- 1
- Te kupu a Ihowa i puta mai ki a Heremaia, he mea mo te mate-waitanga.
- 2
- Kei te tangi a Hura, ngohe kau ona kuwaha, kua mangu, kua takoto ki te whenua, kua kake ano te aue o Hiruharama ki runga.
- 3
- Na, ka unga atu o ratou ariki i ā ratou tamariki ririki ki te wai. To ratou haerenga atu ki nga poka, kihai i kitea he wai; hoki mai ana, a ratou oko takoto kau ana, whakama ana ratou, numinumi kau ana, hipoki rawa o ratou māhunga.
- 4
- Ngatata kau hoki te oneone, kahore hoki he ua ki runga ki te whenua, whakama iho nga kai parau, hipokina ana e ratou o ratou māhunga.
- 5
- Te hāta ano hoki, whanau ana ia i waenga parae, whakarerea ake e ia; no te mea kahore he tarutaru.
- 6
- Nga kai mohoao ano hoki, tu ana ratou i runga i nga wahi tiketike, hongia atu ana e ratou te hau, ano he tarakona; matawaia ana o ratou kanohi, no te mea kahore he otaota.
- 7
- E Ihowa, ahakoa whakaatu noa o matou kino i ta matou he, mau e mahi, kia mahara hoki ki to ingoa: kua tini nei hoki o matou tahuritanga ketanga, kua hara matou ki a koe.
- 8
- Ko koe ta Iharaira e tumanako atu ai; e te kai whakaora i te wa o te raru, he aha koe i whakatangata ke ai i runga i te whenua, he aha i rite ai ki te tangata haere e peka atu ana ki tetahi moenga mona i te po?
- 9
- He aha koe i rite ai ki tetahi tangata e ketekete kau ana, ki tetahi tangata marohirohi e kore nei e kaha ki te whakaora? kei waenganui ano ia koe i a matou, e Ihowa, kua karangatia ano hoki to ingoa ki a matou; kaua matou e whakarerea.
- 10
- Ko te kupu tenei a Ihowa mo tenei iwi, Pena tonu to ratou pai ki te kopikopiko, kihai i kaiponuhia o ratou waewae; na, e kore a Ihowa e manako ki a ratou, ka mahara ia ki ta ratou he, ka whiua ano e ia o ratou hara.
- 11
- I mea mai ano a Ihowa ki a au, Kaua e inoi mo tenei iwi, ki te pai mo ratou.
- 12
- Ka noho puku ratou i te kai, e kore ahau e whakarongo ki ta ratou karanga, ka whakaekea ano hoki e ratou te tahunga tinana me te whakahere, e kore ahau e manako ki a ratou; engari ka poto ratou i a au, i te hoari, i te hemo-kai, i te mate uruta.
- 13
- Ano ra ko au atu, Aue, e te Ariki, e Ihowa, nana, ko nga poropiti te mea atu nei ki a ratou, E kore koutou e kite i te hoari, e kore ano te hemo-kai e pa ki a koutou; engari maku e mea kia tūturu rawa te mau o te rongo ki a koutou i tenei wahi.
- 14
- Ano ra ko Ihowa ki a au, Kei te poropiti nga poropiti i te mea teka i runga i toku ingoa, kihai ano ratou i ungā atu e ahau; kihai ratou i whakahaua e ahau, kihai ahau i korero ki a ratou: he kitenga teka ta ratou e poropiti ra ki a koutou, he whakaaro ki nga tohu, he mea horihori, he mea tinihanga na o ratou ngakau.
- 15
- Mo reira ko te kupu tenei a Ihowa mo nga poropiti e poropiti nei i runga i oku ingoa, he hunga kihai i ungā atu e ahau, i a ratou e mea nei, E kore te hoari, te hemo-kai ranei e pa ki tenei whenua, Ka poto atu ena poropiti i te hoari, i te hemo-kai.
- 16
- Ta ratou iwi ano hoki i poropiti atu ai ratou ki a ratou, akiritia atu ki nga huarahi o Hiruharama i te ngaunga a te hemo-kai, a te hoari, kahore hoki he tangata hei tanu i a ratou, i a ratou ko a ratou wahine, ko a ratou tamahine: no te mea ka ringitia atu e ahau ta ratou kino ki runga ki a ratou.
- 17
- Na, me korero atu e koe, tenei kupu ki a ratou; Kia tarere iho nga roimata o oku kanohi i te po, i te ao, kaua hoki e mutu; no te mea he nui te pakaru i pakaru ai te tamahine a toku iwi, mamae rawa te patunga.
- 18
- Ki te haere atu ahau ki te parae, nana, ko nga tupapaku a te hoari! ki te tomo ahau ki roto ki te pa, nana, ko te hunga e mate ana i te hemo-kai! nga poropiti nei hoki, nga tohunga ano hoki, kei te kopikopiko ratou ki te whenua kahore nei e mohiotia e ratou.
- 19
- Kua whakaparahako rawa ranei koe ki a Hura? kua whakarihariha ranei to wairua ki Hiona? He aha koe i patu ai i a matou, tē ai he mahunga mo o matou mate? tatari noa matou ki te rongo mau, heoi kahore he pai; ki te wa e mahu ai, na, ko te raruraru.
- 20
- Tenei matou, e Ihowa, te whaki nei i ta matou kino, te he a o matou mātua; kua hara hoki matou ki a koe.
- 21
- Kaua e whakarihariha mai, whakaaro ki tou ingoa, kaua e whakaititia te torona o to kororia; kia mahara, kaua e whakatakā to kawenata ki matou.
- 22
- Kei roto ranei i nga mea horihori a nga tauiwi tetahi kai whakaputa mai mo te ua? ma nga rangi ranei e homai nga ua? he teka ianei ko koe, e Ihowa, e to matou Atua? no reira matou ka tatari atu nei ki a koe, nau hoki i hanga enei mea katoa.
Address: 
Phone: 
Email: