- 1
- Te kupu i pa mai ki a Heremaia he mea na Ihowa; i ki ia,
- 2
- Whakarongo koutou ki nga kupu o tenei kawenata, korero atu ano hoki ki nga tangata o Hura ratou ko te hunga e noho ana i Hiruharama.
- 3
- Mea atu hoki ki a ratou, Ko te kupu tenei a Ihowa Atua o Iharaira, Ka kangā te tangata e kore e whakarongo ki nga kupu o tenei kawenata,
- 4
- I whakahaua atu nei e ahau ki o koutou mātua i te ra i kawea mai ai ratou e ahau i te whenua o Ihipa, i roto i te oumu rino, i a au i ki ra, Whakarongo ki toku reo, mahia hoki aua mea, kia rite ki nga mea katoa i whakahaua e ahau ki a koutou; a ka waiho koutou hei iwi moku, ko ahau hoki hei Atua mo koutou.
- 5
- Kia whakamanā ai e ahau te oati i oatitia e ahau ki o koutou mātua, kia hoatu ki a ratou he whenua e rerengia ana e te waiu, e te honi, me tenei inaianei. Na, ko taku whakahokinga atu, taku meatanga atu, Koia ano tena, e Ihowa.
- 6
- Katahi a Ihowa ka ki mai ki a au, Karangatia atu enei kupu katoa ki nga pa o Hura, ki nga huarahi ano o Hiruharama, mea atu, Whakarongo ki nga kupu o tenei kawenata, mahia hoki.
- 7
- I tino whakatupato hoki ahau i o koutou mātua i te ra i kawea mai ai ratou e ahau i te whenua o Ihipa, a taea noatia tenei ra, maranga wawe ana ahau, whakatupato ana; taku kupu, Whakarongo ki toku reo.
- 8
- Heoi kihai ratou i whakarongo, kihai hoki i tahuri mai o ratou taringa; na, haere ana ratou ia tangata, ia tangata, i runga i nga tikanga pakeke a tona ngakau kino: mo reira ka takina mai e ahau ki runga ki a ratou nga kupu katoa o tenei kawenata i whakahaua atu nei e ahau kia mahia, a kihai nei i mahia e ratou.
- 9
- I mea mai ano a Ihowa ki a au, Kua kitea te he e whakatakotoria ana e nga tangata o Hura ratou ko te hunga e noho ana i Hiruharama.
- 10
- Kua hokia e ratou nga he o o ratou mātua o mua, kihai nei i pai ki te whakarongo ki aku kupu, haere ana ratou ki te whai i nga atua ke, mahi tonu atu ki a ratou: kua whakatakā e te whare o Iharaira ratou ko te whare o Hura taku kawenata i whakaritea e ahau ki o ratou mātua.
- 11
- Mo reira ko te kupu tenei a Ihowa, Tenei te takina atu nei e ahau ki runga ki a ratou he hē e kore e taea e ratou te mawhiti atu; ka karanga ano ratou ki a au, otiia e kore ahau e whakarongo ki a ratou.
- 12
- A ka haere ano nga pa o Hura me nga tangata ano o Hiruharama, ka karanga ki nga atua i tahu nei ratou i te whakakakara ki a ratou: hore rawa ia a ratou whakaoranga i a ratou i te wa e raru ai ratou.
- 13
- I rite hoki ou atua, e Hura, ki ou pa te maha; me nga aata ano i hangā e koutou ma taua mea whakama, rite tonu ki nga huarahi o Hiruharama te maha, ara, nga aata tahu whakakakara ki a Paara.
- 14
- Na, kaua koe e inoi mo tenei iwi, kei ara hoki tetahi tangi, tetahi kupu wawao au mo ratou; no te mea e kore ahau e whakarongo i te wa e karanga ai ratou ki a au, ina raru ratou.
- 15
- He aha ta taku wahine aroha i roto i toku whare, kua mahia nei hoki e ia nga whakaaro he, he tokomaha nga hoa: kua whakakorea atu ano hoki te kikokiko tapu i tou kāinga? i to mahinga i te kino, na, kei te whakamanamana koe.
- 16
- He oriwa matomato, he ataahua, he mea hua pai rawa te ingoa i karangatia e Ihowa ki a koe: nui atu te reo ngangau i tahuna ai e ia te ahi mona, kua whatiwhatīa ona manga.
- 17
- Kua korerotia nei hoki e Ihowa o nga mano, e to kai whakato, he hē mou, hei utu mo te kino o te whare o Iharaira, raua ko te whare o Hura i mahia nei e ratou hei he mo ratou, hei whakapatari i a au, i a ratou ka tahu whakakakara nei ki a Paara.
- 18
- I meinga ano ahau e Ihowa kia mohio, a mohio ana ahau: i whakakitea mai ano e koe ki a au a ratou mahi.
- 19
- Ko au ia i rite ki te reme, ki te kau ranei, e arahina ana kia patua; kihai hoki ahau i mohio, e hanga whakaaro ana ratou moku, e mea ana, Kia whakakahoretia e tatou te rakau me ona hua ano, kia tapahia atu ano hoki ia e tatou i runga i te whenua o te hunga ora, a kore ake he maharatanga atu ki tona ingoa.
- 20
- Tena, e Ihowa o nga mano, kei runga nei hoki i te tika to whakarite whakawa, e whakamatau ana koe i nga whatumanawa, i te ngakau, kia kite ahau i to rapunga utu i a ratou: kua whakakitea atu nei hoki e ahau taku totohe ki a koe.
- 21
- Na, ko te kupu tenei a Ihowa mo nga tangata o Anatoto e whai nei kia whakamatea koe, e mea nei, Kaua e poropiti i runga i te ingoa o Ihowa, kei mate koe i to matou ringaringa:
- 22
- Mo reira ko te kupu tenei a Ihowa o nga mano, Tenei au te whiu nei i a ratou: ka mate nga taitamariki i te hoari; a ratou tamariki, a ratou tamahine, ka mate i te hemo-kai.
- 23
- E kore ratou e whai morehu; no te mea ka kawea atu e ahau he kino ki nga tangata o Anatoto, ara, te tau, e whiua ai ratou.
Address: 
Phone: 
Email: