- 1
- Whakarongo ki tenei, e te whare o Hakopa, e te hunga kua karangatia nei ko Iharaira hei ingoa mo koutou, kua puta ake nei i roto i nga wai o Hura, e whakaoati ana i te ingoa o Ihowa, e whakahua ana i te Atua o Iharaira, ehara ia i te mea i runga i te pono, i runga i te tika.
- 2
- Ki ta ratou hoki e karanga ai, no te pa tapu ratou, e okioki atu ana hoki ki te Atua o Iharaira; Ko Ihowa o nga mano tona ingoa.
- 3
- He mea whakaatu naku no namata nga mea o mua; i puta atu ano hoki aua mea i toku mangai, he mea korero atu naku; kitea rawatia ake kua mahia e ahau, kua puta.
- 4
- I mohio hoki ahau he pakeke koe, he uaua rino ano hoki to kaki, he parahi to rae.
- 5
- No namata i whakaaturia atu ai e ahau ki a koe; kahore ano kia puta noa kua korerotia atu e ahau ki a koe: kei ki koe, Na taku whakapakoko ena i mahi, he mea whakahau enei na te mea i whaowhaoa e ahau, na te mea i whakarewaia e ahau.
- 6
- Kua rongo koe, tirohia iho tenei katoa: a e kore ianei e whakaaturia atu e koutou? Ka oti nei te korero atu e ahau ki a koe nga mea hou, he mea i muri i tenei wa, he mea rongoa atu, kihai i mohiotia e koe.
- 7
- He mea hanga aua mea no naianei, kahore hoki i namata; i mua ake ano o tenei ra kihai i rangona e koutou; kei ki koe, Nana, i mohiotia ano e ahau.
- 8
- Kihai ano hoki koe i rongo, kihai ano i mohio, kihai tou taringa i whakapuaretia i namata: i mohio hoki ahau tera koe e mahi tinihanga; no te kopu ano hoki koe i karangatia ai, He poka ke.
- 9
- Ka whakaaro ahau ki toku ingoa, a ka aweke taku riri; ka whakaaro ki te whakamoemititanga ki a au, a ka pehi i taku ki a koe, kei hatepea atu koe.
- 10
- Kua oti tou para te tahu e au, ehara ia i te mea hei hiriwa; he mea whiriwhiri koe naku i roto i te oumu, i te tangihanga.
- 11
- He whakaaro ki a au, he whakaaro ki a au, i meatia ai tenei e ahau: kia whakapokea koia toku ingoa? e kore ano toku kororia e hoatu e ahau ki tetahi atu.
- 12
- Whakarongo mai ki a au, e Hakopa, e Iharaira ano hoki, e taku i karanga ai; ko au ia, ko au te tuatahi, ko ahau ano hoki te whakamutunga.
- 13
- He mea whakatu ano hoki te whenua na toku ringaringa, na toku matau nga rangi i whangāngā: ki te karangatia atu ratou e ahau, ka tu ngatahi ratou.
- 14
- Huihui mai, e koutou katoa, whakarongo hoki; na wai o ratou enei mea i whakaatu? He mea aroha ia na Ihowa; ka oti i a ia tana i pai ai ki Papurona, ka pa iho ano hoki tona ringa ki nga Karari.
- 15
- Naku, naku te kupu, ae ra, he mea karanga ia naku, naku ia i kawe mai, ka tika ano i a ia tana ara.
- 16
- Awhitia mai ki a au, whakarongo ki tenei; taku no te timatanga ra ano ehara i te korero puku: i nga wa ano o aua mea, i reira ano ahau: na, i naianei na te Ariki, na Ihowa, ahau i unga mai, na tona Wairua ano hoki.
- 17
- Ko te kupu tenei a Ihowa, a to kai hoko, a te Mea Tapu o Iharaira, Ko ahau a Ihowa ko tou Atua e whakaako nei i a koe ki te mea pai mou, e arahi nei i a koe i te ara e haere ai koe.
- 18
- Aue me i whakarongo koe ki aku whakahau, ina, kua rite ki te awa te mau o te rongo ki a koe; to tika koia ano kei nga ngaru o te moana.
- 19
- Kua rite ano hoki ou uri ki te onepu; nga whanau o ou whekau kei te kirikiri o reira te rite; tona ingoa kihai i hatepea atu, kihai i whakangaromia i toku aroaro.
- 20
- Haere atu i roto i Papurona, rere atu i roto i nga Karari; kia waiata te reo i a koutou e whakaatu atu ana; korerotia tenei, whakapuakina atu ki te pito o te whenua; ki atu, Kua oti i a Ihowa tana pononga a Hakopa te hoko.
- 21
- Kihai ano ratou i mate-wai i a ia e arahi ana i a ratou i nga koraha; i meinga e ia te wai mo ratou kia rere i roto i te kamaka: i wahia e ia te kamaka, a pupu mai ana te wai.
- 22
- Kahore he maunga rongo ki te hunga kino, e ai ta Ihowa.
Address: 
Phone: 
Email: