- 1
- Tika tonu koe, e Ihowa, ina totohe ahau ki a koe: otiia kia korerotia e ahau o whakaritenga whakawa ki a koe: He aha i whai pai ai te ara o te hunga kino? he aha i noho humarie ai te hunga katoa he nui rawa nei ta ratou tinihanga?
- 2
- Whakatongia ana ratou e koe, kua whai pakiaka ano hoki ratou, e neke ake ana, e hua ana hoki: i o ratou mangai e tata ana koe; o ratou whatumanawa ia kei tawhiti koe.
- 3
- Otiia e mohio ana koe ki a au, e Ihowa, kua kite koe i a au, e whakamatautau ana hoki koe i toku ngakau ki a koe: takiritia mai ratou, ano he hipi e patua ana, motuhia atu ratou mo te ra o te parekura.
- 4
- Kia pehea te roa o te whenua ka tangi nei, o te otaota ano hoki o nga mara katoa ka maroke nei, i te kino o nga tangata e noho ana i reira? kua poto nga kararehe me nga manu; mo ratou hoki i ki, E kore ia e kite i to tatou mutunga iho.
- 5
- Ki te mea i rere koe i roto i te hunga haere i raro, a ka ngenge, ka pehea ra to whakataetae ki nga hoiho? a ki te mea i ngenge koe i te whenua rangatira, i tau i whakawhirinaki atu ai, ka pehea ra koe, ina ngawha a Horano?
- 6
- Ko o tuakana nei hoki, ko o teina, me te whare ano o to pāpā, ko ratou kei te tinihanga ki a koe, ko ratou ano kei te karanga i te hui ki te whai i a koe. Kaua e whakapono atu ki ta ratou, ina korero pai mai ratou ki a koe.
- 7
- Kua mahue i a au toku whare, whakarerea ake toku kāinga pumau; tukua atu ana e ahau te wahine i arohaina e toku wairua ki te ringaringa o ona hoa riri.
- 8
- Toku kāinga tupu, ki a au, tona rite kei te raiona i roto i te ngahere: hamama mai ana ia ki a au, na reira kino iho ahau ki a ia.
- 9
- Toku kāinga tupu, ki a au, tona rite kei te manu kotingotingo; hei hoa riri mona nga manu i tetahi taha, i tetahi taha; haere mai koutou, huihuia mai nga kirehe katoa o te parae, haere mai ki te kai.
- 10
- Nga hepara tokomaha nei, moti ake i a ratou taku mara waina, takatakahia ana e ratou toku wahi, meinga ana e ratou taku wahi i matenui ai hei koraha, ururua rawa.
- 11
- Kua meinga e ratou hei ururua, a, i a ia e ururua nei, tangi ana ia ki a au; kua ururua katoa te whenua, no te mea kahore he tangata e mahara iho ana tona ngakau.
- 12
- Kua tae mai nga kai pahua ki runga ki nga wahi tiketike katoa o te koraha: no te mea ka kai te hoari a Ihowa i tetahi pito o te whenua, a tae noa ki tetahi pito o te whenua: ki nga kikokiko katoa kahore he maunga rongo.
- 13
- He witi ta ratou i rui ai, he tataramoa ta ratou e kokoti ai; mamae ana ratou, a kahore he painga ki a ratou: ka whakama ano koutou ki ā koutou hua i te riri a Ihowa ka mura nei.
- 14
- Ko te kupu tenei a Ihowa mo oku hoa tata katoa e kino nei, kua pa nei ki te wahi tupu i hoatu e ahau mo taku iwi, mo Iharaira, Tenei au te huhuti atu nei i a ratou i runga i to ratou whenua, ka hutia atu ano hoki e ahau te whare o Hura, i waenganui i a ratou.
- 15
- A, tenei ake, kia mutu taku huhuti atu i a ratou, ka hoki atu ahau, ka aroha ki a ratou, ka whakahoki atu ano i a ratou ki tona wahi, ki tona wahi, ki tona whenua, ki tona whenua.
- 16
- A tenei ake, ki te ako marie ratou i nga ara o toku iwi, a ka oatitia toku ingoa, ara, E ora ana a Ihowa; ki te pera ratou me ratou i whakaako ra i toku iwi kia oatitia a Paara, na, ka hangā ratou ki waenganui i toku iwi.
- 17
- Tena ko tenei e kore ratou e rongo, katahi taua iwi ka hutia rawatia atu e ahau, ka whakangaromia, e ai ta Ihowa.
Address: 
Phone: 
Email: