- 1
- Katahi ka mau a Pirato ki a Ihu, ka whiu i a ia.
- 2
- A ka whiria e nga hoia tetahi karauna tataramoa, potaea ana ki tona mātenga, whakakahuria ana hoki ia ki te kahu papura,
- 3
- Na, ka mea ratou, Tena koe, e te Kingi o nga Hurai! a pakia ana ia.
- 4
- Ka haere atu ano a Pirato, ka mea ki a ratou, Na, tenei te arahina atu nei e ahau ki a koutou, kia mohio ai koutou, kahore rawa i mau i a au tetahi hē ona.
- 5
- Na, ka puta a Ihu ki waho, me te karauna tataramoa i runga i a ia, te kakahu papura ano hoki. Ka mea a Pirato ki a ratou, Na, te tangata nei!
- 6
- A, te kitenga o nga tohunga nui ratou ko nga katipa i a ia, ka karanga ratou, ka mea, Ripekatia, ripekatia. Ka ki atu a Pirato ki a ratou, Tangohia atu ia e koutou, ripekātia: kahore hoki i mau i a au tetahi hē ona.
- 7
- Ka whakahokia mai e nga Hurai ki a ia, He ture ta matou, a ki ta matou ture, he mea tika kia mate ia, mona i mea ko te Tama ia a te Atua.
- 8
- A, te rongonga o Pirato i tenei ki, nui rawa tona wehi;
- 9
- Ka tomo atu ano ia ki te whare whakawa, a ka mea ki a Ihu, No hea koe? Heoi kahore a Ihu kupu i whakahoki mai ai ki a ia.
- 10
- Na, ka mea a Pirato ki a ia, E kore koe e korero mai ki a au? kahore koe e mohio, kei a au te tikanga mo te ripeka i a koe, kei a au ano te tikanga mo te tuku i a koe kia haere?
- 11
- Ka whakahokia mai e Ihu, Kahore o tikanga ki a au, me kahore i homai ki a koe i runga: koia i nui rawa ai te hara o te kai tuku i a au ki a koe.
- 12
- Na, i reira ake ano ka whai a Pirato kia tukua atu ia kia haere: otiia ka karanga nga Hurai, ka mea, Ki te tukua tenei e koe, ehara koe i te hoa no Hiha: ki te whakakingi tetahi tangata i a ia, he whakakahore tana i a Hiha.
- 13
- Ano ka rongo a Pirato i tenei korero, ka arahina e ia a Ihu ki waho, a noho ana ki runga ki te nohoanga whakawa, ki te wahi e karangatia nei ko te Whariki kohatu, ki te reo Hiperu, ko Kapata.
- 14
- Ko te takanga ia o te Kapenga, tata pu ki te ono o nga haora: a ka mea ia ki nga Hurai, Na, to koutou Kingi!
- 15
- Na, ko ta ratou karangatanga mai, Whakamatea, whakamatea, ripekatia. Ka mea a Pirato ki a ratou, Kia ripeka koia ahau i to koutou Kingi? Ka whakahokia mai e nga tohunga nui, Kahore o matou kingi, ko Hiha anake.
- 16
- Katahi ia ka hoatu e ia ki a ratou kia ripekatia. A ka mau ratou ki a Ihu, ka arahi atu.
- 17
- A amo ana ia i tona ripeka, haere ana ki te wahi e karangatia nei ko te wahi o te angānga, tona ingoa ki te reo Hiperu, ko Korokota:
- 18
- Na, ripekatia ana ia e ratou ki reira, a ia me tera tokorua atu, kotahi ki tetahi taha kotahi ki tetahi taha, ko Ihu i waenganui.
- 19
- Na, tuhituhia ana e Pirato tetahi ingoa, whakapiritia ana ki te ripeka. Ko te tuhituhinga tenei, KO IHU O NAHARETA, KO TE KINGI O NGA HURAI.
- 20
- A he tokomaha nga Hurai i korerotia ai tenei ingoa: i tata hoki ki te pa te wahi i ripekatia ai a Ihu: i tuhituhia hoki ki te reo Hiperu, ki te reo Kariki, ki te reo o Roma.
- 21
- Na, ka mea nga tohunga nui o nga Hurai ki a Pirato, Aua e tuhituhia, Ko te Kingi o nga Hurai; engari, Nāna i mea, Ko ahau te Kingi o nga Hurai.
- 22
- Ka whakahokia mai e Pirato, Ko taku i tuhituhi ai kua tuhituhia.
- 23
- A ka oti a Ihu te ripeka e nga hoia, ka mau ratou ki ona kakahu, wehea ake kia wha nga wahi, ki ia hoia he wahi; me te koti ano hoki: na, kahore he tuinga o te koti, he mea whatu iho i runga a puta noa.
- 24
- Na, ka mea ratou tetahi ki tetahi, Kaua e haea e tatou, engari me maka ki te rota kia kitea ai, mo wai ranei: na, ka rite te Karaipiture e mea nei, I wehewehea oku kakahu mo ratou, i maka rota hoki mo toku weruweru. Ko ta nga hoia tenei i mea ai.
- 25
- Na, i te taha o te ripeka o Ihu tona whaea e tu ana, ratou ko te teina o tona whaea, ko Meri wahine o Kereopa, ko Meri Makarini.
- 26
- A, te kitenga o Ihu i tona whaea, me te akonga hoki i aroha ai ia e tu tahi ana, ka mea ia ki tona whaea, E tai, nana, to tamaiti ra!
- 27
- Katahi ia ka mea ki taua akonga, Na, to whaea! No taua haora ake ano, i tango ai taua akonga i a ia ki tona whare.
- 28
- Muri iho i tenei, ka mohio a Ihu ka oti nga mea katoa, na, ka mea ia, hei whakaritenga hoki mo te Karaipiture, He mate wai toku.
- 29
- Na, tera e tu ana tetahi oko, kī tonu i te winika: a ka whakakiia e ratou tetahi hautai ki te winika, whakanohoia ana ki runga ki te hihopa, hoatu ana ki tona mangai.
- 30
- A, te inumanga nei o te winika e Ihu, ka mea ia, Kua oti: na, ka tuohu tona matenga, tukua atu ana te wairua.
- 31
- Na, i mea nga Hurai, kia kaua e mau nga tinana ki te ripeka i te hapati, ko te takanga hoki ia, ko te ra nui hoki taua hapati, ka mea ratou ki a Pirato kia whatiia o ratou waewae, kia tangohia atu hoki.
- 32
- Na, ka haere nga hoia, ka whawhati i nga waewae o to mua, me o tera i ripekatia ngatahitia nei me ia.
- 33
- A, to ratou taenga mai ki a Ihu, ka kite kua mate noa ake ia, kihai i whatiia e ratou ona waewae:
- 34
- Engari i werohia tona kaokao e tetahi o nga hoia ki te matia, a puta tonu mai he toto he wai.
- 35
- A ko te tangata i kitea ai, ko ia ano te kai whakaatu, e pono ana ano hoki tana whakaaturanga: a e mohio ana ano ia he korero pono tana, he mea ra kia whakapono ai koutou.
- 36
- I meatia hoki enei mea, kia rite ai te Karaipiture, E kore tetahi iwi ona e whatiia.
- 37
- A e mea ana ano tetahi atu Karaipiture, Ka titiro ratou ki ta ratou i wero ai.
- 38
- Muri iho i enei mea, ka inoi a Hohepa o Arimatia ki a Pirato kia tangohia e ia te tinana o Ihu; he akonga ia na Ihu, otiia he mea huna i te wehi ki nga Hurai: a whakaae ana a Pirato. Na, ka haere atu ia, ka tango i te tinana o Ihu.
- 39
- I haere mai ano hoki a Nikorima, tera i haere ra i mua ki a Ihu i te po, me te mau ano i te maira, i te aroa, he mea whakananu, kia kotahi pea rau pauna.
- 40
- Na, ka tango raua i te tinana o Ihu, takaia ana ki nga kakahu rinena me nga mea kakara, ko ta nga Hurai ritenga hoki ia mo te tanu.
- 41
- Na, he kāri kei te wahi i ripekatia ai ia; a i roto i taua kāri tetahi urupa hou, he mea kahore ano i takotoria noatia e tetahi.
- 42
- Na, ka whakatakotoria a Ihu e raua ki reira, no te mea he ra takanga ia no nga Hurai; a e tata ana te urupa.
Address: 
Phone: 
Email: