- 1
- Na, ko te meatanga mai a Ihowa ki a au, Ahakoa i tu a Mohi raua ko Hamuera ki toku aroaro, a kore ahau e whai ngakau ki tenei iwi. Makā atu ratou i toku aroaro, kia haere atu hoki ratou.
- 2
- Na, ki te mea mai ratou ki a koe, Me haere matou ki hea? katahi koe ka mea atu ki a ratou, Ko te kupu tenei a Ihowa, Nga mea mo te mate ki te mate; nga mea mo te hoari ki te hoari; nga mea mo te hemo-kai ki te hemo-kai; nga mea mo te whakarau ki te whakarau.
- 3
- E wha hoki nga tu mea e whakaritea e ahau mo ratou, e ai ta Ihowa: ko te hoari hei whakamate, ko nga kuri hei haehae, ko nga manu o te rangi, me nga kararehe ano o te whenua, hei kai, hei whakamoti.
- 4
- Ka tukua atu ano ratou e ahau kia kawea atu ki nga kingitanga katoa o te whenua mo ta Manahe tama a Hetekia kingi o Hura, mo nga mea i meatia e ia ki Hiruharama.
- 5
- Ko wai hoki e tohu i a koe, e Hiruharama? ko wai e tangi ki a koe? ko wai e peka atu ki te ui, kei te ora ranei koe?
- 6
- Kua whakarerea ahau e koe, e ai ta Ihowa, kua riro koe ki muri: na, ka totoro atu toku ringaringa ki runga ki a koe, a ka whakamotitia koe; kua hoha ahau ki te ripeneta.
- 7
- Ka whakarererere ano hoki ahau i a ratou ki te whakarererere witi i nga kuwaha o te whenua; ka kore i a au a ratou tamariki, ka whakangaromia e ahau toku iwi, mo ratou kahore e tahuri mai i o ratou ara.
- 8
- A ratou pouaru i toku aroaro kua tokomaha atu i te onepu o nga moana: kua kawea atu e ahau ki a ratou, hei hoa riri mo te whaea, he taitamariki e pahua ana i te awatea, ka meinga e ahau kia pa whakarere atu te pawera me te tumatatenga ki a ia.
- 9
- Ngohe kau te wahine ka tokowhitu nei ana tamariki; kua hemo tona wairua; kua rere tona ra i te mea ko te awatea nei ano, whakama ana ia, numinumi kau ana; ka tukua atu ano hoki e ahau o ratou morehu ki te hoari i te aroaro o o ratou hoa riri, e ai ta Ihowa.
- 10
- Aue toku mate, e toku whaea, i whanau hoki ahau i roto i a koe he tangata totohe, he tangata ngangare ki te whenua katoa! kihai ahau i whakatarewa atu i te moni whakatuputupu, kihai ano hoki te moni whakatuputupu i whakatarewaina mai ki a au; heoi kei te kanga ratou katoa i a au.
- 11
- I mea mai a Ihowa, He pono ka pai te tukunga iho ki a koe; he pono ka meinga e ahau te hoa riri kia atawhai ki a koe i te wa o te he, i te wa o te mamae.
- 12
- E wahi ranei te rino i te rino o te nota, i te parahi?
- 13
- Ka hoatu e ahau ou rawa me ou taonga hei taonga parakete, kahore hoki he utu, mo o hara katoa hoki i o rohe katoa.
- 14
- Ka meinga ano koe e ahau kia haere tahi koutou ko o hoa riri ki te whenua kihai i mohiotia e koe; no te mea ka ngiha te ahi i a au e riri nei, kā tonu atu ki a koutou.
- 15
- E Ihowa, e mohio ana koe, mahara mai ki a au, tirotirohia mai ahau, rapua he utu mo toku matenga i oku kai tukino; kei tangohia atu ahau e koe i runga i to manawanui: kia mohio koe, na tau ra ahau i tawaia ai.
- 16
- I kitea o kupu, a kainga ake e ahau, ki a au hei whakakoa, hei whakahari o kupu mo toku ngakau: kua karangatia hoki to ingoa ki a au, e Ihowa, e te Atua o nga mano.
- 17
- Kihai ahau i noho i roto i te whakaminenga o te hunga whakahi, kihai i whakamanamana atu; he whakaaro ki to ringa i noho mokemoke ai ahau; kua whakakīa nei hoki ahau e koe ki te riri.
- 18
- He aha toku mamae i mau tonu ai? he aha toku patunga tē mahu ai, tē pai ai ki te rongoa? ka rite rawa ranei ki ta te tangata korero teka tau ki a au, he wai e kore e mau?
- 19
- Mo reira ko te kupu tenei a Ihowa, Ki te hoki mai koe, na, ka whakahokia koe e ahau, a ka tu koe ki toku aroaro; ki te tangohia ano hoki e koe te mea utu nui i roto i te mea kino, ka rite koe ki toku mangai. Ko ratou e hoki mai ki a koe, kaua ano koe e hoki atu ki a ratou.
- 20
- Ka meinga ano koe e ahau hei taiepa parahi ki tenei iwi, kaha rawa, a ka whawhai ratou ki a koe; otiia e kore e kaha i a koe; no te mea kei a koe ahau, hei whakaora i a koe, kia mawhiti mai ai koe, e ai ta Ihowa.
- 21
- Ka meinga ano koe e ahau kia mawhiti mai i roto i te ringa o te hunga kino, ka hokona ano hoki koe e ahau i roto i te ringa o te hunga nanakia.
Address: 
Phone: 
Email: