- 1
- I te timatanga te Kupu, a i te Atua te Kupu, ko te Atua ano hoki taua Kupu.
- 2
- I te Atua ano tenei Kupu i te timatanga.
- 3
- Nāna nga mea katoa i hanga; a kahore tetahi mea i kore te hanga e ia o nga mea i hangā.
- 4
- I a ia te ora; a ko te ora te māramatanga mo nga tāngata.
- 5
- I roto i te pouri te Māramatanga e whiti ana; heoi kihai i mau i te pouri.
- 6
- I tonoa mai he tangata e te Atua, ko Hoani tona ingoa.
- 7
- I haere mai ia hei kai whakaatu, hei whakaatu mo te Māramatanga, kia meinga ai e ia nga tāngata katoa kia whakapono.
- 8
- Ehara ia i taua Māramatanga, engari hei kai whakaatu mo taua Māramatanga.
- 9
- Ko te Māramatanga pono tera, e mārama ai nga tāngata katoa e haere mai ana ki te ao.
- 10
- I te ao ia, i hangā ano e ia te ao, a kihai te ao i mohio ki a ia.
- 11
- I haere mai ia ki ona, a kihai ona i manako ki a ia.
- 12
- Tena ko te hunga i manako ki a ia, i tukua mai e ia ki a ratou nga tikanga e meinga ai ratou hei tamariki ma te Atua, ki te hunga hoki e whakapono ana ki tona ingoa:
- 13
- Ki te hunga ehara nei i te toto, ehara i te hiahia o te kikokiko, ehara i te hiahia o te tangata, engari na te Atua ratou i whanau ai.
- 14
- A i whakakikokikotia te Kupu, a noho ana i a matou, (a i kite ano matou i tona kororia, he kororia e rite ana ki to te Tamaiti kotahi a te Matua), kī tonu i te aroha noa me te pono.
- 15
- I korerotia ano ia e Hoani; i karanga tera, i mea, Ko ia tenei i korerotia ra e ahau, Ko ia e haere mai ana i muri i a au e meinga ana ki mua i a au: no mua hoki ia i a au.
- 16
- A kua riro mai i a tatau katoa tetahi wahi o tona raneatanga, te aroha noa hoki hono iho ano ki te aroha noa.
- 17
- I homai hoki e Mohi te ture, ko te aroha noa me te pono i ahu mai i a Ihu Karaiti.
- 18
- Kahore ano tetahi i kite noa i te Atua; ko te Tamaiti kotahi i te uma o te Matua, nana ia i whakapuaki mai.
- 19
- Na, ko te korero tenei a Hoani, i te tononga mai o nga tohunga ratou ko nga Riwaiti e nga Hurai i Hiruharama hei ui ki a ia, Ko wai koe?
- 20
- Na, ka whakina atu e ia, kihai i whakakahore, i whaki hoki, Ehara ahau i a te Karaiti.
- 21
- A ui atu ana ratou ki a ia, Ko wai oti? Ko Iraia koe? Ka mea ia, Kahore. Ko te poropiti oti koe? Ka whakahokia mai e ia, Kahore.
- 22
- Na, ka mea ratou ki a ia, Ko wai koia koe? Hei kupu whakahokinga atu ma matou ki te hunga i tonoa mai ai matou. E pehea ana koe ki a koe?
- 23
- Ka mea ia, He reo ahau no tetahi e karanga ana i te koraha, Whakatikaia te huarahi o te Ariki; he pera ano me ta Ihaia poropiti i mea ai.
- 24
- A no nga Parihi te hunga i tonoa.
- 25
- Na, ka ui atu ratou ki a ia, ka mea ki a ia, Na te aha oti koe i iriiri ai, ki te mea ehara koe i a te Karaiti, ehara i a Iraia, ehara i te poropiti?
- 26
- Na, ka whakahokia mai e Hoani ki a ratou, ka mea, He iriiri taku ki te wai: otiia tena te tu na i waenganui i a koutou tetahi kahore e mohiotia e koutou;
- 27
- Ko ia tenei e haere mai ana i muri i a au, no mua ia i a au; kahore hoki ahau e tau hei wewete i te here o tona hu.
- 28
- I meatia enei mea ki Petapara, ki tawahi atu o Horano, ki te wahi i iriiri ai a Hoani.
- 29
- I te aonga ake ka kite a Hoani i a Ihu e haere mai ana ki a ia, a ka mea, Na, te Reme a te Atua, hei waha atu i te hara o te ao!
- 30
- Ko ia tenei i korero ai ahau, Kei te haere mai i muri i a au tetahi tangata e meinga ki mua i a au; no mua hoki ia i a au.
- 31
- A kahore ahau i mātau ki a ia heoi ra hei whakakite i a ia ki Iharaira, i haere mai ai ahau me taku iriiri ki te wai.
- 32
- Na, ka whakaatu a Hoani, ka mea, I kite ahau i te Wairua e heke iho ana i te rangi, ano he kukupa, a noho ana i runga i a ia.
- 33
- A kahore ahau i mātau ki a ia: engari i ki mai ki a au te kai tono i a au ki te iriiri ki te wai, Te tangata e kite ai koe i te Wairua e heke iho ana, a e noho ana ki runga ki a ia, ko ia tena te kai iriiri ki te Wairua Tapu.
- 34
- A kua kite ahau, kua whakaatu nei hoki, ko te Tama tenei a te Atua.
- 35
- I te aonga ake i te tu ano a Hoani, me ana akonga tokorua;
- 36
- Na, ka titiro atu ia ki a Ihu e haere ana, a ka mea, Na, te Reme a te Atua!
- 37
- A ka rongo nga akonga tokorua ki a ia e korero ana, a aru ana raua i a Ihu.
- 38
- A, te tahuritanga o Ihu, ka kite i a raua e aru ana, ka mea ia ki a raua, E rapu aha ana korua? Na, ko ta raua meatanga atu ki a ia, E Rapi, (ko te tikanga tenei ina whakamaoritia, E te Kai whakaako,) kei hea tou kāinga?
- 39
- Ka mea ia ki a raua, Haere mai kia kite. Haere atu ana raua, a ka kite i tona wahi i noho ai, a noho ana i a ia i taua ra: ko te tekau hoki ia o nga haora.
- 40
- Ko Anaru teina o Haimona Pita tetahi o taua tokorua i rongo nei ki a Hoani, a aru ana i a ia.
- 41
- Ko ia kua kite wawe i tona tuakana ake i a Haimona, ka mea ki a ia, Kua kitea e maua te Mihaia, (ko te tikanga tenei ina whakamaoritia, ko te Karaiti.)
- 42
- Na, nana ia i arahi ki a Ihu. A ka titiro a Ihu ki a ia, ka mea, Ko Haimona koe tama a Hona: me hua koe ko Kipa, (tona whakamaoritanga, Ko te kohatu.)
- 43
- I te aonga ake ka mea a Ihu kia haere ki Kariri, a, tona kitenga i a Piripi, ka mea ki a ia, Arumia mai ahau.
- 44
- Na, no Petahaira a Piripi, no te pa o Anaru raua ko Pita.
- 45
- Ka kite a Piripi i a Natanahira, ka mea ki a ia, Kua kitea e matou ta Mohi i tuhituhi ai i roto i te ture, ta nga poropiti na, a Ihu o Nahareta tama a Hohepa.
- 46
- Na, ka mea a Natanahira ki a ia, E puta mai koia tetahi mea pai i Nahareta? Ka mea a Piripi ki a ia, Haere mai kia kite.
- 47
- A, te kitenga o Ihu i a Natanahira e haere mai ana ki a ia, ka puaki tana kupu mona, Na, te tino tangata o Iharaira, kahore ona tinihanga.
- 48
- Ka mea a Natanahira ki a ia, No hea koe i mātau mai ai ki a au? Ka whakahokia mai e Ihu ki a ia, ka mea, I te mea kiano koe i karangatia e Piripi, i a koe ano i raro i te piki, i kite ahau i a koe.
- 49
- Na, ka whakahokia atu e Natanahira, ka mea ki a ia, E Rapi, ko koe te Tama a te Atua, ko koe te Kingi o Iharaira.
- 50
- Na, Ka whakahokia mai e Ihu, ka mea ki a ia, No taku meatanga ki a koe, I kite ahau i a koe i raro i te piki, i whakapono ai koe? Rahi atu i enei nga mea e kitea e koe.
- 51
- I mea ano ia ki a ia, He pono, he pono tenei kupu aku ki a koutou, Tukua atu koutou kite ai i te rangi e tuwhera ana, i nga anahera ano hoki a te Atua e piki atu ana e heke iho ana ki te Tama a te tangata.
Address: 
Phone: 
Email: