- 1
- Na, ko te whakahokinga mai a Hopa; i mea ia,
- 2
- Tika rawa, ko koutou nga tangata, a ka kotahi ano te matenga o koutou, o te whakaaro nui.
- 3
- Kei a au ano hoki he ngakau, he pera ano me o koutou, kihai ahau i hoki iho i a koutou ko wai ra te he ana ki ena?
- 4
- Toku rite kei te tangata e kataina ana e tona hoa; kei te karanga ia ki te Atua, a whakarongo mai ana tera ki a ia: e kataina mai ana te mea tika, te ngakau tapatahi.
- 5
- Ki te whakaaro a te tangata kahore nei ona whakaohooho he rama e whakahaweatia ana te tangata kua tata ona waewae te paheke.
- 6
- Kei runga i te whenua-rangatira nga tapenakara o te hunga pahua, wehi-kore noa iho te hunga e whakapataritari ana ki te Atua; he ope noa mai nei hoki ta te Atua ki o ratou ringaringa.
- 7
- Pena ra, ui atu ki nga kararehe, ma ratou koe e whakaako; ki nga manu o te rangi, ma ratou e korero ki a koe.
- 8
- Korero atu ranei e koe ki te whenua, a mana koe e whakaako; ka whakaaturia mai ano hoki ki a koe e nga ika o te moana.
- 9
- Ko wai i kore te mohio ki enei mea katoa, ara, he mea mahi tenei na te ringa o Ihowa?
- 10
- Kei tona ringa nei te wairua o nga mea ora katoa, te manawa hoki o nga kikokiko tangata katoa.
- 11
- He teka ianei e whakamatauria ana nga kupu e te taringa? e kitea ana te reka o tana kai e te waha?
- 12
- Kei nga kaumatua nga whakaaro nui; kei te roa o nga ra te matauranga.
- 13
- Kei a ia nga whakaaro nui, te kaha; kei a ia nga tikanga pai, me te matauranga.
- 14
- Nana, e wawahia ana e ia, kore iho e hangā; e tutakina mai ana e ia te tangata, kahore hoki he putanga.
- 15
- Nana, e purua atu ana e ia nga wai, a kua maroke; e tukua atu ana ano, a ka hurihia te whenua.
- 16
- Kei a ia te kaha me te whakaaro tika; te tangata tinihanga, te tangata e tinihangatia ana, nāna.
- 17
- E kahakina atu ana e ia nga kai whakatakoto whakaaro, he mea pahua; whakakuaretia iho e ia nga kai whakarite whakawa.
- 18
- Te mana o nga kingi, wetekina ake e ia, herea iho e ia o ratou hope ki te whitiki.
- 19
- E kahakina atu ana e ia nga rangatira he mea pahua, hurihia ake e ia nga mea kaha.
- 20
- Whakakorea ake e ia he kupu ma te hunga ngakau pono, riro ana i a ia nga mahara o nga kaumatua.
- 21
- E ringitia ana e ia te whakahawea ki runga ki nga rangatira, e wetekina ana e ia te whitiki o te hunga kaha.
- 22
- E hurahia mai ana e ia nga mea hohonu i roto i te pouri, whakaputaina mai ana e ia te atarangi o te mate ki te māramatanga.
- 23
- E whakanuia ana e ia nga iwi, hunā iho ano ratou e ia: tohatoha noa atu i a ia nga iwi, a whakahokia mai ana ano ratou e ia kia iti.
- 24
- Whakakorea ake e ia he ngakau mo nga rangatira o te iwi o te whenua; whakapohehetia ake ratou e ia i te wahi ururua kahore nei he ara.
- 25
- Whawha ana ratou i te pouri, kahore hoki he māramatanga, kotitititi ke ana ratou, ano he tangata e haurangi ana.
Address: 
Phone: 
Email: