko wai e rite ana ki a au? me whakarite ahau ki a wai, e kotahi ai to maua ahua?
- 6
- E ringitia mai ana e ratou he koura i te pēke, e paunatia ana he hiriwa i te pauna, kei te utu ratou i te kai tahu koura, a hangā ake e ia hei atua; tapapa atu ana ratou, koropiko tonu atu.
- 7
- Amohia ana ia e ratou i runga i te pokohiwi, pikaua ana ia, kua waiho e ratou ki tona wahi, tu ana ia, tē taea te nekeneke atu i tona wahi: ka karanga ano hoki tetahi ki a ia, heoi e kore ia e whakahoki kupu mai, e kore e whakaora i a ia i roto i tona mate.
- 8
- Mahara ki tenei, whakatangata, whakahokia mai ki te ngakau, e te hunga poka ke.
- 9
- Maharatia nga mea tuatahi onamata: ko au hoki te Atua, kahore atu; ko au te Atua, kahore hoki tetahi hei rite moku;
- 10
- I te timatanga ano i whakaaturia atu e ahau nga mea o te whakamutunga, a, i tau ke ko nga mea kahore ano kia meatia;—taku kupu ra,—Te whakaaro i whakatakotoria e ahau mau tonu, ka oti ano i a au taku katoa i pai ai.
- 11
- Ka karangatia hoki e ahau he manu kai kino i te rawhiti, te tangata kei a ia taku whakaaro i te whenua tawhiti: ina, kua korerotia nei e ahau, ka whakaputaina mai ano e ahau; kua takoto i a au, ka oti ano i a au.
- 12
- Whakarongo mai ki a au, e te hunga ngakau pakari, e matara atu ana i te tika:
- 13
- Ka kawea mai e ahau taku tika kia tata; e kore e matara atu; e kore ano taku whakaoranga e roa atu; ka whakawhiwhia ano hoki e ahau a Hiona ki te whakaoranga mo toku kororia, mo Iharaira.
Address: 
Phone: 
Email: