- 1
- Na, i te toru o nga ra he marenatanga kei Kana o Kariri; a i reira ano te whaea o Ihu:
- 2
- A i karangatia ano a Ihu ratou ko ana akonga ki te marenatanga.
- 3
- A, te potonga o te waina, ka mea te whaea o Ihu ki a ia, Kahore a ratou waina.
- 4
- Ka mea a Ihu ki a ia, Hei aha ma taua, e tai? kahore ano kia taea noatia taku haora.
- 5
- Ka mea tona whaea ki nga kai mahi, Ko tana e mea ai ki a koutou, meatia.
- 6
- A e ono nga ipu kohatu e tu ana i reira, he tikanga na nga Hurai mo te horoi, e rua e toru nga mehua o tetahi o tetahi ina kī.
- 7
- Ka mea a Ihu ki a ratou, Whakakiia nga ipu ki te wai. A whakakiia ana e ratou, purena noa.
- 8
- Na, ka mea ia ki a ratou, Tena, utuhia, kawea atu ki te rangatira o te hākari. A kawea atu ana e ratou.
- 9
- Ano ka whakamatautau te rangatira o te hākari i te wai i whakawainatia, a kihai i mohio no hea ranei; (ko nga pononga ia i utuhia ai te wai i mohio;) ka karanga te rangatira o te hākari ki te tāne marena hou,
- 10
- Ka mea ki a ia, E whakatakotoria ana e nga tāngata katoa te waina pai i te timatanga; a ka roa te inumanga, mo reira te waina he iti iho nei te pai: ko koe ia, kua tohu i te waina pai mo konei.
- 11
- I meatia tenei timatanga merekara e Ihu ki Kana o Kariri, a whakakitea ana e ia tona kororia; a whakapono ana ana akonga ki a ia.
- 12
- Muri iho i tenei ka haere ia ki Kaperenauma, a ia, tona whaea, ona teina, me ana akonga: a kihai i maha nga ra i noho ai ratou ki reira.
- 13
- Na, kua tata te Kapenga o nga Hurai, a ka haere a Ihu ki Hiruharama:
- 14
- Na, rokohanga atu e ia kei roto i te temepara e noho ana nga kai hoko kau, hipi, kukupa, me nga kai whakawhitiwhiti moni.
- 15
- A ka oti tetahi whiu te hanga e ia ki nga aho nonohi, na, whiua katoatia ana ratou e ia ki waho i te temepara, me nga hipi, me nga kau; a ringihia ana te moni a nga kai whakawhitiwhiti moni, hurihia ake nga tepara;
- 16
- I mea ano ia ki nga kai hoko kukupa, Tangohia atu enei i konei: aua te whare o toku Matua e meinga hei whare hokohoko.
- 17
- A ka mahara ana akonga ki te mea i tuhituhia, Ka pau ahau i te aroha ki tou whare.
- 18
- Na, ka whakahokia atu e nga Hurai, ka mea ki a ia, He aha te tohu e whakakitea mai ana e koe ki a matou, ina koe ka mea i enei mea?
- 19
- Na, ka whakahokia mai e Ihu, ka mea ki a ratou, Wawahia tenei whare tapu, a kia toru nga ra ka ara ano i a au.
- 20
- Ano ra ko nga Hurai, E wha tekau ma ono nga tau i hangā ai tenei whare tapu, a e oti ranei te hanga e koe i nga ra e toru?
- 21
- Otira ko te whare tapu o tona tinana tana i korero ai.
- 22
- Na, tona aranga ake i te mate, ka mahara ana akonga ki tana korerotanga i tenei ki a ratou; a whakapono ana ki te Karaipiture, ki te kupu hoki i korerotia e Ihu.
- 23
- Na, i a ia i Hiruharama i te Kapenga, i te hākari, he tokomaha i whakapono ki tona ingoa, i to ratou kitenga i ana merekara i meatia e ia.
- 24
- Otira kihai a Ihu i tuku atu i a ia ki a ratou, i mohio hoki ia ki nga tāngata katoa.
- 25
- A kahore ana meatanga kia whakaaturia mai te tangata e tetahi: i mātau hoki ia ki te mea i roto i te tangata.
Address: 
Phone: 
Email: