- 1
- Whakarongo mai ki a au, e koutou e whai ana i te tika, e rapu ana i a Ihowa; titiro atu ki te kohatu i haua mai ai koutou, ki te poka i te rua i keria mai ai koutou.
- 2
- Titiro atu ki a Aperahama, ki to koutou matua, ki a Hera hoki i whanau ai koutou: he kotahi hoki ia, karangatia ana ia e ahau, manaakitia ana ia; whakanuia ana ia.
- 3
- Ta te mea, ka whakamarie a Ihowa i a Hiona: ka whakamarie ia i ona wahi katoa ka ururuatia, ka mea hoki i tona wahi koraha kia rite ki Erena, i tona wahi titohea kia rite ki te kāri a Ihowa; he koa, he hari, ka kitea i roto, he whakawhetai, me te reo hoki e waiata ana.
- 4
- Whakarongo mai ki a au, e oku tangata, kia whai taringa mai hoki ki a au, e toku iwi: ka puta atu hoki he ture i roto i a au, ka takoto ano hoki i a au taku whakawakanga hei whakamāramatanga mo nga iwi.
- 5
- Ka tata mai taku tika; kua puta atu taku whakaoranga, ma oku ringaringa ano e whakariterite whakawa mo nga iwi: ka tatari mai ki a au nga motu, ka okioki ano ratou ki toku ringaringa.
- 6
- Anga ake o koutou kanohi ki nga rangi, tirohia iho hoki te whenua i raro; ka memeha atu hoki nga rangi, ano he paowa, ka tawhitotia ano hoki te whenua, me he kakahu, te hunga ano hoki e noho ana i reira ka pena ano te mate: taku whakaoranga ia ka mau tonu; e kore ano taku tika e heke.
- 7
- Whakarongo mai ki a au, e koutou e mohio ana ki te tika, e te hunga kei o koutou nei ngakau taku ture; kei wehi koutou i te tawai a te tangata, kei numinumi hoki i ā ratou taunutanga.
- 8
- Ka kai hoki te purehurehu i a ratou, ano me he kakahu, a ka pau ratou, ano he huruhuru hipi i te huhu: ka mau tonu ia taku tika, taku whakaoranga ano hoki, a, tera whakapaparanga.
- 9
- Maranga, maranga, kakahuria te kaha, e te ringaringa o Ihowa! maranga, kia rite ki nga rangi o mua ra, o nga whakatupuranga o namata. Ehara oti i a koe nana i kokoti a Rahapa, i patu te tarakona?
- 10
- Ehara oti i a koe nana i whakamaroke te moana, nga wai o te rire whakaharahara? nga wai hohonu o te moana waiho ake e koe hei huarahi haerenga atu mo te hunga kua oti te hoko.
- 11
- Na, ā Ihowa i hoko ai ka hoki mai, ka haere mai ki Hiona, me te waiata ano ratou: i runga i o ratou mahunga he hari e kore e mutu: ka whiwhi ratou ki te koa, ki te hari; a rere ana te pouri me te aue.
- 12
- Ko ahau, ina, maku koutou e whakamarie; ko wai koe, e wehi na koe i te tangata e matemate nei, i te tama ano a te tangata ka meinga nei hei tarutaru;
- 13
- A, ka wareware ki a Ihowa, nana koe i hanga, nana nga rangi i hora, nana i whakatakoto te turanga mo te whenua, a pawera tonu koe i nga ra katoa i te riri o te kai whakawhiu, me te mea e anga mai ana ia ki te whakamate? a, kei hea ano te riri o te kai whakawhiu?
- 14
- Takare tonu te herehere kia wetekina atu, kia kaua hoki ia e mate ki roto ki te poka, kia kaua ano e whakakorea he taro mana:
- 15
- Ko Ihowa ia ahau, ko tou Atua, i wawahi nei i te moana, i ona ngaru e hamama ana: ko Ihowa o nga mano tona ingoa.
- 16
- A ka hoatu nei e ahau aku kupu ki roto ki tou mangai; ka taupokina ano koe e ahau, ka taumarumarua iho e toku ringaringa, kia whakatokia ai nga rangi, kia whakatakotoria ai hoki te turanga mo te whenua, hei mea hoki ki a Hiona, Ko koe taku iwi.
- 17
- Maranga, maranga, whakatika, e Hiruharama, i whakainumia nei e te ringaringa o Ihowa ki te kapa o tana riri: kua inu koe i nga nganga o te kapa wiri, he mea tatau nau.
- 18
- Kahore kau tetahi hei tautiti i a ia o nga tamariki katoa i whanau i roto i a ia; kahore hoki tetahi o nga tamariki i atawhaitia ra e ia hei pupuri atu i tona ringaringa.
- 19
- Ka rua enei mea ka pono nei ki a koe; ko wai hei tangi ki a koe? ko te whangaromanga, ko te wawahanga, ko te mate-kai, ko te hoari: ko wai toku hei whakamarie i a koe?
- 20
- Kua hemo o tamariki; e takoto ana ratou i te ahunga mai o nga huarahi katoa, ano he puru mohoao i roto i te kupenga; kī tonu i te riri o Ihowa, i te whakatupehupehu o tou Atua.
- 21
- Mo reira, whakarongo mai ki tenei, e koe kua tukinotia nei; e haurangi ana hoki, raia, ehara i te haurangi waina.
- 22
- Ko te kupu tenei a tou Ariki a Ihowa, a tou Atua hoki, e whakatika ana i ta tona iwi ina whakawakia, Nana, ka tangohia e ahau te kapa wiri i to ringaringa, nga nganga o te kapa o taku riri; e kore e inumia ano e koe a muri ake nei.
- 23
- A, ka hoatu e ahau ki te ringaringa o te hunga e whakatupu kino nei i a koe, i mea ra ki to wairua, Piko iho nei, kia haere atu ai matou; na kua waiho e koe to tinana hei whenua, hei huarahi atu mo te hunga i haere atu ra.
Address: 
Phone: 
Email: