- 1
- Te kupu i puta mai ki a Heremaia mo nga Hurai katoa e noho ana i te whenua o Ihipa, e noho ana i Mikiroro, i Tahapanehe, i Nopo, i te whenua ano o Patoro; i mea ia,
- 2
- Ko te kupu tenei a Ihowa o nga mano, Atua o Iharaira, Kua kite koutou i te kino katoa i takina mai nei e ahau ki runga ki Hiruharama, ki nga pa katoa ano hoki o Hura, na, kua ururuatia inaianei, kahore hoki he tangata e noho ana i roto;
- 3
- Mo ta ratou kino i mahia e ratou, mo te whakapataritaringa i a au, mo te haerenga ki te tahu whakakakara, ki te mahi ki nga atua ke kihai nei ratou i mohio, ratou, koutou, o koutou mātua ranei.
- 4
- Na, i ungā mai ano e ahau aku pononga katoa, nga poropiti, ki a koutou, maranga wawe ana ahau ki te unga i a ratou; i mea ahau, Kaua e mahia tenei mea whakarihariha e kino atu nei ahau.
- 5
- Heoi kihai ratou i whakarongo, kihai ano i tahuri mai o ratou taringa, kihai i hoki atu i ta ratou kino, ara, i te tahu whakakakara ki nga atua ke.
- 6
- Na, kua ringitia atu nei taku weriweri, taku riri, ngiha tonu atu ki roto ki nga pa o Hura, ki nga huarahi o Hiruharama, waiho tonu iho hei ururua, hei tuhea, koia ano tenei inaianei.
- 7
- Na, ko te kupu tenei inaianei a Ihowa Atua o nga mano, Atua o Iharaira, He aha tenei kino nui i mahia ai e koutou mo o koutou wairua? ka hatepea atu hoki i roto i a koutou nga tane, nga wahine, te kohungahunga, te mea ngote u, i roto i a Hura, kore iho he toenga o koutou e mahue.
- 8
- He whakapataritari hoki ta koutou i a au ki nga mahi a o koutou ringaringa, i a koutou ka tahu whakakakara nei ki nga atua kē ki te whenua o Ihipa, kua haere atu na koutou ki reira noho ai; te otinga, ka hatepea atu koutou e koutou ano, ka waiho koutou hei kanga, hei ingoa kino, i roto i nga iwi katoa o te whenua.
- 9
- Kua wareware ranei koutou ki te kino o o koutou mātua, ki te kino o nga kingi o Hura, ki te kino o a ratou wahine, ki o koutou kino, ki te kino o a koutou wahine i mahia nei e ratou ki te whenua o Hura, ki nga huarahi o Hiruharama?
- 10
- Kihai ratou i kuru iho i a ratou ano, a taea noatia tenei ra, kihai ano i wehi, kihai ano i haere i runga i taku ture, i runga i aku tikanga i hoatu e ahau ki to koutou aroaro, ki te aroaro ano o o koutou mātua.
- 11
- Mo reira ko te kupu tenei a Ihowa o nga mano, Atua o Iharaira, Tenei toku mata te anga atu nei ki a koutou mo te kino, he hatepe atu i a Hura katoa.
- 12
- Ka tikina ano e ahau nga morehu o Hura kua anga nei o ratou mata ki te haere ki te whenua o Ihipa ki reira noho ai, a ka poto ratou katoa, ka hinga ki te whenua o Ihipa; ka poto ratou i te hoari, i te hemo-kai; ka mate ratou, te iti, te rahi, i te hoari, i te hemo-kai, ka waiho ratou hei kanga, hei miharotanga, hei kohukohunga, hei ingoa kino.
- 13
- Ka whiua ano hoki e ahau te hunga e noho ana i te whenua o Ihipa, ka rite ano ki taku whiunga i Hiruharama ki te hoari, ki te hemo-kai, ki te mate uruta.
- 14
- E kore ano tetahi o nga morehu o Hura i haere atu nei ki te whenua o Ihipa noho ai, e mawhiti, e toe, hei hoki atu ki te whenua o Hura, ki te wahi e hiahia nei ratou kia hoki atu ki reira noho ai: e kore hoki ratou e hoki, ko te hunga anake e mawhiti atu.
- 15
- Katahi ka whakahokia mai ki a Heremaia e nga tangata katoa i mohio kua tahu whakakakara a ratou wahine ki nga atua ke, e nga wahine katoa ano hoki e tu mai ana, he nui te huihui, e te iwi katoa ano hoki e noho ana i te whenua o Ihipa, i Patoro; i mea ratou,
- 16
- Te kupu kua korerotia mai na e koe ki a matou i runga i te ingoa o Ihowa, e kore matou e whakarongo ki a koe.
- 17
- Engari ka mahia marietia e matou nga mea katoa i puaki i o matou mangai, ka tahuna he whakakakara ki te kuini o te rangi, ka ringitia ano he ringihanga ki a ia, ka pera ano matou me ta matou, me ta o matou mātua, me ta o matou kingi, me ta o matou rangatira i roto i nga pa o Hura, i nga huarahi o Hiruharama; i makona hoki matou i reira i te taro; i pai ano, a kihai i kite i te he.
- 18
- Na, no te mutunga o ta matou tahu whakakakara ki te kuini o te rangi, o ta matou ringihanga ano hoki i nga ringihanga ki a ia, i kore ai nga mea katoa ma matou, a poto iho matou i te hoari, i te hemo-kai.
- 19
- Na, i a matou e tahu whakakakara ana ki te kuini o te rangi, a e riringi ana i nga ringihanga ki a ia, i ngaro atu ranei a matou tane i a matou e hanga ana i nga keke mana, hei karakiatanga atu ki a ia, i a matou ano e riringi ana i nga ringihanga?
- 20
- Ano ra hoki ko Heremaia ki te iwi katoa, ki nga tane, ki nga wahine, ki te iwi katoa i whakahoki mai nei i taua kupu ki a ia; i mea ia,
- 21
- Te whakakakara i tahuna ra e koutou ki nga pa o Hura, ki nga huarahi o Hiruharama, e koutou, e o koutou mātua, e o koutou kingi, e o koutou rangatira, e te iwi o te whenua, kihai ianei ena mea i maharatia e Ihowa? kihai ianei i puta ake ki tona ngakau?
- 22
- A, tē ahei a Ihowa te whakamanawanui tonu i te kino o a koutou hanga, i nga mea whakarihariha i mahia e koutou; na, kua ururuatia to koutou whenua, kua waiho hei miharotanga, hei kohukohunga, tē ai he tangata hei noho, koia ano tenei inaianei.
- 23
- Mo ta koutou tahunga i te whakakakara, mo ta koutou haranga ki a Ihowa, i a koutou kihai i whakarongo ki te reo o Ihowa, kihai hoki i haere i runga i tana ture, i runga i ana tikanga, i runga i ana whakaaturanga; mo reira i tutaki ai tenei he ki a koutou, koia ano tenei inaianei.
- 24
- I mea ano a Heremaia ki te iwi katoa, ki nga wahine katoa ano hoki, Whakarongo ki te kupu a Ihowa, e Hura katoa i te whenua nei o Ihipa.
- 25
- Ko te kupu tenei a Ihowa o nga mano, Atua o Iharaira; e ki ana ia, Koutou, me a koutou wahine, kua korero o koutou mangai, kua rite ano hoki i o koutou ringa te kupu, Ka mahia marietia e matou a matou kupu taurangi i korerotia e matou, ara, kia tahuna he whakakakara ki te kuini o te rangi, kia ringitia ano hoki he ringihanga ki a ia: ka mana rawa i a koutou a koutou kupu taurangi; ka mahia marietia ano hoki e koutou a koutou kupu taurangi.
- 26
- Mo reira whakarongo ki te kupu a Ihowa, e Hura katoa e noho nei i te whenua o Ihipa, Nana, ka oatitia nei e ahau toku ingoa nui, e ai ta Ihowa, e kore toku ingoa e whakahuatia a muri nei e te mangai o tetahi tangata o Hura, i te whenua katoa o Ihipa, e kore e kīa, Kei te ora te Ariki a Ihowa.
- 27
- Tenei au te tirotiro nei i a ratou hei mea mo te kino, ehara i te mea hei pai: nga tangata katoa ano hoki o Hura i te whenua o Ihipa ka poto i te hoari, i te hemo-kai, a moti noa ratou.
- 28
- Na, nga oranga i te hoari ka hoki atu i te whenua o Ihipa ki te whenua o Hura, he hunga torutoru, a ka mohio nga morehu katoa o Hura i haere nei ki te whenua o Ihipa noho ai, ko ta wai kupu e tu, ko taku ranei, ko ta ratou ranei.
- 29
- A ko te tohu tenei ki a koutou, e ai ta Ihowa, mo koutou ka whiua e ahau ki tenei wahi, kia mohio ai koutou ka mau tonu aku kupu ki te kino mo koutou.
- 30
- Ko te kupu tenei a Ihowa, Tenei ahau ka hoatu nei i a Parao-hopora kingi o Ihipa ki te ringaringa o ona hoa riri, ki te ringaringa ano o te hunga e whai ana kia whakamatea ia; ka rite ano ki taku hoatutanga i a Terekia kingi o Hura ki te ringaringa o Nepukararetara kingi o Papurona, o tona hoa riri i whai nei kia whakamatea ia.
Address: 
Phone: 
Email: