- 1
- Ka mutu enei korero a Ihu, ka haere atu ia, ratou ko ana akonga ki tera taha o te manga wai, ara o Kerono. Na, he kāri ano kei reira, a tapoko atu ana ia, ratou ko ana akonga.
- 2
- I matauria ano hoki taua wahi e Hura, e te tangata e tukua ai ia: he maha hoki nga hokinga o Ihu, ratou ko ana akonga ki reira.
- 3
- Na, ka hoatu ki a Hura tetahi matua me etahi katipa e nga tohunga nui, ratou ko nga Parihi, a haere mai ana ki reira, me nga roherohe, me nga rama, me nga patu.
- 4
- A i mātau ano a Ihu ki nga mea katoa meake pa mai ki a ia, ka puta atu, ka mea ki a ratou, Ko wai ta koutou e rapu?
- 5
- Ka whakahokia e ratou ki a ia, Ko Ihu o Nahareta. Ka mea a Ihu ki a ratou, Ko ahau ia, A, i te tu ano i roto i a ratou a Hura, tona kai tuku.
- 6
- Na, tana korerotanga mai ki a ratou, Ko ahau ia, hoki ana ratou ki muri, hinga ana ki te whenua.
- 7
- Na, ka ui mai ano ia ki a ratou, Ko wai ta koutou e rapu? Ka mea ratou, Ko Ihu o Nahareta.
- 8
- Ka whakahokia mai e Ihu, Kua mea atu ahau ki a koutou, ko ahau ia: ki te mea e rapu ana koutou i a au, tukua enei kia haere:
- 9
- Kia rite ai te kupu i korerotia e ia, Kahore i ngaro tetahi o te hunga i homai e koe ki a au.
- 10
- Na, he hoari ta Haimona Pita, unuhia ana e ia, a haua iho te pononga a te tohunga nui, tapahia ana tana taringa matau. Te ingoa o taua pononga ko Maraku.
- 11
- Ka mea a Ihu ki a Pita, Kuhua to hoari ki te takotoranga: auaka ranei te kapa i homai e toku Matua ki a au e inumia e ahau?
- 12
- Me i reira ka hopukina a Ihu e taua matua, e te rangatira me nga katipa o nga Hurai, a hereherea ana ia.
- 13
- Na, ka matua kawea ia e ratou ki a Anaha; ko ia hoki te hungawai o Kaiapa, ko Kaiapa hoki te tohunga nui mo ia tau.
- 14
- Ko Kaiapa te kai whakatakoto i te whakaaro ki nga Hurai, Nui atu te pai ki te mate te tangata kotahi mo te iwi.
- 15
- Na, ka arumia a Ihu e Haimaona Pita, raua ko tetahi atu o nga akonga: i mohiotia hoki taua akonga e te tohunga nui, a tomo tahi atu ana me Ihu ki te whare o te tohunga nui.
- 16
- Ko Pita ia i tu i te kuwaha i waho. Na ka puta atu taua akonga i mohiotia nei e te tohunga nui, ka korero atu ki te kai tiaki o te tatau, a arahina ana a Pita ki roto.
- 17
- Na, ko te meatanga mai a te kotiro tiaki o te tatau ki a Pita, Ehara ianei koe i tetahi o nga akonga a tenei tangata? Ka mea mai ia, Ehara.
- 18
- Na, i te tu tera nga pononga me nga katipa, i whakaungia hoki e ratou te kapura waro, i te makariri: a inaina ana ratou: tu tahi ana ano hoki a Pita me ratou, inaina ana.
- 19
- Na, ka uia a Ihu e te tohunga nui ki ana akonga, ki tana ako.
- 20
- Ka whakahokia mai e Ihu ki a ia, I korero nui ahau ki te ao; i ako tonu ahau i roto i te whare karakia, i te temepara hoki, i te wahi i huihui tonu ai nga Hurai; kahore ano hoki tetahi mea i korerotia pukutia e ahau.
- 21
- He aha koe ka ui mai ai ki a au? ui atu ki te hunga i rongo ki taku i mea atu ai ki a ratou: nana, e mohio ana ratou ki aku i korero ai.
- 22
- Tana korerotanga i enei kupu, ka papaki i a Ihu tetahi o nga katipa i tu ra, ka mea, E pena atu ana koe ki te tohunga nui?
- 23
- Ka whakahokia mai e Ihu ki a ia, Ki te kino aku korero, whakaaturia te kino: a ki te pai, he aha koe i papaki ai i a au?
- 24
- Na, ka tonoa hereheretia atu ia e Anaha ki a Kaiapa tohunga nui.
- 25
- A i te tu ano a Haimona Pita, e inaina ana. Ka mea ratou ki a ia, Ehara ianei koe i tetahi o ana akonga? Ka whakakahore ia, ka mea, Ehara.
- 26
- Ka mea tetahi o nga pononga a te tohunga nui, he whanaunga nona i tapahia nei te taringa e Pita, Kihai ianei ahau i kite i a koe, korua tahi i te kāri?
- 27
- Na, ka whakakahore ano a Pita: a tangi tonu iho te tikaokao.
- 28
- Katahi ka arahina atu a Ihu e ratou i a Kaiapa ki te whare whakawa: a ka puao te ata; ko ratou ia kihai i tomo atu ki te whare whakawa, kei poke ratou; engari kia kai ai ratou i te Kapenga.
- 29
- Na, ka puta mai a Pirato ki a ratou, ka mea, He aha ta koutou korero whakawa mo tenei tangata?
- 30
- Ka whakahokia atu e ratou, ka mea ki a ia, Me i kaua ia te mahi i te kino, kihai i kawea mai e matou ki a koe.
- 31
- Na, ko te meatanga mai a Pirato ki a ratou, Tangohia atu ia e koutou, whakawakia, kei ta koutou te ture. Ka ki mai nga Hurai ki a ia, E kore e tika kia whakamatea tetahi tangata e matou:
- 32
- I rite ai hoki te kupu i korerotia e Ihu, tana hoki i korero ai hei whakaatu i te mate e mate ai ia.
- 33
- Me i reira ka tomo atu ano a Pirato ki te whare whakawa, a ka karanga i a Ihu, ka mea ki a ia, Ko koe ranei te Kingi o nga Hurai?
- 34
- Ka whakahokia mai e Ihu ki a ia, Nau ake ano tenei kupu, he korero ranei moku na te tangata ke ki a koe?
- 35
- Ka mea a Pirato, He Hurai koia ahau? Na tou iwi, na nga tohunga nui ano hoki, koe i kawe mai ki a au: i aha koia koe?
- 36
- Ka whakahokia mai e Ihu, Ehara toku rangatiratanga i tenei ao: me he mea no tenei ao toku rangatiratanga, kua tatau aku pononga, kei tukua ahau ki nga Hurai: tena ko tenei ehara toku rangatiratanga i konei.
- 37
- Na, ka mea a Pirato ki a ia, He kingi oti koe? Ka whakahokia mai e Ihu, Kua korerotia mai na e koe he kingi ahau. Ko te mea tenei i whanau ai ahau; na tenei hoki ahau i haere mai ai ki te ao, hei kai whakaatu mo te pono. E whakarongo ana ki toku reo nga tāngata katoa o te pono.
- 38
- Ka mea a Pirato ki a ia, He aha te pono? A, te puakanga o tenei ki, hoki atu ana ia ki waho ki nga Hurai, ka mea ki a ratou, Kahore tetahi hē o tenei tangata i mau i a au.
- 39
- Otiia he ritenga tenei na koutou kia tukua atu e ahau ki a koutou tetahi tangata i te Kapenga: na, e pai ana ranei koutou kia tukua e ahau ki a koutou te Kingi o nga Hurai?
- 40
- Heoi karanga katoa ana ano ratou, ka mea, Auaka tenei, engari a Parapa. Na, he tahae a Parapa.
Address: 
Phone: 
Email: