- 1
- Haere iho, e noho ki te puehu, e te tamahine wahina a Papurona: e noho ki te whenua; kahore he torona, e te tamahine a nga Karari; e kore hoki koe e karangatia i muri he mea kiri angiangi, he mea whakatarapi.
- 2
- E mau ki nga kohatu mira, hurihia he paraoa: kia takoto kau o makawe, huhua ake te waewae, kia takoto kau te huha; e whiti i nga awa.
- 3
- Ka kitea ou wahi e takoto tahanga ana, ka kitea atu ano hoki to mea e whakama ai koe: ka rapu utu ahau, e kore ano e rite ki ta te tangata taku tutakitanga ki a koe.
- 4
- To tatou kai hoko, ko Ihowa o nga mano; tona ingoa ko te Mea Tapu o Iharaira.
- 5
- E noho kupu-kore, haere ki te pouri, e te tamahine a nga Karari: e kore hoki koe e karangatia i muri, Ko te wahine rangatira o nga kingitanga.
- 6
- I riri ahau ki taku iwi, i whakapokea taku kāinga tupu; tukua atu ana e ahau ki tou ringa; kihai i puta tou aroha ki a ratou, whakataimahatia rawatia iho e koe to ioka ki te kaumatua.
- 7
- I mea ano koe, Hei wahine rangatira ahau ake, ake, ake: kihai noa iho tou ngakau i mea ki enei mea; kihai koe i mahara ki tona mutunga.
- 8
- Na, whakarongo aianei ki tenei, e te wahine e whai na i nga ahuareka, e noho wehi-kore na, e mea na i roto i tou ngakau, Tenei ahau, kahore atu hoki, ko ahau anake; e kore ahau e noho pouaru, e kore ahau e mohio ki te matenga o nga tamariki.
- 9
- Ka pa whakarere mai enei mea e rua ki a koe i te rangi kotahi, te matenga o nga tamariki, te pouarutanga; nui whakaharahara aua mate ina pa mai ki a koe, mo te nui o au mahi makutu, mou i kaha rawa ki te whaiwhaia.
- 10
- I whakawhirinaki hoki koe ki to kino, i mea, Kahore he kai titiro moku: ou whakaaro nui me to mohiotanga, na ena koe i whakangau ke; i mea hoki koe i roto i tou ngakau, Ko au tenei, kahore atu hoki, ko au anake.
- 11
- Mo reira ka tae mai te kino ki a koe, e kore tona putanga mai e mohiotia e koe, ka taka mai ano te he ki a koe; e kore e taea e koe te karo; ka tae hohoro mai ano ki a koe te whakangaromanga, e kore e mohiotia e koe.
- 12
- Tena ra, e tu, me o whaiwhaia, me o makutu maha, i mahia ra e koe i to tamarikitanga ake, me kahore koe e whai pai, me kahore tau e taea.
- 13
- Kua hoha koe i te maha o nga whakaaro i whakatakotoria e koe. Tena ra, kia tu nga kai whakaaro ki nga rangi, nga kai titiro ki nga whetu, nga mea mohio ki nga marama, kia whakaorangia koe e ratou i nga mea meake tae mai ki a koe.
- 14
- Nana, ka rite ratou ki te kakau witi, ka wera ratou i te ahi; e kore ratou e whakaora i a ratou ano i te ngaunga a te ahi: kahore he ngarahu hei whakamahana, kahore he ahi hei painatanga atu.
- 15
- Ka pera ano ki a koe te hunga i mahi tahi ra koutou, te hunga i hokohoko ki a koe i to taitamarikitanga ake ano, ka kotiti atu ratou ki tona wahi, ki tona wahi; kahore hoki he kai whakaora mou.
Address: 
Phone: 
Email: