- 1
- Ano ra ko Hopa; i mea ia,
- 2
- Kia pehea ake te roa o ta koutou whakapouritanga i toku wairua, o ta koutou wawahanga i a au ki nga kupu?
- 3
- Ka tekau enei tawainga a koutou ki a au, kahore o koutou whakama i a koutou ka aki tonu nei i a au.
- 4
- Ki te mea ano hoki kua he ahau, kei a au ano toku he e takoto ana.
- 5
- Ki te mea ka whakatangata nui mai ano koutou ki a au, a ka kauwhau mai i toku tawainga ki a au;
- 6
- Kia mohio ra koutou na te Atua ahau i whakaparori ke, he mea hao mai ahau nana ki tana kupenga,
- 7
- Nana, e tangi ana ahau i te mahi nanakia, heoi kahore he kupu ki a au; e karanga ana ahau, otiia kahore he whakarite whakawa.
- 8
- Kua tutakina mai e ia toku ara, tē puta atu ahau; tukua iho ana e ia te pouri ki oku huarahi.
- 9
- Toku kororia huia atu ana e ia; tangohia ana e ia te karauna i toku mahunga.
- 10
- Wawahia ana ahau e ia i nga taha katoa, kua riro ahau; taku i tumanako atu ai huarangā atu ana e ia ano he rakau.
- 11
- Kua mura mai tona riri ki a au; e kiia ana ahau e ia he hoa riri nona.
- 12
- E haere ngatahi mai ana āna taua, e whakaneke ake ana i to ratou ara ki a au, kei te whakapae i toku tapenakara i tetahi taha, i tetahi taha.
- 13
- Kua meinga e ia oku teina kia matara atu i a au; aku i mohio ai kua tangata-kētia ratou ki a au.
- 14
- Oku hoa tata, mutu pu ta ratou; oku hoa ake, kua wareware ratou ki a au.
- 15
- Te hunga e noho ana i toku whare, me aku pononga wahine, kiia iho ahau e ratou he tangata ke; he tangata no nga whenua ahau ki ta ratou titiro mai.
- 16
- I karanga atu ahau ki taku pononga, heoi kihai ia i korero mai; inoi ana toku mangai ki a ia.
- 17
- Toku manawa, e hengia mai ana e taku wahine, i a au ano e karanga ana, e whakahua ana i nga tamariki a toku tinana.
- 18
- Nga tamariki ano hoki, whakahawea mai ana ratou ki a au; toku whakatikanga ake, kei te korero whakahe ratou moku.
- 19
- E whakarihariha mai ana ki a au oku takahoa katoa, aku i aroha ai kua ahua ke ratou ki a au.
- 20
- Piri tonu toku iwi ki toku kiri, ki oku kikokiko, a ora ake oku, ko te kiri kau o oku niho.
- 21
- Tohungia mai au, tohungia mai au, e oku hoa; kua pa mai hoki te ringa o te Atua ki a au.
- 22
- He aha koutou i tukino ai i a au, i pera ai me te Atua? tē makona koutou i oku kikokiko.
- 23
- Aue, me i tuhituhia aku kupu! Aue, me i haea ki te pukapuka!
- 24
- Me i whaoa ki te kamaka, he mea mea ki te pene rino ki te matā, hei mea mo a mua noa atu.
- 25
- E mohio ana hoki ahau kei te ora toku kai hoko, a i nga wa i muri nei ka tu ia ki runga ki te whenua;
- 26
- A ahakoa i muri i toku kiri ka pau tenei tinana, ka titiro atu ano ahau i roto ano i toku kikokiko ki te Atua.
- 27
- E titiro atu ano ahau ki a ia, ahau nei ano; ma oku kanohi, e kore ano e waiho ma te tangata ke e matakitaki atu; pau rawa oku whatumanawa i roto i a au.
- 28
- Tē ki koutou, He aha tatou i tukino ai i a ia, kua kitea hoki te take o te mea i roto i a au?
- 29
- Kia wehi koutou kei mate i te hoari; no te mea he whiunga ki te hoari kei roto i te riri, e mohio ai koutou he whakarite whakawa ano tenei.
Address: 
Phone: 
Email: