- 1
- Muri iho i enei mea ka whakakite a Ihu i a ia ki nga akonga i te moana o Taipiria; ko tana whakakitenga tenei:
- 2
- E noho tahi ana a Haimona Pita, a Tamati, ko Ririmu nei tona ingoa, a Natanahira o Kana o Kariri, nga tamariki a Heperi, tokorua atu ano hoki o ana akonga.
- 3
- Ka mea a Haimona Pita ki a ratou, Ka haere ahau ki te hao. Ka mea ratou ki a ia, Tatou tahi te haere. Haere ana ratou, a eke tonu atu ki runga ki te kaipuke; a i taua po kihai i mau tetahi mea.
- 4
- Na, ka puao te ata, ka tu a Ihu ki tatahi: otiia kihai nga akonga i mohio ko Ihu ia.
- 5
- Na, ko te meatanga mai a Ihu ki a ratou, E tama ma, kahore a koutou kai? Ka whakahokia mai e ratou ki a ia, Kahore.
- 6
- Ka mea atu ia ki a ratou, Maka te kupenga ki te taha mātau o te kaipuke, a ka mau etahi i a koutou. Na, ta ratou makanga atu, kihai i taea te kukume i te tini o nga ika.
- 7
- Katahi ka mea te akonga i arohangia e Ihu ki a Pita, Ko te Ariki. A, te rongonga o Haimona Pita, ko te Ariki, ka whitikiria tona kakahu, (e tu kau ana hoki ia,) a rere ana ki te moana.
- 8
- Ko era akonga ia i hoe mai i runga i te poti; (kihai hoki i mamao atu i te whenua, me te mea e rua rau nga whatianga,) e kukume ana i te kupenga me nga ika.
- 9
- A, to ratou uranga mai ki uta, ka kite i te kapura waro e ka ana, me nga ika e takoto ana i runga, me tetahi taro hoki.
- 10
- Ka mea a Ihu ki a ratou, Homai etahi o nga ika kua mau na i a koutou.
- 11
- Na, haere ana a Haimona Pita, a kumea ana e ia te kupenga ki uta, kī tonu i nga ika nunui, kotahi rau e rima tekau ma toru: a ahakoa tini, kihai i pakaru te kupenga.
- 12
- Ka mea a Ihu ki a ratou, Haere mai ki te kai. Heoi kihai tetahi o nga akonga i maia ki te ui atu ki a ia, Ko wai koe? i mohio hoki ko te Ariki.
- 13
- Na, ka haere mai a Ihu, ka mau ki te taro, a hoatu ana e ia ki a ratou, me nga ika ano hoki.
- 14
- Ko te toru tenei o nga putanga o Ihu ki ana akonga, i muri iho i tona aranga ake i te hunga mate.
- 15
- A ka mutu ta ratou kai, ka mea a Ihu ki a Haimona Pita, E Haimona, tama a Hona, rahi atu ranei tou aroha ki a au i to enei? Ka mea tera ki a ia, Ae, e te Ariki; e mohio ana koe e aroha ana ahau ki a koe. Ka mea mai ia ki a ia, Whangainga aku reme.
- 16
- Ka mea mai ano ia ki a ia, ko te rua o nga meatanga mai, E Haimona, tama a Hona, e aroha ana koe ki a au? Ka mea tera ki a ia, Ae, e te Ariki; e mohio ana koe e aroha ana ahau ki a koe. Ka mea ia ki a ia, Whangainga aku hipi.
- 17
- Ka mea atu ia ki a ia, ko te toru o nga meatanga atu, E Haimona, tama a Hona, e aroha ana koe ki a au? Ka pouri a Pita no te mea ka toru ana meatanga ki a ia, E aroha ana koe ki a au? Ka mea ano ki a ia, E te Ariki, e mohio ana koe ki nga mea katoa; e mohio ana koe e aroha ana ahau ki a koe. Ka mea a Ihu ki a ia, Whangainga aku hipi.
- 18
- He pono, he pono taku e mea atu nei ki a koe, I to tamarikitanga, i whitiki koe i a koe, i haere ki tau wahi i pai ai: ka koroheketia koe, ka whakamarokia e koe o ringaringa, a he tāngata ke māna koe e whitiki, e kawe ki te wahi e kore ai koe e pai.
- 19
- I korerotia tenei e ia, hei tohu mo te mate e whakakororia ai ia i te Atua. A ka puaki tenei kupu āna, ka mea ia ki a ia, Haere mai i muri i au.
- 20
- A, te tahuritanga o Pita, ka kite i te akonga i aroha ai a Ihu e aru mai ana; tera hoki i whakawhirinaki ki tona uma i te hapa, a i mea, E te Ariki, ko wai te kai tuku mou?
- 21
- A, te kitenga o Pita i a ia, ka mea ki a Ihu, E te Ariki, e aha ra tenei?
- 22
- Ka mea a Ihu ki a ia, Ki te pai ahau kia noho tonu ia kia tae mai ra ano ahau, hei aha mau? haere mai koe i muri i a au.
- 23
- Heoi ka puta atu tenei kupu ki nga hoa, e kore taua akonga e mate: otiia kihai a Ihu i mea ki a ia, E kore ia e mate; engari, Ki te pai ahau kia noho tonu ia kia tae mai ra ano ahau, hei aha mau?
- 24
- Ko taua akonga ano tenei e whakaatu nei i enei mea, ko te kai tuhituhi hoki ia i enei mea: a e mohio ana ano matou e tika ana tana whakaaturanga.
- 25
- Na, tera atu ano tona tini o nga mea i mea ai a Ihu, me i tuhituhia katoatia, e mea ana ahau, e kore te ao nei ano e whai takotoranga mo nga pukapuka e tuhituhia, Amine.
Address: 
Phone: 
Email: